Nk’Oku Yahandiikirwe Luka 10:1-42
10 Hanyuma y’ebi, Yesu yakoma abandi 70 yabatuma babiri-babiri kumwebembera kugenda omu buli rubuga n’omu buli kiikaro nambere akaba naija kugenda.
2 Hanyuma yabagambira ati: “Eby’okugesa bingi, baitu abakozi bake. Nahabweki, musabe Mukama w’okugesa asindike abakozi omu mulimo gw’okugesa.”
3 Mugende. Dora, nimbatuma nk’entaama eziri omu nyamaiswa* ezirukutaagura.
4 Mutatwara ensaho eza sente rundi ensaho ez’okutwarramu ebyokulya, n’obu zaakuba enkaito, kandi mutaramukya omuntu weena ou muratangatangana omu muhanda.
5 Enju yoona ei murataahamuga, mubanze mugambe muti: “Obusinge bube omu nju enu.”
6 Kandi obu haraabaga harumu munywani w’obusinge, obusinge bwanyu bube na uwe. Baitu obu araabaga atarumu, buligaruka nambere muli.
7 Mwikale omu nju egi, mulye kandi munywe ebintu ebirabaheebwa habwokuba omukozi asemeriire kuheebwa empeera ye. Mutaikara nimuruga omu nju emu nimugenda hali endi.
8 Ekindi, orubuga rwona oru murataahamuga kandi abantu bakabatangirra, mulye ebi baraabahaga,
9 mukize abarwaire abarumu kandi mubagambire muti: “Obukama bwa Ruhanga bwiriire haihi na inywe.”
10 Baitu orubuga rwona oru murataahamuga kandi bakanga kubatangirra, mugende ha nguudo zaarwo mugambe muti:
11 “N’ecuucu kuruga omu rubuga rwanyu enyakukwatiire ha bigere byaitu, twagibaterraterra. Baitu nabwo mukimanye ngu ‘Obukama bwa Ruhanga bwiriire haihi.’
12 Nimbagambira nti, ha kiro eki, ekifubiro ekiriheebwa orubuga oru, kiriba ky’amaani kukira ekiriheebwa Sodomu.
13 “Zirikubona iwe Korazini! Zirikubona iwe Betesaida! habwokuba ebyamahano ebyakozerwe owanyu kakuba byakozerwe omu Tuuro na Sidoni, baakubaire begarukiremu ira, baikaliire omu iju bajwaire ebitengo.
14 Kandi ekifubiro ekiribaheebwa, kiriba ky’amaani kukira ekya Tuuro na Sidoni.
15 Kandi iwe Kaperenaumu, olinyumizibwa kuhika omu iguru? Olisirimurwa omu kituuro.
16 “Weena anyakubahuliiriza, aba ahuliriize nyowe. Weena anyakubanga, aba ayangire nyowe. Kandi weena ayanga nyowe, aba ayangire ogu ayantumire.”
17 Hanyuma 70 baagaruka basemeriirwe muno, nibagamba bati: “Mukama waitu, daimooni nazo nizitworobera obu tukozesa ibara lyawe.”
18 Nubwo Yesu yabagambira ati: “Nindora Sitaani agwire nk’omurabyo kuruga omu iguru.
19 Dora! Mbahaire obusobozi obw’okurubatirra enjoka, n’enge n’okusingura amaani goona ag’omunyanzigwa, kandi busaho kintu kyona ekiribahikyaho akabi.
20 Baitu nabwo, mutasemererwa ngu habwokuba emyoyo emibi n’ebahuliiriza, oihireho, musemererwe habwokuba amabara ganyu gahandiikirwe omu iguru.”
21 Omu saaha egi, Yesu yasemererwa omu mwoyo ogurukwera, yagamba ati: “Ninkukugiza omu rwijwire Isenyowe, Mukama ow’iguru n’ensi habwokuba ebintu binu okabisereka ab’amagezi n’abeegesiibwe, baitu wabisukurra abaana abato. Ai Isenyowe, habwokuba nukwo wasiimire oti.
22 Isenyowe ampaire ebintu byona kandi busaho n’omu amanyire kurungi Omwana, oihireho Ise; kandi busaho n’omu amanyire kurungi Ise, oihireho Omwana, n’ogu Omwana ow’aba agondeze kumumanyisa.”
23 Hanyuma yahinduka yagambira abegeswa be omu nsita ati: “Baine okusemererwa abantu abarukurora ebintu ebi murukurora.
24 Nimbagambira nti, banabbi n’abakama baingi bakegomba kurora ebintu inywe ebi murukurora, baitu batabirole, n’okuhurra ebintu inywe ebi murukuhurra, baitu batabihurre.”
25 Omusaija ow’akaba amanyire kurungi ebiragiro yayemerra kumulenga, yamukaguza ati: “Omwegesa omurungi, nsemeriire kukora ki kugwetwa obwomeezi obutahwaho?”
26 Yesu na uwe yamukaguza ati: “Ebiragiro bigamba ki? Osoma ota?”
27 Omusaija yamugarukamu ati: “‘Osemeriire kugonza Yahwe Ruhanga waawe n’omutima gwawe gwona, n’obwomeezi bwawe bwona, n’amaani gaawe goona, n’ebiteekerezo byawe byona,’ kandi ‘ogonzege mutaahi waawe nk’oku oyegonza wenka.’”
28 Yesu yamugambira ati: “Ogarukiremu kurungi, ikara nobikora, kandi noija kutunga obwomeezi.”
29 Baitu habw’okugonza kwoleka ngu ahikire, omusaija ogu yakaguza Yesu ati: “Mali mutaahi wange nuwe oha?”
30 Yesu yamugarukamu ati: “Omusaija akaba naasirimuka naaruga Yerusalemu naagenda Yeriko kandi yagwa omu basuma, abaamujwiremu engoye, baamuteera hanyuma baayegendera, baamusiga naahoijahoija.
31 Baitu kyabaho ngu, omu bwire obu nyakatagara akaba naasirimuka naaraba omuhanda ogu, obu yamurozere, yacwanganiza yagendera harubaju orundi orw’omuhanda yamurabaho.
32 Omulevi na uwe, obu yahikire omu kiikaro eki yamurora, na uwe yacwanganiza yagendera harubaju orundi orw’omuhanda yamurabaho.
33 Baitu Omusamaliya obu akaba naaraba omuhanda ogu, obu yamuhikireho, yamurora, yamukwatirwa embabazi.
34 Yagenda nambere ali, yaseesa amagita n’amaarwa ha bihuta bye kandi yabisemba. Hanyuma yamutembya ha kisoro kye, yamuleeta nambere abagenyi baraara, yamujanjaba.
35 Ekiro ekyahondiireho, yakwata dinaali ibiri yaziha arukurolerra ekiikaro ky’abagenyi, kandi yamugambira ati: ‘Murwaze, ezindi zoona ezi orakozesa, ndazikusasura obu ndagaruka.’
36 Omu kurora kwawe, omu bantu banu basatu, nooha yabaire mutaahi w’omusaija ayagwire omu basuma?”
37 Yagarukamu ati: “Ogu ayamukwatiirwe embabazi.” Nubwo Yesu yamugambira ati: “Genda okole ekintu nikyo kimu.”
38 Obu bakaba nibagenda, yataaha omu kyaro ekimu. Obu yahikireyo, omukazi arukweta Maliza yamutangirra omu nju ye nk’omugenyi.
39 Maliza akaba aine munyaanya arukwetwa Malyamu, ayaikaliire haihi n’ebigere bya Mukama waitu, yahuliiriza ebi akaba naabaza.
40 Baitu Maliza uwe akahugurwa emirimo nyingi ei akaba naakora. Yaija hali Yesu yamugambira ati: “Mukama wange, torukukwatwaho kurora munyaanya nyowe aikaliire aho andekiire emirimo enu yoona nyenka?” Mugambire aije ankonyereho.”
41 Mukama waitu yamugarukamu ati: “Maliza, Maliza, oyetuntwire kandi notalibana n’ebintu bingi.
42 Ebintu bike rundi kimu, nibyo birukwetaagwa. Malyamu uwe akomeremu omugabo omurungi kandi tigurukwija kumwihwaho.”
Obugambo Obuli Hansi
^ N’oku kiri, “engagya.”
