Nk’Oku Yahandiikirwe Luka 19:1-48
19 Hanyuma yataaha omu Yeriko, kandi yarabamu.
2 Hakaba haliyo omusaija arukwetwa Zakayo, akaba ali mukuru w’abasorooza b’omusoro kandi ali muguuda.
3 Akaba naalengaho kurora Yesu nk’oku arukusisana, baitu habwokuba akaba ali mugufu, atasobole kumurora habwokuba abantu bakaba bali baingi muno.
4 Nahabweki yairuka, abebembiire yatemba omuti omusikamooli kusobora kumurora habwokuba Yesu nuho akaba ali haihi kuraba.
5 Yesu obu yahikire ha kiikaro eki, yarora haiguru yamugambira ati: “Zakayo rahuka osirimuke hansi, ninyija kuba mugenyi waawe kiro kinu.”
6 Yarahuka yasirimuka hansi, yamutangirra n’okusemererwa omu ka ye.
7 Obu baarozere eki, baatandika kutontorroma nibagamba bati: “Abungiire omusaija omusiisi omu nju ye.”
8 Baitu Zakayo yayemerra yagambira Mukama waitu ati: “Dora! Mukama wange kimu kya kabiri eky’ebintu byange ninyija kubigabira abanaku, kandi byona ebi nanyagire hali buli muntu, ninyija kubibagarurra ninteezaamu emirundi ena.”
9 Yesu yamugambira ati: “Kiro kinu okujunwa kwizire hali enju enu, habwokuba onu na uwe mwana wa Iburahimu.
10 Habwokuba Omwana w’omuntu akaija kuserra n’okujuna abo abaabuzire.”
11 Obu bakaba nibakyahuliiriza ebintu ebi, yabacwera orufumo orundi habwokuba akaba ali haihi na Yerusalemu kandi bakaba nibateekereza ngu Obukama bwa Ruhanga, bukaba nibugenda kuzooka ahonaaho.
12 Nahabweki yagamba ati: “Omutabani w’omukama akagenda omu nsi eya hara kwetungira obukama nukwo hanyuma agaruke.
13 Yayeta abairu be ikumi, yabaha mina* ikumi, yabagambira ati: ‘Musuubuze zinu kuhikya obu ndigaruka.’
14 Baitu abaikazi baamunoba muno, baatuma abakwenda bamugambire bati: ‘Titurukugonza omusaija ogu afooke omukama waitu.’
15 “Obu yagarukire hanyuma y’okwetungira obukama, yayeta abairu be abaakaba asigiire sente nukwo amanye amagoba agabaatungire obu baazisuubwize.
16 Ow’okubanza yaija omu maiso yagamba ati: ‘Mukama wange mina yaawe ekagoba ezindi ikumi.’
17 Mukama we yamugambira ati: ‘Webale muno omwiru omurungi, habwokuba n’omu kantu akataito oyolekere ngu oli mwesigwa, nkuhaire obusobozi hali embuga ikumi.’
18 N’owakabiri yaija yagamba ati: ‘Mukama wange, mina yaawe egobere ezindi itaano.’
19 Mukama we na uwe yamugambira ati: ‘Na iwe ba n’obusobozi hali embuga itaano.’
20 Baitu ondi yaija yagamba ati: ‘Mukama wange, mina yaawe nginu ei nayahwire hara muno omu rugoye.
21 Nkakutiina habwokuba oli musaija mukaali muno, otwara ebi otarayahwize kandi ogesa ebi otarasigire.’
22 Mukama we yamugambira ati: ‘Habw’ebigambo byawe, nakucwera omusango iwe omwiru omubi. Okaba okimanyire ngu ndi musaija mukaali muno, ntwara ebi ntarayahwize, kandi ngesa ebi ntarasigire.
23 Hati habwaki sente zange otarazihaire abasuubuzi? Obu naakwizire naakuzitungire n’amagoba gaazo.’
24 Nubwo yagambira abo abakaba bali haihi ati: ‘Mina mugimwiheho, mugihe ogu ow’aine ikumi.’
25 Baitu baamugambira bati: ‘Mukama waitu, ogu aine mina ikumi.’
26 ‘Nimbagambira nti, weena ow’aine, alyongerwaho ebindi, baitu ogu ow’ataine n’eky’aine kirimwihwaho.
27 Ekindi, muleete hanu abanyanzigwa bange, abakaba batarukugonza nfooke omukama waabo, kandi mubaitire omu maiso gange.’”
28 Hanyuma y’okubaza ebintu binu, yayeyongerayo yagenda Yerusalemu.
29 Obu akaba ali haihi kuhika Besifage na Besaniya, ha rusozi orurukwetwa Orusozi orw’Emizaituni, yatuma abegeswa be babiri,
30 naagamba ati: “Mugende omu kyaro kiri eki murukurora, hanyuma y’okutaahamu nimwija kusanga omwana gw’endogoya ogutakaikalirwahoga gusibikirwe. Mugusumurre, mugundentere hanu.
31 Kandi omuntu weena obu arabakaguza ati: ‘Habwaki nimugusumurra?’ Mumugambire muti: ‘Mukama waitu naagwetaaga.’”
32 Abo abaakaba atumire baagenda kandi baagusanga nk’oku akaba abagambiire.
33 Baitu obu bakaba nibagusumurra, bakama baagwo, baabakaguza bati: “Habwaki nimusumurra omwana gw’endogoya?”
34 Baagarukamu bati: “Mukama waitu naagwetaaga.”
35 Baagutwarra Yesu baagwaraho ebijwaro byabo ebya haruguru kandi baikalizaaho Yesu.
36 Obu akaba naagenda, baayara ebijwaro byabo ebya haruguru omu muhanda.
37 Ahonaaho obu yahikire haihi n’omuhanda ogurukusirimuka kuruga ha Rusozi rw’Emizaituni, ekitebe kyona eky’abegeswa baatandika kusemererwa kandi nibakugiza Ruhanga omu iraka erya haiguru habw’ebyamahano byona ebi bakaba barozere,
38 nibagamba bati: “Aine omugisa ogu, ow’arukwija nk’Omukama omu ibara lya Yahwe! Obusinge bube omu iguru, n’ekitiinisa haiguru omu iguru!”
39 Baitu bamu h’Abafalisaayo kuruga omu kitebe ky’abantu baamugambira bati: “Mwegesa, gambira abegeswa baawe baculeere.”
40 Baitu yabagarukamu ati: “Nimbagambira nti, banu n’obu baakuculeera, amabaale nigaija kutoka.”
41 Obu yahikire haihi n’orubuga, yarurora yarulirirra,
42 naagamba ati: “Iwe kakuba ha kiro kinu wayetegeriize ebintu ebirukuleeta obusinge, baitu hati biserekerwe hali amaiso gaawe.
43 Habwokuba akasumi nikaija abanyanzigwa baawe obu balyombeka orugo rw’emiti ey’esongoire, kukwehinguliiriza kandi bakugote embaju zoona.
44 Balikukenya hansi n’abaana baawe abali omuli iwe, kandi omuli iwe tibalisiga ibaale liri ha ibaale erindi, habwokuba oteetegereze akasumi ak’okuramburwa kwawe.”
45 Hanyuma yataaha omu yekaru yatandika kubinga abo abakaba nibatundiramu,
46 naabagambira ati: “Kikahandiikwa ngu, ‘Enju yange eryetwa enju ey’okusabiramu,’ baitu inywe mugifoire obwingira bw’abanyagi.”
47 Yaikara naayegesa omu yekaru buli kiro. Baitu banyakatagara abakuru, abahandiiki, n’abakuru b’abantu bakaba nibaserra omulingo baraamwita,
48 baitu batatunge omulingo gwona ogw’okukikora, habwokuba abantu boona baikaraga nambere ali nibagonza kumuhuliiriza.
Obugambo Obuli Hansi
^ Mina ey’omu Buyonaani ekaba ninganingana na guraamu 340 kandi ekaba n’ebalirwamu durakima 100.
