Nk’Oku Yahandiikirwe Luka 18:1-43
18 Nubwo yabacwera orufumo kubooleka obukuru obw’okwikara nibasaba n’okutajwaha,
2 naagamba ati: “Omu rubuga orumu hakaba haliyo omucwi w’emisango ataatiinaga Ruhanga kandi tiyateekamuga omuntu weena ekitiinisa.
3 Omu rubuga oru, hakaba haliyo omufaakati ayaikaire naagenda hali mucwi w’emisango onu, naamugambira ati, ‘Ba mwinganiza obu oraaba n’ocwa omusango gwange n’ogu ou ndukutongana na uwe.’
4 Baitu nabwo omucwi w’emisango yamara akasumi akyayangire, baitu hanyuma yayegambira ati, ‘N’obu kiraaba ngu tintiina Ruhanga kandi tinteekamu omuntu weena ekitiinisa,
5 habwokuba omufaakati onu aikara nantalibaniza, ninyija kukigumya ngu yatunga obwinganiza nukwo aleke kwikara naija hanu n’okunjwahya n’eki arukugonza mmukorre.’”
6 Hanyuma Mukama waitu yagamba ati: “Muhurre omucwi w’emisango eki yagambire n’obu kiraaba ngu akaba tali w’okuhikirra.
7 Mali, mali, Ruhanga talyoleka obwinganiza hali abakomerwemu be, abamutaagira nyamusana n’ekiro, kandi naabagumiisiriza?
8 Nimbagambira nti, naija kukigumya ngu baatunga obwinganiza omu bwangu. Baitu Omwana w’omuntu obu aliija, mali alisanga okwikiriza nka kunu omu nsi?”
9 Akongera yacwera orufumo bamu abaayetwaraga kuba abahikiriire kandi abaaroraga abandi nk’abataine mugaso, ati:
10 “Abasaija babiri bakagenda omu yekaru kusaba, omu akaba ali Mufalisaayo kandi ondi akaba ali musorooza w’omusoro.
11 Omufalisaayo akemerra kandi yatandika kusaba omu mutima gwe naagamba ebintu binu ati: ‘Ai Ruhanga ninkusiima habwokuba tindi nk’abantu abandi—abanyagi, abatali b’okuhikirra, abasiihani—kandi tindi nk’omusorooza w’omusoro onu.
12 Nsiiba emirundi ebiri omu wiiki; kandi mpayo kimu kya ikumi ha bintu byona ebi ntunga.’
13 Baitu omusorooza w’omusoro yayemerra haraho atarukugonza kwimukya amaiso ge kurora haiguru, baitu yaikara naayeteera omu kifuba, naagamba ati, ‘Ai Ruhanga, ngirra embabazi nyowe omusiisi.’
14 Nimbagambira amananu ngu, omusaija onu akagaruka omuka ye ali w’okuhikirra kukira Omufalisaayo. Habwokuba ogu weena ow’ayenyumiza* alibundaazibwa kandi ogu weena anyakwebundaaza alinyumizibwa.”
15 Abantu bakaba nibamuleetera abaana baabo abato abakwateho, baitu abegeswa be obu baakiboine, baatandika kubacoomera.
16 Baitu Yesu akeeta abaana abato nambere ali naagamba ati: “Muleke abaana abato baije nambere ndi, mutabatanga, habwokuba Obukama bwa Ruhanga bw’abo abali nk’abaana abato.
17 Mananu kwo nimbagambira nti, omuntu weena ow’atatangirra Obukama bwa Ruhanga nk’omwana omuto, talibutaahamu.”
18 Kandi omu h’abalemi yamukaguza ati: “Omwegesa Omurungi, kiki eki nsemeriire kukora nukwo ngwetwe obwomeezi obutahwaho?”
19 Yesu yamugarukamu ati: “Habwaki n’onyeta omurungi? Busaho murungi weena, oihireho Ruhanga wenka.
20 Omanyire ebiragiro: ‘Otalisiihana, otaliita, otaliiba, otaliha obwakaiso obw’ebisuba, oteekemuga so na nyoko ekitiinisa.’”
21 Omusaija yamugarukamu ati: “Ebiragiro binu byona nyikaire nimbyorobera kurugira kimu omu buto bwange.”
22 Yesu obu yahuliire eki, yamugambira ati, “N’oburwaho ekintu kimu kyonka: Tunda ebintu byawe byona ebi oine kandi sente ozigabire abanaku, kandi olyetungira itungo omu iguru; hanyuma oije ofooke muhondezi wange.”
23 Omusaija obu yahuliire eki, yasaalirwa muno habwokuba akaba ali muguuda muno.
24 Yesu yamurora kandi yagamba ati: “Ka nikiija kugumira muno abo abaine sente kutaaha omu Bukama bwa Ruhanga!
25 Amananu gali, kyanguhire engamiya kuraba omu kahuru k’enkinzo ey’okubaziira engoye, kukira omuntu omuguuda kutaaha omu Bukama bwa Ruhanga.”
26 Abo abaakihuliire baagamba bati: “Nooha asobora kujunwa?”
27 Yesu yagamba ati: “Ebintu ebitarukusoboka hali abantu, nibisoboka hali Ruhanga.”
28 Baitu Petero yagamba ati: “Dora! Tukasigaho ebyaitu twakuhondera.”
29 Yesu yabagambira ati: “Mananu kwo nimbagambira nti, busaho ayasigireho enju, omukazi, bagenzi be, abazaire rundi abaana habw’Obukama bwa Ruhanga
30 ow’atalitunga ebirukukiraho emirundi nyingi omu kasumi kanu, kandi omu businge oburukwija atunge obwomeezi obutahwaho.”
31 Hanyuma yatwara ikumi na babiri harubaju yabagambira ati: “Dora! Nitugenda Yerusalemu kandi ebintu byona ebyahandiikirwe banabbi ebirukukwata ha Mwana w’omuntu nibiija kuhikirra.
32 Ekyokurorraho, naija kuheebwayo omu mikono y’abanyamahanga, asekerezebwe, abonabonesebwe, kandi bamucwere ebicwanta.
33 Kandi hanyuma y’okumuteera muno, nibaija kumwita, baitu ha kiro ekya kasatu alihumbuuka.”
34 Baitu bateetegereze amakuru g’ebintu binu habwokuba ebigambo ebi bikaba bibaserekerwe, kandi bateetegereze ebintu ebi yagambire.
35 Yesu obu akaba ali haihi kuhika Yeriko, omufu w’amaiso akaba aikaliire harubaju rw’oruguudo naasabiiriza.
36 Habwokuba akahurra ekitebe ky’abantu nikirabaho, yatandika kukaguza kiki ekikaba nikigenda omu maiso.
37 Baamugambira bati: “Yesu Omunyanazaleesi aliyo naarabaho!”
38 Ahonaaho yatokera haiguru ati: “Yesu, Omwana wa Daudi, ngirra embabazi!”
39 Kandi abo abakaba bebembiire baatandika kumucoomera nibamugambira kuculeera, baitu yayeyongerra kimu kutokera haiguru, naagamba ati: “Omwana wa Daudi, ngirra embabazi!”
40 Hanyuma Yesu yayemerra, yaragira bamuleetere omusaija ogu. Obu yairiire haihi, Yesu yamukaguza ati:
41 “Noogonza nkukorre ki?” Omusaija yagamba ati: “Mukama wange, leka amaiso gange garole.”
42 Yesu yamugambira ati: “Hweza; okwikiriza kwawe kukukirize.”
43 Ahonaaho yahweza, kandi yatandika kumuhondera naakugiza Ruhanga. Kandi abantu obu baakirozere, boona baakugiza Ruhanga.
Obugambo Obuli Hansi
^ Rundi, “ow’ayetwara kuba wa haiguru.”
