Omu Baibuli, ekigambo “iguru” nikikozesebwa kumanyisa ebintu binu bisatu: (1) iguru eriturora; (2) ekiikaro eky’eby’omwoyo; hamu (3) n’akokurorraho ak’ekiikaro ekya haiguru muno. Ebintu binu byona nibyetegerezebwa kusigikirra ha kintu ekirukuba nikibazibwaho. a

1.   Iguru erirukurorwa. Hanu, ekigambo “iguru” nikimanyisa omu mwanya nambere omuyaga guteera, ebinyonyi bihuurukira, ebicu bikorra enjura n’ebirika, kandi nambere emirabyo y’enkuba eyakira. (Zabuli 78:26; Enfumo 30:19; Isaya 55:10; Luka 17:24) Ekindi, nikisobora kumanyisa ekiikaro nambere hali “izooba nokwezi nenyunyuzi.”—Ekyebiragiro 4:19; Okubanza 1:1.

2.   Ekiikaro eky’eby’omwoyo. Ekigambo “iguru” kyongera kimanyisa iguru ery’eby’omwoyo, rundi ekiikaro ekiikarwamu ekiri haiguru muno kukira iguru n’ensi ebirukurorwa. (1 Ekyabakama 8:27; Yohana 6:38) Iguru linu ery’eby’omwoyo liikarwamu Yahwe Ruhanga, anyakuli “Mwoyo” otwaliiremu na bamalaika be abayahangire. (Yohana 4:24; Matayo 24:36) Obwire obumu, “iguru” libazibwaho nk’omuntu arukukikirra bamalaika abesigwa, “isorrokaniro eryabahikiriire.”—Zabuli 89:5-7.

    Ekindi Baibuli ekozesa ekigambo “iguru” kumanyisa ekiikaro eky’eby’omwoyo kandi ekya haiguru muno nambere Yahwe aikara, ‘ekiikaro kye ekyokwikaramu.’ (1 Ekyabakama 8:43, 49; Abaheburaniya 9:24; Okusuku’rwa 13:6) Ekyokurorraho, Baibuli ekaranga ngu Sitaani na badaimoni be baakunagirwe kuruga omu iguru, batakyaikirizibwa kutaaha nambere Yahwe aikara. Baitu nabwo baakyali bihangwa eby’omwoyo.—Okusuku’rwa 12:7-9, 12.

3.   Akokurorraho ak’ekiikaro ekya haiguru muno. Ebyahandiikirwe bikozesa ekigambo “iguru” kukikiirra ekiikaro ekya haiguru kumanyisa obusobozi obw’okwebembera. Ekiikaro nk’eki kibamu:

   •   Yahwe Ruhanga nk’omulemi ow’Arukukirrayo kimu Obusobozi.—2 Abakolnso 32:20; Luka 15:21.

   •   Obukama bwa Ruhanga, gavumenti ey’erukwija kugaruka omu kiikaro ky’obulemi bw’abantu. Baibuli eyeta Obukama obu “iguru erihyaka.”—Isaya 65:17; 66:22; 2 Petero 3:13. b

   •   Abakristaayo abakyali omu nsi baitu abaine okunihira okw’okugenda omu iguru.—Abefeso 2:6.

   •   Gavumenti z’abantu ezehanikire haiguru kukira abantu abazirukulema.—Isaya 14:12-14; Danieri 4:20-22; 2 Petero 3:7.

   •   Emyoyo emibi kasumi kanu ey’erukulema ensi.—Abefeso 6:12; 1 Yohana 5:19.

Iguru nirisisana lita?

 Ekiikaro eky’eby’omwoyo kiri kiikaro ekirumu eby’okukora bingi. Kiikarwamu obukaikuru n’obukaikuru bw’ebihangwa eby’omwoyo “abakora [Yahwe] ebyagonza.”—Zabuli 103:20, 21; Danieri 7:10.

 Baibuli ebazaaho iguru nk’erirumu ekyererezi ekirukwangasana muno. (1 Timoseo 6:15, 16) Nabbi Ezekyeri akatunga okwolekwa okw’iguru erikaba lirumu “okwangasana,” baitu okwolekwa kw’iguru Danieri eriyaboine likaba lirumu “ekyambu kyomurro.” (Ezekyeri 1:26-28; Danieri 7:9, 10) Iguru niryera, lyecumi kandi lisemiire.—Zabuli 96:6; Isaya 63:15; Okusuku’rwa 4:2, 3.

 Omulingo gwonyini Baibuli ogw’esoborramu iguru niguhuniiriza muno. (Ezekyeri 43:2, 3) N’obukiraaba nukwo kiri, tikirukusoboka abantu kumanya kurungi iguru habwokuba titurukusobora kwetegereza obuhangwa obw’eby’omwoyo.