Baibuli Ebazaaho Ki Kubaza Endimi?

Eky’okugarukamu kuruga omu Baibuli

“Kubaza endimi” nikimanyisa omulingo gw’ekyamahano Abakristaayo ab’omu kyasa eky’okubanza baasoboire kubaza endimi ezindi batabandize kuzeega. (Engeso Ezabakwenda 10:46, New International Version) Abantu abakaba bamanyire orulimi orurukubazibwa bakasobora kwetegereza kurungi ebintu omuntu arukubaza. (Engeso Ezabakwenda 2:4-8) Kubaza endimi kyali kimu ha bisembo eby’omwoyo ogurukwera Ruhanga ekiyahaire bamu h’Abakristaayo ab’omu kyasa eky’okubanza.—Abaheburaniya 2:4; 1 Abakolinso 12:4, 30.

Nidi kandi ninkaha kubaza endimi obukwatandikire?

Kubaza endimi kyali ky’okuhikiiriza kigendererwa ki?

Kubaza endimi kyali ky’okwikaraho?

Kubaza endimi kukahwaho di?

Kasumi kanu Ruhanga nakyaha abantu obusobozi bw’okubaza endimi?

Kokukororraho ki akarukwoleka Abakristaayo ab’amananu?

Nidi kandi ninkaha kubaza endimi obukwatandikire?

Ekyamahano kinu kikabaho omu Yerusalemu omu bwire bwa nyenkyakara ha kiro kya Pentekote omwaka 33 Yesu Amazire Kuzaarwa. Abegeswa ba Yesu abarukuhika nka 120 abakaba besoroliize hamu “bona baijura omwoyo ogurukwera, nibabanza okubaza [endimi ezirukwahukana].” (Engeso Ezabakwenda 1:15; 2:1-4) Abantu baingi “abarugire omu mahanga gona aganyakuli hansi yiguru” bakesorooza hamu habwokuba “bakahurra omuomu nibabaza [endimi] zabu.”—Engeso Ezabakwenda 2:5, 6.

Kubaza endimi kyali ky’okuhikiiriza kigendererwa ki?

1. Kwoleka ngu Ruhanga akaba nasagika Abakristaayo. Kara, Ruhanga yakonyeraga abaheereza be abesigwa nka Musa, kwoleka ngu nabasagika. (Okuruga 4:1-9, 29-31; Okubara 17:10) Kubaza endimi kikaba nikyoleka ngu Ruhanga akaba nasagika ekitebe ekihyaka eky’Abakristaayo. Omukwenda Paulo akahandiika ati: “Endimi tubuli bwokurorraho hali abakuikiriza, baitu hali abatakuikiriza.”—1 Abakolinso 14:22.

2. Kukonyera Abakristaayo kuha obwakaiso. Abo abaahuliire abahondezi ba Kristo ha kiro kya Pentekote bakagamba ngu: “Itwe nitubahurra omu [ndimi] zaitu ebyamani ebya Ruhanga.” (Engeso Ezabakwenda 2:11) Ensonga endi habwaki Yahwe yakonyiire Abakristaayo kubaza omu ndimi nukwo abakonyere ‘kuha obwakaiso’ hamu ‘n’okuhindura abantu omu mahanga goona abegeswa,’ nk’oku Yesu yabaragiire. (Engeso Ezabakwenda 10:42; Matayo 28:19) Nk’abantu 3,000 abaarozere ekyamahano kandi baahuliiriza obwakaiso obwahairwe bakafooka begeswa ha kiro eki.—Engeso Ezabakwenda 2:41.

Kubaza endimi kyali ky’okwikaraho?

Nangwa. Ebisembo eby’omwoyo ogurukwera, otwaliremu n’okubaza endimi bikaba bya kacu kake. Baibuli ekaranga ngu: “Haraba haroho okuragura, kulihwaho; rundi endimi, ziriculera.”—1 Abakolinso 13:8.

Kubaza endimi kukahwaho di?

Abakristaayo baatungaga ekisembo eky’okubaza omu ndimi hanyuma y’abakwenda kubateekaho emikono. (Engeso Ezabakwenda 8:18; 10:44-46) Nikisobora kuba ngu abo abaatungire ekisembo eky’okubaza omu ndimi, batateekeho abandi emikono. (Engeso Ezabakwenda 8:5-7, 14-17) Ekyokurorraho, omukuru omu gavumenti n’asobora kuha omuntu license ey’okuvuga motoka, baitu naaba ataine busobozi obw’okugiha omuntu ondi. Omulingo nugwo gumu, abakwenda hamu naabo abaatungire ekisembo eki kuruga halibo obubafiire, kubaza endimi kukahwaho.

Kasumi kanu Ruhanga nakyaha abantu obusobozi bw’okubaza endimi?

Ekyamahano eky’okubaza endimi kikahwaho hakumalira okw’ekyasa eky’okubanza Yesu Amazire Kuzaarwa. Busaho muntu kasumi kanu asobora kugamba ngu nabaza endimi nakonyerwa omwoyo ogurukwera. a

Kokukororraho ki akarukwoleka Abakristaayo ab’amananu?

Yesu akagamba ngu okugonza okw’okwefeereza nukwo kakubaire kokurorraho ak’abahondezi be ab’amananu. (Yohana 13:34, 35) N’omukwenda Paulo akeegesa ngu okugonza kwakubaire kokurorraho akorutekerro hali Abakristaayo ab’amananu. (1 Abakolinso 13:1, 8) Akooleka ngu omwoyo ogurukwera gwakukonyiire Abakristaayo kukurakuraniza emiringo nk’okugonza.—Abagaratiya 5:22, 23.