Nk’Oku Yahandiikirwe Luka 20:1-47
20 Kiro kimu Yesu obu akaba naayegesa kandi naatebeza amakuru amarungi omu yekaru, banyakatagara abakuru, abahandiiki, n’abakuru b’abantu baija
2 baamugambira bati: “Tugambire, obusobozi obw’okukora ebintu binu n’obwiha nkaha? Rundi nooha yabukuhaire?”
3 Yabagarukamu ati: “Na nyowe leka mbakaguze ekikaguzo kimu kandi mungarukemu:
4 Okubatiza kwa Yohana kwali nikuruga omu iguru rundi hali abantu?”
5 Baatandika kugambirangana bati: “Obu turagamba ngu, ‘Kukaruga omu iguru,’ naija kutukaguza ati, ‘Habwaki mutaramwikiriize?’
6 Baitu kakuba tugamba ngu, ‘Kukaruga hali abantu,’ nibaija kututeera amabaale habwokuba nibakigumiza kimu ngu Yohana akaba ali nabbi.”
7 Nubwo baamugarukamu ngu, tibamanyire nambere kwarugire.
8 Yesu yabagambira ati: “Na nyowe tindukwija kubagambira nambere nyiha obusobozi obw’okukora ebintu binu.”
9 Hanyuma yacwera abantu orufumo runu: “Omusaija akabyara omusiri gwe ogw’emizabbibbu, yagusigira abalimi kugurolerra, yagenda omu ihanga erindi yamarayo akasumi.
10 Akasumi obu kaahikire, yatuma omwiru we hali abalimi bamuhe emizabbibbu kuruga omu musiri. Baitu abalimi baamuteera baamubinga ataine kantu.
11 Yatuma omwiru owakabiri; Ogu na uwe baamuteera, baamuswaza kandi baamubinga ataine kantu.
12 Yayongera yatuma owakasatu; ogu na uwe baamuhutaaza kandi baamunaga aheeru.
13 Nubwo mukama w’omusiri gw’emizabbibbu yagamba ati: ‘Nkole ki? Leka ntume mutabani wange ou ndukugonza muno, obundi nibasobora kumutamu ekitiinisa.’
14 Abalimi obu baamurozere, baagambirangana bati: ‘Onu nuwe omugwetwa. Leka tumwite nukwo obugwetwa bube bwaitu.’
15 Nahabweki, baamunaga aheeru y’omusiri kandi baamwita. Hati Mukama w’omusiri alibakorra ki?
16 Aliija, aite abalimi banu, kandi omusiri aguhe abandi.”
Obu baahuliire eki, baagamba bati: “Eki nikikafuuhe!”
17 Baitu Yesu yabatunurra, yabakaguza ati: “Hati ekyahandiikirwe kinu nikimanyisa ki ekirukugamba ngu: ‘Ibaale abombeki eri baayangire, niryo lifookere ibaale erikuru erya ha nsonda?
18 Weena arukugwa ha ibaale eri alisasangurwa. Kandi weena ou lirigwera lirimusasangura.”
19 Abahandiiki n’abanyakatagara abakuru baagonza kumukwata omu saaha egi yonyini, baitu baatiina abantu, habwokuba bakakyetegereza ngu omu kucwa orufumo runu, nubo akaba naabazaaho.
20 Habwokuba bakaba nibaserra nambere baramukwasiza, baatuma abasaija abakaba basaswirwe omu nsita befoole abahikiriire nukwo bamukwate omu bigambo bye, kandi hanyuma bamuheyo omu b’obusobozi n’omu mikono y’omulemi.
21 Baija baamukaguza bati: “Mwegesa, tukimanyire ngu obaza kandi oyegesa eby’amananu, togwera rubaju kandi oyegesa omuhanda gwa Ruhanga ogurukuhikaana n’amananu.
22 Kihikire itwe kusasura omusoro hali Kaisaali rundi nangwa?”
23 Baitu obu yayetegeriize obugobya bwabo, yabagambira ati:
24 “Munyoleke edinaali. Ekisisani n’ebigambo ebiroho by’oha?” Baamugarukamu bati: “Bya Kaisaali.”
25 Na uwe yabagambira ati: “Mukole kyona ekirukusoboka kurora ngu, ebya Kaisaali mwabiha Kaisaali, baitu ebya Ruhanga mubihe Ruhanga.”
26 Kandi batasobole kumukwata omu bigambo bye omu maiso g’abantu, baitu baahunirra habw’omulingo yabagarukiremu kandi baaculeera.
27 Baitu bamu h’Abasadukaayo abagamba ngu busaho kuhumbuuka, baija baamukaguza bati:
28 “Mwegesa, Musa akatuhandiikira ati, ‘Kakuba omusaija afa akasigaho omukazi atamuzairemu omwana, mugenzi we asemeriire kutwara omukazi ogu nukwo azarre mugenzi we abaana.’
29 Hakaba haroho abasaija musanju abarukuzaarwa hamu. Ow’okubanza yaswera omukazi, baitu yafa atakazaire omwana.
30 Nukwo kyabaire kiti na ha wakabiri
31 kandi owakasatu yamuswera. Kandi musanju boona baamuswera baitu boona baafa batamuzairemu abaana.
32 Ha kumalirra, omukazi na uwe yafa.
33 Hati, akasumi ak’okuhumbuuka obu kalihika, omukazi onu aliba w’oha? Habwokuba boona musanju akaba ali mukazi wabo.”
34 Yesu yabagarukamu ati: “Abaana ab’obusinge bunu baswera kandi baswerwa,
35 baitu abo abatwarwa kuba abasemeriire kutunga obwomeezi omu businge oburukwija, n’okuhumbuurwa kuruga omu bafu, tibaswera n’obu kwakuba okuswerwa.
36 Amananu gali, tibalyongera kufa, habwokuba baliba nka bamalaika kandi abaana ba Ruhanga habwokuba baliba bahumbwirwe.
37 Baitu kumanya ngu abafu bahumbuurwa, Musa akakyoleka obu yabalizeeho ebyabaireho ha kisaka, obu yayesere Yahwe, ‘Ruhanga wa Iburahimu, Ruhanga wa Isaka kandi Ruhanga wa Yakobo.’
38 Tali Ruhanga ow’abafu, baitu ow’abomeezi, habwokuba hali Uwe boona bomeezi.”
39 Abamu h’abahandiiki baamugarukamu bati: “Mwegesa obalize kurungi.”
40 Kandi batongere kutunga obumanzi obw’okwongera kumukaguza ekikaguzo nakimu.
41 Hanyuma na uwe yabakaguza ati: “Habwaki bagamba ngu Kristo mwana wa Daudi?
42 Habwokuba omu kitabu kya Zabuli, Daudi wenyini agamba ati, ‘Yahwe akagambira Mukama wange ati: “Ikarra ha mukono gwange ogw’obulyo
43 okuhikya obu ndifoora abanyanzigwa baawe nk’akatebe k’ebigere byawe.”’
44 Nahabweki, Daudi obu araaba naamweta Mukama we, hati kiija kita ngu mwana we?”
45 Abantu boona obu bakaba nibahuliiriza, yagambira abegeswa be ati:
46 “Mwerinde abahandiiki abagonza kurubata bajwaire amaganduura, abagonza abantu babaramukye omu butale, kandi abagonza kwikarra omu biikaro eby’omu maiso omu masorrokaniro, n’omu biikaro ebirukukirayo ekitiinisa ha biihuro ebya rwebagyo.
47 Ekindi, banyaga ebintu by’abafaakati,* kandi habw’okugonza kweyoleka basaba esaara eziraihire. Banu baliheebwa ekifubiro ekirukukirayo kuba eky’amaani.”
Obugambo Obuli Hansi
^ Nk’oku kiri, “amaju g’abafaakati.”
