Nk’Oku Yahandiikirwe Luka 2:1-52
2 Omu biro ebi, Kaisaali Agusto akarabyaho ekiragiro ngu abantu boona ab’omu nsi yoona behandiikise.
2 (Okwehandikisa okw’okubanza kukabaho Kulenyo obu akaba ali mulemi wa Siriya.)
3 Kandi abantu boona baagenda kwehandiikisa, buli omu, omu rubuga rwe.
4 Yusufu na uwe yaruga Galiraaya, omu rubuga rwa Nazaleesi, yagenda Buyudaaya omu rubuga rwa Daudi orurukwetwa Beterehemu, habwokuba akaba ali omu h’ab’omu nju ya Daudi kandi ali w’oruganda rwe.
5 Akagenda kwehandiikisa ali hamu na Malyamu, kasumi ako ow’akaba afookere mukazi we, kandi ali haihi kuzaara.
6 Obu bakaba bali oku, akasumi ak’okuzaara kaahika.
7 Yazaara omwana we omuzigaijo ow’obwojo, yamuzinga omu byahi, kandi yamubyamya nambere ebisoro biriira, habwokuba batatunge omwanya omu nju y’abagenyi.
8 Omu kicweka eki, hakaba haliyo abaliisa bali aheeru, balinzire amagana gaabo omu bwire bw’ekiro.
9 Ahonaaho malaika wa Yahwe yayemerra omu maiso gaabo, ekitiinisa kya Yahwe kyamuliikana nikibehinguliiriza, kandi baatiina muno.
10 Baitu malaika yabagambira ati: “Mutatiina, dora! Nimbagambira amakuru amarungi ag’okusemererwa kwingi, abantu boona oku balitunga.
11 Habwokuba kiro kinu omu rubuga rwa Daudi, habazaaliirwe omujuni, kandi ogu nuwe Kristo Mukama waitu.
12 Kanu nuko akokurorraho nambere muramumanyirirra: Nimwija kusanga enkerembe ezingirwe omu byahi, ebyamire nambere ebisoro biriira.”
13 Ahonaaho ihe erikooto erya bamaliaka ab’omu iguru baayeteeranizaaho malaika ogu, baakugiza Ruhanga nibagamba bati:
14 “Ekitiinisa kibe hali Ruhanga ow’omu iguru, obusinge bube h’abantu abaarukusiima.”
15 Bamalaika obu baagarukire omu iguru, abaliisa baatandika kugambirangana bati: “Leka tugende Beterehemu turole ekibaireho, Yahwe eki atumanyisize.”
16 Baarahuka baagenda, baasanga Malyamu na Yusufu n’enkerembe ebyamire nambere ebisoro biriira.
17 Obu baakirozere, baabaza ebi bagambiirwe ebirukukwata ha mwana onu omuto.
18 Kandi boona abaabihuliire baahunirra habw’ebi abaliisa ebi baabagambiire,
19 baitu ebigambo ebi Malyamu yabyahura ha mutima gwe, kandi yaikara naayecumiitirizaaho amakuru gaabyo.
20 Hanyuma, abaliisa baagarukayo nibahaisaniza Ruhanga kandi nibamukugiza habw’ebi byona ebi bakaba bahuliire kandi barozere, nk’oku bakaba bagambiirwe.
21 Hanyuma y’ebiro munaana, akasumi ak’okusara omwana obu kaahikire, baamuruka Yesu, ibara erikaba limuhairwe malaika, Malyamu atakatwaire enda.
22 Akasumi ak’okwezebwa kwabo obu kaahikire nk’oku kyaragirwaga omu Biragiro bya Musa, baagenda Yerusalemu nukwo batwale omwana omu maiso ga Yahwe,
23 nk’oku kyahandiikirwe omu biragiro bya Yahwe ngu, “Buli mwana omwojo omuzigaijo asemeriire kwetwa arukwera hali Yahwe.”
24 Kandi baahayo ekihongwa nk’oku kyaragiirwe omu Biragiro bya Yahwe kiti: “Amaiba abiri rundi enduka ibiri.”
25 Kandi dora! omu Yerusalemu hakaba haliyo omusaija arukwetwa Simeoni. Omusaija onu akaba ahikiriire, naayekamba muno kuheereza Ruhanga, kandi akaba alindiriire akasumi Ruhanga obu alihuumuza Isaleri, n’omwoyo ogurukwera gukaba gumuroho.
26 Ruhanga akaba amumanyisize naakozesa omwoyo ogurukwera ngu talifa atakarozere Kristo, Yahwe ow’alituma.
27 Habw’amaani ag’omwoyo ogurukwera, akaija omu yekaru, kandi abazaire b’omwana Yesu baamuleeta omu yekaru nukwo bakole nk’engeso oku ekaba eri kusigikirra ha Biragiro.
28 Simeoni yakwata omwana kandi yakugiza Ruhanga, naagamba ati:
29 “Ai Mukama Omulemi wa byona, oikiriize omwiru waawe kugenda omu businge nk’oku wagambire,
30 habwokuba ndozere ogu ow’olikozesa kuleetaho okujunwa
31 ou wataireho omu maiso g’abantu boona,
32 ekyererezi eky’okwihaho ekiswekeriire amahanga kandi kuba ekitiinisa eky’abantu baawe Isaleri.”
33 Kandi ise na nyina omwana baikara nibahunirra habw’ebintu ebirukumubazibwaho.
34 Simeoni yabaha omugisa kandi yagambira Malyamu nyina omwana ati: “Dora! omwana onu akomerwe habw’okugwa n’okwongera kwimuka okwa baingi omu Isaleri, kandi baingi balimubazaaho kubi n’obu kiraaba ngu Ruhanga alibooleka obwokurorraho ngu ali hamu na uwe,
35 nukwo ebiteekerezo eby’omu mitima eya baingi bimanywe. (Kandi iwe, empirima ey’eraihire erikurabamu).”
36 Kandi hakaba haroho nabbi omukazi arukwetwa Ana muhara wa Penueri, ow’omu ruganda rwa Asere. Omukazi onu akaba akaikwire kandi akaba amazire emyaka musanju ali na iba hanyuma y’okutaaha obuswere,
37 baitu hati akaba ali mufaakati aine emyaka 84. Tiyayosaaga kugenda ha yekaru naaheereza Ruhanga nyamusana n’ekiro, naasiiba kandi naayesengereza.
38 Omu saaha egi yonyini, akairra haihi yatandika kusiima Ruhanga n’okugambira abo boona abakaba balindiriire okujunwa kwa Yerusalemu ebirukukwata ha mwana.
39 Obu baamazire kukora byona kusigikirra ha Biragiro bya Yahwe, baagaruka Galiraaya omu rubuga orw’owabu orwa Nazaleesi.
40 Omwana yagumizaamu naakura, yafooka w’amaani, yaijura amagezi kandi yayeyongera kusiimwa omu maiso ga Ruhanga.
41 Buli mwaka, abazaire be baagendaga Yerusalemu ha bugenyi obw’Okuhingurwaho.*
42 Obu akaba aine emyaka 12, baagenda ha bugenyi nk’oku baakoraga.
43 Ebiro eby’obugenyi obu byahoireyo, baliyo nibagarukayo owabu, omwojo Yesu yasigara Yerusalemu kandi abazaire be batakimanye.
44 Habwokuba bakateekereza ngu akaba ali omu kitebe ky’abantu abakaba nibagenda na bo, baagenda orugendo orw’ekiro kimu kandi baatandika kumuserra omu banyabuzaale baabo n’abanywani.
45 Obu yababuzire, baagaruka Yerusalemu baamuserra n’obwegendereza.
46 Hanyuma y’ebiro bisatu baamusanga omu yekaru, aikaliire hagati y’abegesa, naabahuliiriza kandi naabakaguza ebikaguzo.
47 Kandi abo boona abakaba nibamuhuliiriza baahunirra muno habw’okwetegereza kwe n’omulingo yagarukamuga.
48 Bazaire be obu baamurozere, baahunirra, kandi nyina yamukaguza ati: “Mwana wange, habwaki otukozere ekintu kinu? So na nyowe twikaire nitukuserra twetuntwire muno.”
49 Baitu yabagarukamu ati: “Habwaki mwikaire nimunserra? Timukimanyire ngu nsemeriire kuba omu nju ya Isenyowe?”
50 Baitu bateetegereze ebi akaba naabagambira.
51 Baarugayo na uwe, baagaruka Nazaleesi kandi yagumizaamu naaborobera. Nyina yaikaza ebintu binu byona ha mutima gwe.
52 Yesu yayeyongera kutunga amagezi n’okukura kandi yasiimwa Ruhanga n’abantu.
Obugambo Obuli Hansi
^ Rora, Kusoborra Ebigambo.
