Nk’Oku Yahandiikirwe Luka 14:1-35
-
Omusaija ow’arwaire oburwaire obumuleetera kuzimba emikono n’amaguru akizibwa ha Sabbiti (1-6)
-
Ba mugenyi omwebundaazi (7-11)
-
Raaliza abo abatasobora kukusasura (12-14)
-
Orufumo rw’abagenyi abaaraaliziibwe baitu baayekwasakwasa (15-24)
-
Ebintu omuntu ebi ayefeereza kufooka mwegeswa wa Yesu (25-33)
-
Ekisura ekihwamu obunuzi bwakyo (34, 35)
14 Omurundi ogundi, Yesu akagenda kulya ekiihuro omu nju y’omu h’abebembezi b’Abafalisaayo ha kiro kya Sabbiti, kandi baamwikazaaho amaiso.
2 Kandi dora! omu maiso ge hakaba haroho omusaija arwaire oburwaire obukaba bumuleetiire kuziimba emikono n’amaguru.
3 Yesu yakaguza abo abamanyire kurungi Ebiragiro n’Abafalisaayo ati: “Kihikire omu biragiro kukiza omuntu ha kiro kya Sabbiti rundi nangwa?”
4 Baitu baikara baculiire. Nubwo yakwataho omusaija ogu, yamukiza kandi yamugambira agende.
5 Yabakaguza ati: “Nooha omuli inywe kakuba omwana we rundi enimi ye egwa omu iziba, atasobora kumwihamu rundi kugiihamu ha kiro kya Sabbiti?”
6 Eki batasobole kukigarukamu.
7 Obu yarozere abasaija abakaba baraaliziibwe nibekomeramu ebiikaro eby’omu maiso, yabacwera orufumo naagamba ati:
8 “Omuntu obu akuraaliza ha bugenyi, otaliikarra omu biikaro eby’omu maiso. Obundi haroho omuntu ondi ow’ekitiinisa kukukira anyakuraaliziibwe.
9 Hanyuma, ogu anyakubaraaliize naija kwija akugambire ati: ‘Leka omusaija onu aikarre omu kiikaro eki oikaliiremu.’ Obu nubwo oragenda oikarre omu kiikaro ekirukumalirrayo enyuma omazire n’okuswara.
10 Baitu omuntu obu akuraaliza, genda oikarre omu kiikaro eky’okumalirrayo enyuma. Ogu anyakukuraaliize obu araija, arakugambira ati: ‘Munywani wange, genda oikarre omu maiso. Obu nubwo abagenyi abandi abaraaliziibwe barakutamu ekitiinisa.
11 Habwokuba ogu weena ayenyumiza wenka,* alibundaazibwa, kandi ogu weena ayebundaaza, alinyumizibwa.”
12 Hanyuma, yagambira omusaija ow’akaba amuraaliize ati: “Obu orateekanizaaga ekiihuro ekya nyamusana rundi ekya rwebagyo, otaraaliza banywani baawe, bagenzi baawe, abanyabuzaale baawe, rundi abataahi baawe abaguuda. Habwokuba na bo nibasobora kukuraaliza, kikazooka ngu baliyo nibakusasura.
13 Baitu obu orateekaniza ekiihuro, raaliza abanaku, abazingamire, abalema, n’abafu b’amaiso;
14 kandi noija kutunga okusemererwa habwokuba tibaine kyona eki barakuha kukusasura, baitu olisasurwa omu kuhumbuuka kw’abahikiriire.”
15 Omu h’abagenyi obu yaahuliire ebi, yamugambira ati: “Aine okusemererwa ogu ow’alirya ekiihuro omu Bukama bwa Ruhanga.”
16 Baitu Yesu yamugambira ati: “Omusaija akacumba ekiihuro ekya rwebagyo ekikooto kandi yaraaliza baingi.
17 Obwire obw’okulya obu bwahikire, yatuma omwiru we kugambira abo abaraaliziibwe ati: ‘Mwije habwokuba buli kimu kiteekaniziibwe.’
18 Baitu buli omu hali bo yatunga eky’okwekwasa. Omu yagamba ati: ‘Nguzire ekibanja kandi nsemeriire kugenda kukirora; ninkusaba onganyire, tindasobole kwija.’
19 Ondi yagamba ati: ‘Nguzire ente ikumi kandi ningenda kuzirora; ninkusaba onganyire tindasobole kwija.’
20 Kandi ondi yagamba ati: ‘Nubwo naakataaha obuswere, na habw’ensonga egi tindasobole kwija.’
21 Hanyuma omwiru yaija yagambira mukama we byona ebi bamugambiire. Nubwo mukama w’enju yabiihirwa muno yagambira omwiru ati: ‘Genda bwangu omu nguudo enkooto n’entaito ez’orubuga, oleete hanu abanaku, abazingamire, abafu b’amaiso, n’abalema.’
22 Hanyuma y’obwire buke, omwiru yaija yagambira mukama we ati: ‘Eki oragiire, kikozerwe baitu omu kisiika hakyarumu ebiikaro.’
23 Nubwo mukuru w’enju yagambira omwiru ati: ‘Genda omu mihanda n’omu buhanda obutaito ohambirize abantu kwija, nukwo enju yange ijule.
24 Nimbagambira nti, busaho n’omu h’abasaija abo abaraaliziibwe, alirya ha kiihuro kyange ekya rwebagyo.’”
25 Kandi ebitebe by’abantu baingi bakaba nibagenda na uwe, yahinduka, yabagambira ati:
26 “Omuntu weena kakuba aija nambere ndi, baitu atanobere ise, nyina, mukazi we, abaana be, bagenzi be, banyaanya hamu n’obwomeezi bwe, tasobora kuba mwegeswa wange.
27 N’ogu weena atetweka omuti gwe kandi akampondera, tasobora kuba mwegeswa wange.
28 Ekyokurorraho, nooha omuli inywe kakuba aba naagonza kwombeka omunaara, atasobora kubanza kwikarra hansi akabalirra kurora obu araaba aine sente ezirukumara kugumalirra?
29 Kitali eki naasobora kwombeka omusingi baitu akalemwa kumalirra omunaara, kandi boona abarukumurora bamusekereze,
30 nibagamba bati: ‘Omusaija onu akatandika kwombeka baitu yalemwa kumaliiriza.’
31 Rundi mukama ki arukugonza kugenda kurwanisa omukama ondi, atabanza kwikarra hansi akarora abaserikale be 10,000, obu baraaba nibasobora kusingura ogu ou arukugenda kurwanisa anyakwine abaserikale 20,000?
32 Kakuba akirora ngu tarukwija kusobora, atuma abakwenda oli akyali hara kumusaba bagarreho obusinge.
33 Omu mulingo nugwo gumu, mukimanye ngu buli omu hali inywe obu atalekaho* ebintu bye byona, tasobora kuba mwegeswa wange.
34 “Ky’amananu ngu ekisura kirungi. Baitu kakuba kihwamu obunuzi bwakyo, kiki eki muraakozesa kugarraho obunuzi bwakyo?
35 Nikiba kitarukusemerra kuteekwa omu itaka rundi kukozesebwa nk’orwezo baitu abantu bakinaga. Anyakwine amatu agarukuhurra, ahurre.”
