Okujunwa Nikyo Kiki?
Eky’okugarukamu kuruga omu Baibuli
Ebigambo “kujuna” na “okujunwa” obwire obumu bikozesebwa abahandiiki ba Baibuli kwihayo amakuru g’omuntu ow’ajunirwe kuruga omu kabi rundi omu kuhwerekerra. (Okuruga 14:13, 14; Engeso Ezabakwenda 27:20) Baitu emirundi erukukira obwingi, ebigambo binu bimanyisa okujunwa kuruga omu kibi. (Matayo 1:21) Nk’oku okufa kuleetwa ekibi, abantu abajunirwe kuruga omu kibi baba baine okunihira okw’okwomeera ebiro n’ebiro.—Yohana 3:16, 17. a
Kiki ekisobora kutukonyera kujunwa?
Kusobora kujunwa, osemeriire kwikiririza omuli Yesu kandi oyoleke okwikiriza oku kuraba omu kworobera ebiragiro bye.—Engeso Ezabakwenda 4:10, 12; Abarumi 10:9, 10; Abaheburaniya 5:9.
Baibuli eyoleka ngu osemeriire kuba n’ebikorwa eby’obwebundaazi kukigumya ngu okwikiriza kwawe kwomeezi. (Yakobo 2:24, 26) Baitu, kinu tikirukumanyisa ngu nosobora kutunga okujunwa. Kiri “kisembo kya Ruhanga” ekisigikirra ha mbabazi ze ezitatusemeriire.—Abefeso 2:8, 9.
Nikisoboka kulemwa kutunga okujunwa?
Ego. Nk’oku omuntu ow’ajunirwe kutadikira omu maizi nasobora kwongera akagagwamu, omuntu ow’ajunirwe kuruga omu kibi baitu akalemwa kwikara nayoleka okwikiriza nasobora kulemwa kutunga okujunwa. Egi niyo ensonga habwaki Baibuli etererra Abakristaayo abatungire okujunwa “okurwana muno obwokuikiriza.” (Yuda 3) Eyongera etererra abo abajunirwe eti: “Muhikirizege okujunwa kwanyu inywenka omu kutina nokutukumira.”—Abafiripi 2:12.
Omujuni noha—Ruhanga rundi Yesu?
Baibuli ebazaaho Ruhanga nk’endugirro ey’erukukirrayo kimu ey’okujunwa, emirundi erukukira obwingi emweta “Omujuni.” (1 Samuiri 10:19; Isaya 43:11; Tito 2:10; Yuda 25) Kwongerraho, Ruhanga akakozesa abasaija abarukwahukana kujuna ihanga lya Isaleri erya kara, kandi abasaija abo Baibuli ebeeta “abajuni.” (Nehemiya 9:27; Ekyabacwi 3:9, 15; 2 Kyabakama 13:5) b Omu mulingo nugwo gumu, nk’oku Ruhanga atuha okujunwa kuraba omu kicunguro kya Yesu, Baibuli ebazaaho Yesu ‘nk’Omujuni.’—Engeso Ezabakwenda 5:31; Tito 1:4. c
Buli omu alijunwa?
Nangwa, abantu abamu tibalijunwa. (2 Abasesalonika 1:9) Yesu obubaamukagwize, “Abanyakujunwa bake?” akabagarukamu ati: “Mwekambe okutaha omu irembo erifunzire: baitu nimbagambira nti baingi abaliserra okutahamu, tibalisobora.”—Luka 13:23, 24.
Ebisuba ebirukukwata ha kujunwa okw’ensi yoona
Ekisuba: Omu 1 Abakolinso 15:22 nihabazaaho okujunwa okw’ensi yoona obu nihagamba ngu “omu Kristo bona balyomezebwa.”
Amananu: Enkarra ezetoroire orukarra runu nizibazaaho okuhumbuuka. (1 Abakolinso 15:12, 13, 20, 21, 35) Nahabweki ebigambo “omu Kristo bona balyomezebwa” nibimanyisa ngu abo boona abaraaba bahumbuukire nibaija kutunga omugisa kuraba omu Kristo Yesu.—Yohana 11:25.
Ekisuba: Omu Tito 2:11 nihabazaaho okujunwa okw’ensi yoona obu nihagamba ngu Ruhanga ‘naleetera abantu boona okujunwa.’
Amananu: Ekigambo eky’Oruyonaani ekihindurwa “bona” omu rukarra runu nikisobora n’okumanyisa “buli kintu rundi ebintu ebirukwahukana.” d Nahabweki, enyetegereza ey’ehikire ey’ekyahandiikirwe ekya Tito 2:11 niyo ngu Ruhanga alesereho okujunwa hali abantu boona otwaliiremu abantu kuruga “omu mahanga gona, nenganda, nabantu, nendimi.”—Okusuku’rwa 7:9, 10.
Ekisuba: Omu 2 Petero 3:9 nihabazaaho okujunwa okw’ensi yoona obu nihagamba ngu Ruhanga “tarukugonza omuntu wena [okuhwerekerezebwa].”
Amananu: Ruhanga nagonza abantu kujunwa, baitu tabahambiriza kwikiriza enteekaniza ye ey’okujunwa. “Ekiro [kye] kyomusango” kiritwarramu “nokuhwerekerezebwa okwabantu abatarukutina Ruhanga.”—2 Petero 3:7.
a Baibuli ebazaaho omuntu kuba ajunirwe n’obukiraaba ngu okujunwa kwe kwonyini okw’okuruga omu kibi n’okufa tikukahikire.—Abefeso 2:5; Abarumi 13:11.
b Omu nkarra ezibaziibweho, empindura ezimu zikozesa ebigambo “omukuru,” “omujuni,” “emanzi,” “omwebembezi,” rundi “omuntu” omu kiikaro ky’okukozesa “omujuni.” Baitu, omu bigambo by’Oruheburaniya eby’okubanza eby’omu Baibuli, ekigambo nikyo kimu kikozesebwa hali abantu banu abajuni nk’oku kikozesebwa ahandi obukiba nikibazaaho Ruhanga nk’Omujuni.—Zabuli 7:10.
c Ibara Yesu liihwa omu ibara ery’Oruheburaniya Yehoh·shuʹaʽ, ekirukumanyisa “Yahwe Nuwe Okujunwa.”
d Rora Vine’s Complete Expository Dictionary of Old and New Testament Words. Ekigambo nikyo kimu eky’Oruyonaani kibazibwaho omu Matayo 5:11, ekibazaaho ebigambo bya Yesu ngu abantu baakugambire “ebigambo ebibi byona” hali abahondezi be.
Nosobora Kugonza na Binu;
EBY’OKUGARUKAMU EBY’EBIKAGUZO EBIRUKUKWATA HA BAIBULI
Ekihongwa kya Yesu Kiri Kita ‘Kicunguro Habwa Baingi’?
Ekicunguro kijuna kita abantu kuruga omu kibi?
EBY’OKUGARUKAMU EBY’EBIKAGUZO EBIRUKUKWATA HA BAIBULI
Baibuli Eyegesa ngu ‘Omuntu obw’Ajunwa aba Ajunirwe Ebiro n’Ebiro’?
Yesu akaha ekyokurorraho ekirukugarukamu ekikaguzo eki.
ENYEGESA ZA BAIBULI ENKURU
Habwaki Yesu Yafiire?
Baibuli n’ebazaaho obukuru bw’okufa kwa Yesu. Okufa kwe kukaba n’ekigenderwa?
ENYEGESA ZA BAIBULI
Saba Kwegesebwa Baibuli
Tandika kwega Baibuli n’omwegesa owaawe ha bwawe otarukusasura sente.