Nangwa, Ensi terihwerekerezebwa, teryokebwa n’omurro, rundi endi kugarurwa omu kiikaro kyayo. Baibuli n’eyegesa ngu Ruhanga akahanga ensi kwikarwamu habw’ebiro n’ebiro.

•   “Abahikiriire baligwetwa ensi, baragiikaramuga ebiro nebiro.”​—Zabuli 37:29.

•   “[Ruhanga] nuwe yataireho emiganda eyensi, etatengesebwa ebiro byona.”​—Zabuli 104:5.

•   ‘Ensi ikaraho ebiro byona.’​—Omugambizi 1:4.

•   “Ayabumbire ensi nagikora; nuwe yagigumizeho, . . . tiyagihangira busa, akagikorra okuikarwamuga.”​—Isaya 45:18.

 Ruhanga tarukwija kwikiriza abantu kuhwerekerereza kimu ensi kurabira omu kusiisa eby’obuhangwa, obulemu, rundi omu mulingo ogundi gwona. Oihireho, naija ‘kuhwerekereza abo abahwerekereza ensi.’ (Okusuku’rwa 11:18) Eki naija kukikora ata?

 Ruhanga naija kwihaho gavumenti zoona ez’ensi, eziremerwe kulinda ensi, kandi omu kiikaro kyazo agarremu Obukama bwe obw’omu iguru obuhikiriire. (Danieri 2:44; Matayo 6:9, 10) Obukama obu nibwija kulemwa Omwana we, Yesu Kristo. (Isaya 9:6, 7) Obw’akaba ali omu nsi, Yesu akooleka amaani ge ha buhangwa. (Marako 4:35-41) Nk’Omukama ow’Obukama bwa Ruhanga, naija kuba aine obusobozi bwona ha nsi na ha buhangwa. Naija kwongera agarre buhyaka enyikara y’ensi, agifoole nk’oku ekaba eri omu rugonjo orwa Adeni.​—Matayo 19:28; Luka 23:43.

 Nangwa, teyegesa eti. Entekereza enu ey’etahikire ekira kuruga omu kwetegereza kubi 2 Petero 3:7, nambere harukugamba ngu: “Iguru erya hati bunu nensi habwekigambo ekimu neki byahuliirwe omurro.” Tekerezaaho ensonga ibiri enkuru ezitukonyera kwetegereza amakuru ag’ebigambo ebi:

1.   Baibuli ekozesa ebigambo “iguru,” “ensi,” hamu “n’omurro” kumanyisa ebintu ebirukwahukana. Ekyokurorraho, Okubanza 11:1 nihagamba: “Ensi zona zikaba zinyina orulimi rumu.” Hanu, “ensi” n’emanyisa abantu.

2.   Ebigambo ebyetoroire 2 Petero 3:7 nibitukonyera kwetegereza amakuru ga iguru, ensi, hamu n’omurro ebibazibwaho omu rukarra runu. Orukarra 5 n’orwa 6 nizibazaaho Okusandaara kw’Amaizi okw’omu kasumi ka Nuha. Omu kasumi ako, ensi eya kara ekahwerekerezebwa, baitu ensi yaitu ekasigaraho. Oihireho, Okusandaara kw’Amaizi kukahwerekereza abantu ababi, rundi “ensi.” (Okubanza 6:​11) Kandi kukahwerekereza “n’iguru,” ekirukumanyisa abantu abakaba nibalema omu kasumi ako. Nahabweki, abantu ababi nubo baahwerekereziibwe hatali ensi yaitu. Nuha n’eka ye bakakiraho ensi obuyahwerekereziibwe kandi bagiikaramu hanyuma y’Okusandaara kw’Amaizi.​—Okubanza 8:15-18.

 Kusisanaho n’amaizi n’Okusandaara kw’Amaizi, okuhwerekerezebwa, rundi “omurro,” ogurukubazibwaho omu 2 Petero 3:7 nigwija kuhwerekereza abantu ababi, hatali ensi. Ruhanga n’araganiza “iguru erihyaka nensi empyaka” nambere haliba “okuhikirra.” (2 Petero 3:​13) “Ensi empyaka,” rundi abantu abahyaka, nibaija kulemwa “iguru erihyaka,” rundi obwebembezi obuhyaka obw’Obukama bwa Ruhanga. Hansi y’Obukama obu, ensi niija kufooka orugonjo orurungi orurumu obusinge bwingi.​—Okusuku’rwa 21:1-4.