Ego, habwokuba Ruhanga agonza abantu basorrokane hamu kumuramya. Baibuli egamba ngu: “Tutekerezege okwekambisangana okugonzagana, nokukora engeso ezisemiire; okutaleka okwesorozaga hamu.”—Abaheburaniya 10:24, 25.

 Yesu akooleka ngu abahondezi be baakubaire omu kitebe ekitekaniziibwe kurungi obuyagambire ati: “Nukwo bona balimanya muli begeswa bange, obumurabaga nokugonzangana inywenka.” (Yohana 13:35) Omulingo omukuru abegeswa ba Kristo ogubaakwolekeremu okugonza kunu, nukwo kusorrokana hamu n’Abakristaayo bagenzi baabo. Baakubaire omu bitebe ebitekaniziibwe kurungi nukwo basorrokanege butoosa kuramya. (1 Abakolinso 16:19) Boona hamu, baakufookere oruganda orw’ensi yoona.—1 Petero 2:17.

Kuba omu Diini Kyonka Tikirukumara

 N’obukiraaba ngu Baibuli eyoleka ngu abantu baine kusorrokana hamu kusobora kuramya, terukwegesa ngu omuntu n’asobora kusemeza Ruhanga habwokuba aine ediini eyarumu kwonka. Kusobora kusiimwa Ruhanga, ediini omuntu eyarumu esemeriire kumukonyera kuhindura obwomeezi bwe obwa buli kiro. Ekyokurroraho Baibuli egamba ngu: “Edini esemiire etaroho okusisikara omu maiso ga Ruhanga waitu kandi Isitwe niyo enu, okusura enfuzi nabafakati omu muhito gwabu, nokwerindaga okutabaho akamogo omu nsi.”—Yakobo 1:27.