Nk’Oku Yahandiikirwe Luka 16:1-31
16 Hanyuma yagambira abegeswa be ati: “Omusaija omuguuda akaba aine omukeeto we ou baajunaine habw’okukozesa kubi ebintu bye.
2 Nahabweki, yamweta yamukaguza ati: ‘Binu biki ebi ndukuhurra hali iwe? Mpa embalirra ey’obukeeto bwawe habwokuba tokyasobora kurolerra eby’omu nju.’
3 Hanyuma omukeeto yayegambira ati: ‘Hati ndaakora ki nk’oku mukama wange naagenda kunyihaho obujunanizibwa obw’okukora nk’omukeeto? Tinyine maani ag’okulima kandi nintiina kusabiiriza.
4 Ahaa! mmanyire eki ndaakora, nukwo obu baranyihaho obukeeto bwange, abantu nibaija kuntangirra omu maka gaabo.’
5 Kandi yayeta boona mukama we abaakaba naatonga, yakaguza ow’okubanza ati: ‘Mukama wange naakutonga ki?’
6 Yamugarukamu ati: ‘Ebipimo kikumi eby’amagita g’emizaituni.’ Yamugambira ati: ‘Kwata endagaano yaawe, oikarre ohandiike bwangu 50.’
7 Hanyuma yakaguza ondi ati: ‘Iwe notongwa ki?’ Yamugarukamu ati: ‘Ebipimo kikumi ebikooto eby’engano.’ Omukeeto yamugambira ati: ‘Kwata endagaano yaawe ohandiike 80.’
8 Kandi mukama w’omukeeto yamusiima, n’obu kiraaba ngu akaba atahikiriire, habwokuba akakozesa amagezi; obukirukuhika ha kukoragana n’abantu ab’obusinge bwabo, abantu ab’ensi enu b’amagezi okukira abaana b’ekyererezi.
9 “Ninyongera kubagambira nti: Mukozese itungo eritali ly’okuhikirra, kwekorra abanywani, nukwo obu lirahwaho, basobole kubatangirra omu biikaro eby’okwikaramu ebiro n’ebiro.
10 Omuntu omwesigwa omu bintu ebike, aba mwesigwa n’omu bintu ebingi, n’omuntu atali w’okuhikirra omu bintu ebike, n’omu bintu ebingi taba w’okuhikirra.
11 Nahabweki, obu muraaba mutarabaire besigwa obukirukuhika ha itungo eritali ly’okuhikirra, nooha alibaahuza itungo ery’amananu?
12 Kandi obu muraaba mulemerwe kuba besigwa obukirukuhika ha bintu eby’abandi, nooha alibaha ebyanyu?
13 Busaho muheereza ow’asobora kuba mwiru ow’abakama babiri, habwokuba alinobaho omu, kandi agonze ondi, rundi aligumiraho ondi, agaye ondi. Timusobora kuba bairu ba Ruhanga hamu n’Itungo.”
14 Abafalisaayo abaagonzaaga muno sente, bakaba nibahuliiriza byona ebi akaba naabaza, kandi baatandika kumusekereza.
15 Nahabweki yabagambira ati: “Mwetwara kuba bahikiriire omu maiso g’abantu, baitu Ruhanga amanyire ebiri omu mitima yanyu. Habwokuba abantu eki bahaisaniza, kinugwa omu maiso ga Ruhanga.
16 “Ebiragiro bikarangwa kuhikya omu kasumi ka Yohana. Kuruga kasumi ako, Obukama bwa Ruhanga buliyo niburangirirwa nk’amakuru amarungi kandi abantu aba buli mulingo, nibekamba muno kubutaahamu.
17 Mali, kyanguhire iguru n’ensi kuhwaho, kukira akanyuguta akarukukirayo obutaito omu Biragiro kurugaho katahikiiriziibwe.
18 “Weena ow’abinga* mukazi we kandi ak’aswera ondi aba asiihaine,* kandi weena ow’aswera omukazi ow’abingirwe omu mulingo gunu, aba asiihaine.
19 “Hakaba haroho omusaija omuguuda ayajwaraga engoye ezirukugaajuka n’ez’ekitaani, kandi buli kiro yayegondezaaga omu bwomeezi oburungi.
20 Baitu omusaija ayasabirizaaga arukwetwa Lazaaro, baamuteekaga ha mulyango gw’irembo ly’omuguuda. Omubiri gw’omusaija ogu gwali gwijwire ebihooya,
21 kandi yayegombaga kulya oburagalika kuruga ha meeza y’omusaija omuguuda. N’embwa zaijaga kukomba ebihooya bye.
22 Obwire bukahika omusaija ayasabirizaaga yafa kandi bamalaika baamuhimba baamutwara ha rubaju rwa Iburahimu.
“Hanyuma, n’omuguuda na uwe yafa kandi baamuziika.
23 Obu akaba ali omu kituuro naabonabona, yaimukya amaiso yarorra hara Iburahimu, kandi Lazaaro ali ha rubaju rwe.
24 Yakunga naagamba ati: ‘Isenyowe Iburahimu, ngirra embabazi otume Lazaaro, aibike ensonga y’ekyara kye omu maizi aije afukye orulimi rwange, habwokuba ndi omu busaasi obw’amaani muno omu murro gunu omwingi.’
25 Baitu Iburahimu yamugambira ati: ‘Mwana wange ijuka ngu okaba n’oyegondeza omu bintu ebirungi muno obu okaba okyali mwomeezi, baitu Lazaaro akahikwaho ebintu bibi. Baitu hati ali hanu naahuumuzibwa baitu iwe oli omu busaasi.
26 Oihireho eki, haroho omwanya mukooto muno hagati yaitu na iwe, nukwo abo abarukugonza kuruga kunu kwija oku, batacwanganiza, kandi n’abo abali oku, batacwanganiza kwija nambere tuli.’
27 Hanyuma yagamba ati: ‘Obu kiraaba nukwo kiri, ninkusaba, taata, omutume hali enju ya isenyowe,
28 habwokuba nyineyo bagenzi bange bataano nukwo asobole kubaha obwakaiso omu bwijwire, nukwo na bo bataija omu kiikaro kinu, ekirumu okubonabona.’
29 Baitu Iburahimu yagamba ati: ‘Baine Musa na banabbi; leka bahuliirize abo.’
30 Hanyuma, omusaija yamugambira ati: ‘Nangwa isenyowe Iburahimu, kakuba omuntu kuruga omu bafu agenda nambere bali, nibaija kwegarukamu.’
31 Iburahimu yamugarukamu ati: ‘Obu baraaba batasobora kuhuliiriza Musa na banabbi, omuntu n’obu arahumbuuka kuruga omu bafu, tibarukwija kumuhuliiriza.’”
Obugambo Obuli Hansi
^ Rundi, “anyakugaitururwa na.”
^ Omu Ruyonaani, por·neiʹa. Rora, Kusoborra Ebigambo.
