Nk’Oku Yahandiikirwe Luka 23:1-56
23 Nubwo abantu baingi baimuka, boona baamutwara mwa Pirato.
2 Baatandika kumujunaana, nibagamba bati: “Tusangire omusaija onu naajeemesa ihanga lyaitu, naatanga abantu kusasura omusoro hali Kaisaali, kandi naagamba ngu nuwe Kristo omukama.”
3 Nubwo Pirato yamukaguza ati: “Oli Omukama w’Abayudaaya?” Yesu yamugarukamu ati: “Niiwe wenka wakyegambira.”
4 Nubwo Pirato yagambira banyakatagara abakuru, n’ekitebe ky’abantu ati: “Nindora omusaija onu taine musango gwona ogu akozere.”
5 Baitu baalemeraho nibagamba bati: “Aleetaho akaimukirro omu bantu kuraba omu kwegesa omu Buyudaaya yoona, kutandikira Galiraaya kuhika na hanu.”
6 Pirato obu yahuliire eki, yakaguza Yesu obu araaba ali Munyagaliraaya.
7 Baitu obu yamazire kukyeteegereza ngu naaruga omu kicweka ekirukwebemberwa Herodi, yamusindika mwa Herodi na uwe ow’akaba ali omu Yerusalemu omu kasumi ako.
8 Herodi obu yarozere Yesu, yasemererwa muno. Habwokuba kumara akasumi akaba naagonza muno kumurora, habwokuba akaba amuhuliireho bingi, kandi akaba naanihira kumurora naakora kimu ha byamahano.
9 Nahabweki yamukaguza ebikaguzo bingi, baitu Yesu atamugarukemu ekintu kyona.
10 Baitu banyakatagara abakuru, n’abahandiiki baikara bemeriire nibamujunaana baine ekiniga kingi.
11 Hanyuma Herodi n’abaserikale be baamuswaza kandi baamusekereza, baamujweka orugoye orurukwangasana, hanyuma baamugarra mwa Pirato.
12 Ha kiro eki, Herodi na Pirato bakafooka banywani, habwokuba eki kitakabaireho, bakaba bali banyanzigwa.
13 Hanyuma Pirato yayeta banyakatagara abakuru, abalemi hamu n’abantu,
14 yabagambira ati: “Mundetiire omusaija onu, nimugamba ngu naaleetera abantu kujeema. Baitu dora! namukaguliiriza omu maiso ganyu, nasanga ngu busaho bwakaiso oburukugumya ebi murukumujunaana.
15 Herodi na uwe asangire ataine musango, yayongera yamutusindikira, kandi dora! busaho eki akozere ekisemeriire kumuleetera kwitwa.
16 Nahabweki, ninyija kumufubira kandi mmulekere.”
17 ——
18 Baitu ekitebe ky’abantu boona baatokera haiguru nibagamba bati: “Omusaija ogu omwite, kandi olekere Bbarabba.”
19 (Omusaija onu akaba atairwe omu nkomo habw’okuleetera abantu ab’omu rubuga kujeemera gavumenti, hamu n’okwita abantu.)
20 Baitu yayongera yabakaguza, habwokuba akaba naagonza kulekera Yesu.
21 Baatandika kutokera haiguru nibagamba bati: “Ahanikwe ha muti! Ahanikwe ha muti!”
22 Omurundi ogwakasatu, Pirato yabakaguza ati: “Habwaki? Omusaija onu, akozere kibi ki? Nsangire ataine eki akozere ekisemeriire kumuleetera kwitwa; nahabweki ninyija kumufubira kandi mmulekere.”
23 Baayeyongera kutokera haiguru nibagamba ngu, ahanikwe ha muti aitwe kandi baagumizaamu nibatoka muno.
24 Pirato yacwamu kukora eki barukugonza.
25 Yalekera omusaija ou bakaba nibasaba, ow’akaba atairwe omu nkomo habw’okuleetera abantu kujeemera gavumenti hamu n’okwita abantu, baitu yahayo Yesu aitwe nk’oku bakaba nibagonza.
26 Obu bakaba nibamutwara, baakwata Simooni owa Kulene ow’akaba naaruga omu kyaro, baamwetwekesa omuti, yaguhimba ahondiire Yesu.
27 Abantu baingi bakaba nibamuhondera, otwaliiremu n’abakazi abakaba nibaganya kandi nibarra habwe.
28 Yesu yahinduka yarora abakazi, yabagambira ati: “Inywe abahara ba Yerusalemu, muleke kurra habwange. Baitu mweririrre n’abaana banyu.
29 Dora! habwokuba ebiro nibiija abantu obu baligamba bati: ‘Baine okusemererwa abakazi engumba, abatakazaarahoga, n’abo abatakonkyaga!’
30 Hanyuma balitandika kugambira ensozi bati: ‘Mutugwere!’ kandi bagambire n’obusozi bati: ‘Mutusweke!’
31 Obu baraaba nibakora ebintu binu omuti guli mubisi, kiriba kita obu gulyoma?”
32 Hakaba haroho abasaija abandi babiri enkozi z’ebibi, abakaba nibatwarwa kwitwa hamu na uwe.
33 Obu baahikire omu kiikaro ekirukwetwa Akahangara, baamuterra emisumaali ha muti hamu n’enkozi z’ebibi, omu ha rubaju rwe orw’obulyo, n’ondi ha rubaju rwe orw’emoso.
34 Baitu Yesu yagamba ati: “Taata baganyire, habwokuba tibarukumanya eki barukukora.” Ekindi, baabagana ebijwaro bye nibakozesa okutoma.
35 Kandi abantu bakaba bemeriire nibarora. Baitu abalemi bakaba nibamusekereza nibagamba ngu: “Abandi akabajuna, na uwe leka ayejune obu araaba ali Kristo owa Ruhanga, ow’Akomerwemu.”
36 N’abaserikale baamusekereza, baija nambere ali, baamuha eviini ey’erukusarra,
37 baagamba bati: “Obu oraaba niiwe Omukama w’Abayudaaya, wejune.”
38 Kandi haiguru y’omutwe gwe bakateekaho akaapa, akahandiikirweho ebigambo binu: “Onu Nuwe Omukama w’Abayudaaya.”
39 Nubwo omu ha nkozi z’ebibi ow’akaba ahanikirwe ha muti yatandika kumujuma naagamba ati: “Niiwe Kristo, tinukwo? Wejune, na itwe otujune!”
40 Baitu ondi yamuhana naamugambira ati: “Torukutiina Ruhanga naakake, kandi kunu na iwe ocweriirwe omusango nugwo gumu, nk’omusaija onu?
41 Omusango ogu batucweriire gutusemeriire, habwokuba nitusasurra ebi twakozere, baitu omusaija onu, taine kibi kyona eki akozere.”
42 Hanyuma yagamba ati: “Yesu onyijuke obu olitaaha omu Bukama bwawe.”
43 Yesu yamugarukamu ati: “Mananu kwo ninkugambira kiro kinu nti, oliba na nyowe omu Rugonjo rwa Ruhanga.”*
44 Zikaba ziri nka saaha mukaaga, baitu ensi yoona yaswekwa omwirima kuhika saaha mwenda,
45 habwokuba omusana gukalemwa kujwa, orutimbi rwa yekaru rwataagukira hagati.
46 Kandi Yesu yayamuza omu iraka erya haiguru, naagamba ati: “Taata obwomeezi bwange nimbuhayo omu mikono yaawe.” Hanyuma y’okubaza eki, yafa.
47 Omukuru w’abaserikale obu yarozere ebibaireho, yatandika kukugiza Ruhanga naagamba ati: “Mananu kwo omusaija onu abaire ahikiriire.”
48 Kandi ekitebe ky’abantu abakaba besorooliize aho, obu baarozere ebikaba bibaireho, baagaruka omu maka gaabo nibeteera omu bifuba, habw’obujune.
49 Kandi abo boona abakaba bamumanyire, bakaba bemeriire haraho. Kandi n’abakazi abakaba bamuhondiire kuruga Galiraaya bakaba baroho kandi baarora ebintu binu.
50 Kandi dora! hakaba haroho omusaija arukwetwa Yusufu, ayaikarraga omu Rukurato, ow’akaba ali musaija murungi kandi ahikiriire.
51 (Omusaija ogu, ataikirranize n’ebi baahanwire, hamu n’ebikorwa byabo.) Akaba naaruga Alimaseya omu rubuga rw’Abayudaaya, kandi akaba alindiriire Obukama bwa Ruhanga.
52 Omusaija ogu akagenda omu maiso ga Pirato, yamusaba omutumbi gwa Yesu.
53 Yaguhanuura ha muti, yaguzinga omu kitaani ekirungi, yagubyamya omu kituuro ekikaba kirimirwe omu mwandara, kandi ekikaba kitakateekwamuga omuntu weena.
54 Kikaba kiri kiro eky’Okuteekaniza, kandi Sabbiti ekaba eri haihi kutandika.
55 Abakazi abakaba barugire na uwe Galiraaya, baagenda baarora ekituuro kandi baarora omulingo bakaba babyamizeemu omutumbi gwe,
56 kandi baagarukayo kuteekaniza ebirukuboya, n’amagita agarukuboya kurungi. Baitu baahuumura ha Sabbiti nk’oku ekiragiro kikaba kiri.
Obugambo Obuli Hansi
^ Rora, Kusoborra Ebigambo.
