Nk’Oku Yahandiikirwe Luka 12:1-59
-
Ekitumbisa ky’Abafalisaayo (1-3)
-
Tiina Ruhanga, hatali abantu (4-7)
-
Kwatura Kristo (8-12)
-
Orufumo rw’omusaija omuguuda omudomadoma (13-21)
-
Muleke kweralikirra (22-34)
-
Igana erike (32)
-
-
Kwikara bulindaara (35-40)
-
Omukeeto omwesigwa hamu n’omukeeto ow’atali mwesigwa (41-48)
-
Ntaije kuleeta obusinge baitu okwebaganizaamu (49-53)
-
Kwetegereza obwire (54-56)
-
Kumaraho obutetegerezangana (57-59)
12 Omu kasumi ako, enkumi n’enkumi z’abantu obu bakaba besoroize hamu, baahika n’okutandika kurubatangana, Yesu yatandika kubaza n’abegeswa be ati: “Mwerinde ekitumbisa ky’Abafalisaayo, kandi obu nubwo obugobya.
2 Baitu busaho kintu ekiserekerwe n’obwegendereza, ekitalizoorwa, kandi busaho kintu eky’ensita ekitalimanywa.
3 Nahabweki, kyona eki mubaza omu mwirima, kirihulirwa omu kyererezi, kandi ebi mubaza omu bihwa muli omu kisiika inywenka, biritebezebwa ha nju eruguru.
4 Baitu inywe banywani bange nimbagambira nti, mutatiina abo abaita omubiri, kandi hanyuma y’eki, busaho kintu ekindi kyona eki basobora kukora.
5 Baitu leka mbagambire ou musemeriire kutiina: Mutiine ogu hanyuma y’okwita, aine n’obusobozi obw’okunaga omu Gehena.* Mananu kwo nimbagambira nti, Ogu nuwe mutiine.
6 Ebisirya* bitaano tibigurwa obunusu bubiri obw’omuhendo mutaito? Baitu busaho na kimu hali byo Ruhanga eki ayebwa.
7 N’isoke erya ha mutwe gwanyu lyona libazirwe. Nahabweki mutatiina, inywe muli b’omuhendo muno okukira ebisirya bingi.
8 “Nimbagambira nti, ogu weena ow’agamba ngu ammanyire omu maiso g’abantu, Omwana w’omuntu na uwe aligamba ngu amumanyire omu maiso ga bamalaika ba Ruhanga.
9 Baitu ogu weena ow’anyehakana omu maiso g’abantu, na nyowe ndimwehakana omu maiso ga bamalaika ba Ruhanga.
10 Kandi weena ow’abazaaho kubi Omwana w’omuntu aliganyirwa, baitu weena ow’ajuma omwoyo ogurukwera, taliganyirwa.
11 Obu balibaleeta omu nkurato z’abantu, hali abalemi abakuru hamu n’ab’obusobozi, mutalyeralikirra ha mulingo muraabaza rundi eki muraabaza kwetonganaho,
12 habwokuba omwoyo ogurukwera gulibeegesa eby’okubaza omu kaire ako.”
13 Hanyuma omu h’abantu kuruga omu kitebe ky’abantu yamugambira ati: “Mwegesa, gambira mugenzi wange abagane na nyowe obugwetwa bwaitu.”
14 Yesu yamugambira ati: “Musaija, nooha yankomere kuba mucwi w’emisango rundi ow’okubabaganirizaamu ebintu byanyu?”
15 Hanyuma yabagambira ati: “Mwikale nimurora kandi mwerinde omururu ogwa buli mulingo, habwokuba omuntu n’obu arukuba aine ebintu bingi, obwomeezi bwe tibusigikirra ha bintu ebi aba aine.”
16 Nubwo yabacwera orufumo runu ati: “Omusiri gw’omuguuda gukeeza muno.
17 Yatandika kuteekereza ati: ‘Hati nkole ki, nk’oku ntaine ah’okwahura ebirimwa byange?’
18 Hanyuma yagamba ati: ‘Kinu nikyo ndaakora; ndaseesa enguli zange, nyombeke enkooto kandi oku nuho ndayahura engano yange yoona, n’ebintu byange,
19 kandi ndayegambira nti, oine ebintu bingi ebirungi ebi oyeyahuliire ebiraamara emyaka nyingi; huumura, olye, onywe, wegonze.”’
20 Baitu Ruhanga yamugambira ati: ‘Mudoma we iwe, kiro kinu omu bwire bw’ekiro nibaija kukwihaho obwomeezi bwawe. Hati, ebintu ebi oyahwire, biraaba byoha?’
21 Nukwo kiriba kiti ha muntu anyakweyahurra itungo baitu atali muguuda omu maiso ga Ruhanga.”
22 Hanyuma yagambira abegeswa be ati: “Egi niyo ensonga habwaki nimbagambira nti, muleke kweralikirra obwomeezi bwanyu habw’eki muraalya rundi ebirukukwata ha mibiri yanyu ngu murajwara ki.
23 Habwokuba obwomeezi bw’omuhendo kukira ebyokulya, kandi n’omubiri gw’omuhendo kukira ebyokujwara.
24 Muteekerezeeho ebingoora: Tibisiga embibo n’obukwakuba kugesa; tibiine amaahurro n’obu zaakuba enguli, baitu Ruhanga abiriisa. Inywe timuli b’omuhendo muno kukira ebinyonyi?
25 Nooha omuli inywe habw’okwetuntura, asobora kwongera ha bwomeezi bwe akacweka akataito?*
26 Nahabweki obu muraaba mutarukusobora kukora ekintu ekitaito nk’eki, habwaki mweralikirra habw’ebintu ebindi?
27 Tekerezaaho omulingo amaranga gakura: Tigatalibana kandi tigaruka engoye; baitu nimbagambira nti, n’obu yaakuba Suleimani omu kitiinisa kye atajwale kurungi kwingana limu hali go.
28 Ruhanga obu araaba nukwo ajweka ebimera eby’omu kisaka kandi nyenkya bikokebwa omu murro, tarukwija kukiraho kubajweka, inywe abaine okwikiriza okuke!
29 Nahabweki muleke kweralikirra* eki muraalya, rundi eki muraanywa kandi muleke kwikara mwetuntwire;
30 ebintu binu byona abamahanga nibyo barukwekamba kuserra, baitu Isiinywe akimanyire ngu ebintu ebi nimubyetaaga.
31 Oihireho mwikale nimuserra Obukama bwe, kandi ebintu ebi biribongerwaho.
32 “Mutatiina inywe igana erike, habwokuba Isiinywe acwiremu kubaha Obukama.
33 Mutunde ebintu byanyu kandi mugabire abali omu bwetaago. Mwekorre ensaho za sente ezitarukukura, eky’obuguuda ekitarukuhwaho omu iguru, nambere omusuma atasobora kuhika, kandi nambere ebihuka bitasobora kukisiisa.
34 Habwokuba nambere eby’obuguuda byanyu biri, nuho n’emitima yanyu eba.
35 “Mwikale mujwaire, kandi mweteekanize, kandi mwikaze etaara zanyu nizaaka,
36 kandi mube nk’abasaija abalindiriire Mukama wabo kugaruka kuruga ha bugenyi obw’okuswera, nukwo obu araija akateera kodi, ahonaaho bamukingurreho.
37 Baine okusemererwa abairu abo, mukama wabo obu aliija, akasanga nibarora. Mananu kwo nimbagambira nti, alijwara ebijwaro eby’okuheererezaamu, abaikalize ha meeza kandi abaheereze.
38 Kandi kakuba aija omu kisisimuka ekya kabiri, n’obu kyakuba ekya kasatu akabasanga nibarora, abairu abo baine okusemererwa.
39 Baitu mumanye kinu, kakuba mukama w’enju yamanyire akasumi omusuma yakwiziiremu, tiyakulekere enju ye omusuma kugicwa, akagitaahamu.
40 Na inywe mwikale mweteekaniize, habwokuba omu kasumi akamutarukunihira, Omwana w’omuntu nuko aliiziramu.”
41 Hanyuma Petero yamukaguza ati: “Mukama wange, orufumo runu norugambira itwe itwenka rundi n’abantu abandi boona?”
42 Mukama waitu yagamba ati: “Nooha mali omukeeto omwesigwa kandi ow’amagezi, mukama we ow’alikoma kwikara naaha abaheereza be ebyokulya ebirukumara omu kasumi akahikire?
43 Aine okusemererwa omwiru ogu, mukama we obu aliija akasanga naakikora!
44 Mananu kwo nimbagambira nti, alimukwasa ebintu bye byona.
45 Baitu kakuba omwiru ogu agamba omu mutima gwe ati, ‘Mukama wange akereriirwe kwija,’ kandi akatandika kuteera abairu n’abazaana, n’okulya n’okunywa kandi akatamiira,
46 mukama we aliija ha kiro omwiru ogu eki atarukumunihirramu, n’omu saaha atarukumanya kandi alimufubira muno kandi amuteeke hamu n’abatali besigwa.
47 Hanyuma omwiru ayayetegeriize mukama we eki arukugonza akole baitu tiyayeteekaniza rundi kukora eki yamuragiire, aliteerwa emiigo nyingi.
48 Baitu ogu atarayetegeriize kandi yakora ebintu ebisemeriire kumuteeza, aliteerwa emiigo nke. Mali weena ayahairwe bingi, alisabwa bingi, kandi ogu ayakwasiibwe bingi, alisabwa ebirukukiraho.
49 “Nkaija kuhemba omurro omu nsi, hati kiki ekindi eki ndukugonza obu guraaba gumazire kwaka?
50 Mali nyine okubatizibwa oku ndukugenda kubatizibwamu, kandi nyetuntwire muno kuhikya obu kulihwa!
51 Nimuteekereza nkaija kuleetaho obusinge omu nsi? Nangwa, nimbagambira nti, ntaije kubuleeta, oihireho kubaganizaamu.
52 Kuruga hati, abantu bataano abali omu nju emu balyebaganizaamu, basatu baalihakaniza babiri kandi babiri baalihakaniza basatu.
53 Balyebaganizaamu, ise mwana alihakaniza mutabani we, n’omutabani ahakanize ise, omukazi alihakaniza muhara we, n’omuhara ahakanize nyina, nyinazaara ahakanize mukamwana, n’omukamwana ahakanize nyinazaara.”
54 Hanyuma yagambira ekitebe ky’abantu ati: “Obu murora ekicu nikiimuka omu bugwaizooba, ahonaaho mugamba muti, ‘Enjura ey’amaani n’egenda kugwa,’ kandi egwa.
55 Kandi obu murora omuyaga omu bukiizi bw’emoso niguteera, mugamba muti, ‘Nihaija kubaho ekirro eky’amaani,’ kandi nukwo kiba kiti.
56 Bagobya inywe! mumanyire kweteegereza enzooka y’ensi n’iguru, baitu habwaki mutamanyire kweteegereza akasumi kanu?
57 Habwaki mutasobora n’okucwamu eky’okuhikirra?
58 Ekyokurorraho, obu muraaba muli omu muhanda, oli n’ogu arukukujunaana nimugenda omw’omulemi, lengaho kumaraho obuteetegerezangana omu muhanda, nukwo atakutwara hali omucwi w’emisango, n’omucwi w’emisango akakuhayo hali omuserikale, kandi n’omuserikale akakuteeka omu nkomo.
59 Mananu kwo ninkugambira nti, tolirugayo kuhikya omazire kusasura akasente kaawe koona.”
Obugambo Obuli Hansi
^ Ekiikaro ekikaba kiri aheeru ya Yerusalemu nambere baayokezaaga kasasiro.
^ Ebisirya buba obunyonyi obutaito.
^ Nk’oku kiri, “omukono.” Rora, Kusoborra Ebigambo.
^ Nk’oku kiri, “muleke kuserra.”
