Baibuli Egamba Ki ha Bisoro Ebirukwetwa Dainaso?

Eky’okugarukamu kuruga omu Baibuli

Busaho kyahandiikirwe omu Baibuli ekirukubazaaho ebisoro ebirukwetwa dainaso. Baitu, Baibuli egamba ngu Ruhanga nuwe “ayahangire ebintu byona,” nahabweki nikyeyolekera kimu ngu ebisoro binu bikaba biri bimu ha bintu ebiyahangire. a (Okusuku’rwa 4:11) N’obukiraaba ngu Baibuli tebazaaho dainaso, baitu ebazaaho guruupu z’ebyahangirwe ebisobora kuba nibitwarramu n’ebisoro binu:

● “Ebyomunyanja ebikoto,” rundi “ebisoro ebikooto muno.”—Okubanza 1:21; New American Bible.

● “Byona ebinyakwekurra hansi.”—Okubanza 1:25.

● “Ebisoro byensi.”—Okubanza 1:25.

Dainaso zikaruga omu bisoro ebindi?

Omu kiikaro ky’okubaho omu mulingo gwa mpora mpora zikasisana oti rundi zirugire omu bisoro ebindi, ebisigarra nibyoleka ngu dainaso zikabaho bubaho. Kinu nikihikaana n’ebigambo bya Baibuli ebirukwoleka ngu Ruhanga akahanga ebisoro byona. Ekyokurorraho, omu Zabuli 146:6 nihabazaaho Ruhanga ngu “nuwe yakozire iguru nensi, enyanja na byona ebinyakurumu.”

Dainaso zikabaho di?

Baibuli ebazaaho ebisoro eby’omu maizi n’ebigendera hansi ngu, bikahangwa ha kiro ekyakataano n’ekyamukaaga, rundi omu busumi obw’okuhanga. b (Okubanza 1:20-25, 31) Nahabweki, Baibuli eyoleka akasumi nambere dainaso zisobora kuba zaberiireho kumara obwire bwingi.

Behemoth na Leviathan nabyo bikaba biri dainaso?

Nangwa. N’obukiraaba ngu ebisoro binu ebirukubazibwaho omu kitabu kya Yobu tibirukumanywa kurungi, ekisoro ekirukwetwa Behemoth nikikira kumanywa nk’ensere, kandi Leviathan nka gonya. Amabara ganu nigahikaana n’omulingo birukusoborrwa omu Byahandiikirwe. (Yobu 40:15-23; 41:1, 14-17, 31) Baitu nabwo, titusobora kugamba ngu ebigambo “Behemoth” na “Leviathan” nibimanyisa dainaso. Ruhanga akagambira Yobu kwekebiija emiringo y’ebisoro binu, kandi nambere Yobu yazaliirwe ebisoro binu bimazire kuhwaho.—Yobu 40:16; 41:8.

Kiki ekyahikire hali dainaso?

Baibuli tebazaaho okuhwaho kwa dainaso. Baitu egamba ngu ebintu byona bikahangwa ‘nkoku [Ruhanga] yagondeze,’ nahabweki nikyeyolekera kimu ngu Ruhanga akaba ainiire dainaso ekigendererwa. (Okusuku’rwa 4:11) Ekigendererwa eki obukyahikiriziibwe, Ruhanga akaikiriza dainaso zihweho.

[OBUGAMBO OBULI HANSI]