Busaho muntu wena amanyire nk’oku Yesu yasisanaga habwokuba Baibuli terukukibazaaho. Kinu nikyoleka ngu omulingo yasisanaga tikiri kikuru. Baitu nabwo, Baibuli etuha ekisisani ha mulingo yazookamuga.

•   Enzooka: Yesu akaba ali Muyudaaya, kandi nikisobora kuba ngu akatwara enyetwaza y’Ekiyudaaya eya nyina. (Abaheburaniya 7:14) Nikisobora kuba ngu akaba ataine mbaganiza yoona n’abantu abandi ha maiso. Haroho obuyarugire Galiraya yagenda Yerusalemu omu nsita batamumanyiriire. (Yohana 7:10, 11) Kandi nikisobora kuba ngu akaba atali w’embaganiza muno ha begeswa be abamwikaraga haihi. Noijuka ngu Yuda Isikalyota akaba aine kukonyera abasaija abaali baine eby’okurwanisa kumayirra Yesu obu baali baizire kumukwata.—Matayo 26:47-49.

•   Oburaiha bw’isoke: Tikirukunihirwa ngu Yesu akaba aine isoke eriraihire habwokuba Baibuli egamba ngu “isoke eriraihire kiba kyensoni [ha musaija].”—1 Abakolinso 11:14.

•   Omuleju: Yesu akaba aine omuleju. Yahonderaga ebiragiro by’Ekiyudaaya, ebyatangaga abasaija ‘kusiisa embaju z’omuleju gwabo.’ (Ebyabalevi 19:27; Abagaratiya 4:4) Ekindi, Baibuli ebazaaho omuleju gwa Yesu mu bunabbi oburukukwata ha kubonabona kwe.—Isaya 50:6.

•   Ekyemerro: Byona ebitusomaho byoleka ngu Yesu akaba ali musaija w’amaani. Omu buheereza bwe, yarubataga engendo eziraihire. (Matayo 9:35) Haroho obuyasemiize Yekaru emirundi ebiri obu nabiingamu abaahingisaaga sente, n’ebisoro n’akozesa enkoba. (Luka 19:45, 46; Yohana 2:14, 15) Ekitabu ekirukwetwa McClintock and Strong’s Cyclopedia nikigamba ngu : “Byona ebiri omu bitabu by’Enjiri nibyoleka ngu [Yesu] akaba musaija w’ekyemerro kandi aine amaani.”—Volume IV, orupapura 884.—Volume IV, orupapura 884.

•   Enzooka ye ha maiso: Yesu akaba aine okugonza n’embabazi, kandi eki kyayeyolekeraga omu bintu ebiyakoraga. (Matayo 11:28, 29) Abantu aba buli mulingo bagonzaaga abakonyere kandi abahuumuze. (Luka 5:12, 13; 7:37, 38) Abaana nabo bagonzaaga kuba na Yesu.—Matayo 19:13-15; Marako 9:35-37.

 Ekitahikire: Abantu abamu bagamba ngu Yesu akaba naruga omu Africa habwokuba ekitabu ky’Okusuku’rwa kirengesaniza isoke lye n’ebyoya by’entaama kandi ngu ebigere bye nibisisana “nkomulinga gwomuherre.”—Okusuku’rwa 1:14, 15.

 Ekihikire: Ekitabu ky’Okusuku’rwa kihandikiirwe omu mulingo gw’obwokurorraho. (Okusuku’rwa 1:1) Isoke n’ebigere bya Yesu ebikurubazibwaho hanu omu mulingo gw’akokurorraho byoleka emiringo ya Yesu hanyuma y’okuhumbuuka kwe, baitu hatali omulingo yasisanaga obw’akaba ali omu nsi. Obuhaba nihabazaaho Yesu, Okusuku’rwa 1:14 nihagamba ngu: “Omutwegwe nisoke bikaba nibyera nkebyoya byentama okubirukwera.” Ekyahandiikirwe kinu kibazaaho erangi hatali omulingo isoke lye likozerwemu. Ekirukwoleka ngu aine amagezi habwemyaka eyamazire. (Okusuku’rwa 3:14) Orukarra runu tirurukulengesaniza omulingo isoke lya Yesu likozirwe nk’ebyoya by’entaama baitu nirulengesaniza erangi y’isoke lye n’erangi y’ebyoya by’entaama rundi ebirika.

 Ebigere bya Yesu byali nibisisana “nkomulinga gwomuherre, ogusemeziibwe omu murro.” (Okusuku’rwa 1:15) Ekindi, obuso bwe “buli nkizoba okulijwa omu mani galyo.” (Okusuku’rwa 1:16) Habwokuba busaho bantu abaine erangi y’omubiri erukubazibwaho hanu, nikyoleka ngu okwolekwa kuno mali kw’akokurorraho, nikwoleka Yesu amazire kuhumbuuka nk’ogwo “aikaliire omu musana ogutarukuirrwa haihi.”—1 Timoseo 6:16.

 Ekitahikire: Yesu akaba ali muceke kandi mutiini.

 Ekihikire: Yesu akaba atali mutiini. Ekyokurorraho, obu baali nibagonza kumukwata, n’obumanzi akabagambira ngu nuwe baali nibaserra. (Yohana 18:4-8) Yesu n’asobora kuba akaba aine amaani habwokuba yakoraga nk’omubaizi, omulimo ogwayetagisaaga amaani.—Marako 6:3.

 Baitu, habwaki Yesu yali nayetaaga obukonyezi kuhimba omuti ogubaali nibagenda kumuhanikaho? Kandi habwaki nuwe yabandize kufa, abandi abaakaba ahanikirwe nabo batakafiire? (Luka 23:26; Yohana 19:31-33) Yesu obw’akaba ali haihi kwitwa, omubiri gwe gwali guhoiremu amaani. Akamara ekiro kyona atabyamire, obundi habw’obusaasi obw’akaba aine omu mutima. (Luka 22:42-44) Ekiro, Abayudaaya abaali bamukwasire bakamubonabonesa, kandi ekiro ekyayongiireho nyenkyakara Abarooma n’abo bakamubonabonesa. (Matayo 26:67, 68; Yohana 19:1-3) Ebintu binu nibyo bisobora kuba byaletiire Yesu kufa bwangu.

 Ekitahikire: Yesu akaba ataseka rundi kusemererwa.

 Ekihikire: Yesu akooleka emiringo ya Ise ow’omu iguru, Yahwe, Baibuli owebazaaho nka “Ruhanga anyakusemeriirwe.” (1 Timoseo 1:11, “NWT”; Yohana 14:9) Yesu yayegesaaga abantu omulingo basobora kutungamu okusemererwa. (Matayo 5:3-9; Luka 11:28) Bunu bwona bwakaiso oburukwoleka ngu Yesu yasemererwaga.