Nk’Oku Yahandiikirwe Luka 24:1-53
24 Baitu ha kiro eky’okubanza omu wiiki, bakazinduka nyenkyara muno baija ha kituuro baleesere ebirukuboya ebi bakaba bateekaniize.
2 Baasanga ibaale likulingwirwe kuruga ha kituuro,
3 kandi obu baataahiremu batasangemu omutumbi gwa Mukama waitu, Yesu.
4 Obu bakaba bakyahuniriire habw’eki, dora! abasaija babiri abakaba bajwaire engoye ezirukwangasana baayemerra nambere bali.
5 Abakazi baatiina muno kandi baikara baroleriire hansi, abasaija baabakaguza bati: “Habwaki omwomeezi nimumuserurra omu bafu?
6 Hanu taroho, ahumbwirwe. Mwijuke nk’oku yabagambiire obu akaba akyali Galiraaya,
7 naagamba ngu, Omwana w’omuntu asemeriire kuheebwayo omu mikono y’abantu abasiisi, aitirwe ha muti kandi ha kiro ekya kasatu ahumbuuke.”
8 Nubwo baijuka ebigambo bye,
9 baaruga ha kituuro kandi ebintu binu byona baabigambira ikumi n’omu n’abandi boona.
10 Abakazi banu nubo Malyamu Magadalene, Yoana, hamu na Malyamu nyina Yakobo. N’abakazi abandi abakaba bali na bo bakaba nibagambira abakwenda ebintu binu.
11 Baitu ebigambo binu, bikabazookera nk’ebitarumu makuru kandi bakaba batarukwikiriza abakazi ebi bakaba nibabagambira.
12 Baitu Petero yaimuka yairuka yagenda ha kituuro, kandi obu yalingwize omu kituuro, akarora engoye ez’ekitaani zonka. Yagenda naayekaguza kiki ekibaireho.
13 Baitu dora! ha kiro eki kyonyini, abegeswa babiri bakaba nibagenda omu kyaro ekirukwetwa Emau, ekikaba kiri nka mairo musanju kuruga Yerusalemu,
14 kandi bakaba nibabalizangana ebintu byona ebikaba bibaireho.
15 Obu bakaba nibakyabazaaho ebintu ebi, Yesu yabeteranizaaho yatandika kurubata na bo,
16 baitu batamumanyirre.
17 Yabakaguza ati: “Bintu ki ebi, ebi muliyo nimubazaaho, nimurubata?” Baayemerra baine obujune h’amaiso.
18 Omu hali bo arukwetwa Kileopasi yamukaguza ati: “Oli mugenyi omu Yerusalemu ataine ab’orukwikara na bo kandi atarukumanya ebibaireho omu biro binu?”
19 Yabakaguza ati: “Bintu ki?” Baamugarukamu bati: “Ebintu ebirukukwata hali Yesu Omunyanazaleesi, ow’akaba ali nabbi ow’amaani omu bikorwa n’omu bigambo omu maiso ga Ruhanga hamu n’abantu boona;
20 n’omulingo banyakatagara baitu abakuru, n’abalemi baamuhaireyo kucwerwa ogw’okufa kandi baamuterra emisumaali ha muti.*
21 Baitu tubaire nitunihira ngu omusaija ogu nuwe arukwija kujuna Isaleri. Kandi oihireho ebintu ebi byona, kinu kiri kiro kya kasatu kuruga ebintu binu bibaho.
22 Kandi n’abakazi abamu abatubaire na bo batuhuniriize, habwokuba nyenkyara muno bagenzere ha kituuro
23 kandi obu batasangireyo omutumbi gwe, baija baagamba ngu baboine bamalaika ababagambiire ngu mwomeezi.
24 Hanyuma bamu hali abo ababaire na itwe, bagenzere ha kituuro baasanga nukwo kiri kiti nk’oku abakazi batugambiire, baitu tibamurozere.”
25 Nubwo Yesu yabagambira ati: “Inywe abadomadoma, ab’emitima erukwikaraho kwikiriza ebintu binu byona banabbi ebi baabagambiire!
26 Kyali kitarukwetaagisa Kristo kubonabona habw’ebintu binu, n’okutaaha omu kitiinisa kye?”
27 Kandi kutandikira hali Musa na banabbi boona, yabasoborra ebintu byona ebikaba nibimukwataho ebirukusangwa omu Byahandiikirwe byona.
28 Obu baahikire haihi n’ekyaro eki bakaba nibagendamu, uwe yasisana nk’arukweyongerayo.
29 Baitu baamwesengereza asigale, nibagamba bati: “Raara hanu na itwe, habwokuba obwire buli haihi kwira.” Nubwo yagenda yaraara na bo.
30 Obu akaba naalya na bo, yakwata omugaati, yasaba, yagucwamu, kandi yatandika kubagabira.
31 Aho amaiso gaabo gaiguka kandi baamumanyirra; baitu yababuraho.
32 Kandi baagambirangana bati: “Emitima yaitu tekwasirwehoga muno obu abaire naabaza na itwe omu muhanda, kandi naatusoborra Ebyahandiikirwe?”
33 Omu bwire obu bwonyini, baimuka baagarukayo Yerusalemu baasanga ikumi n’omu n’abo abaali besoroize hamu na bo,
34 abaagambire bati: “Mananu kwo Mukama waitu ahumbuukire kandi abonekiire Simooni!”
35 Hanyuma abegeswa babiri na bo baabazaaho ebintu ebikaba bibaireho omu muhanda kandi n’omulingo baamumanyiriire hanyuma y’okucwamu omugaati.
36 Obu bakaba nibakyabaza ebintu ebi, Yesu wenyini yabemerra hagati yabagambira ati: “Obusinge bube na inywe.”
37 Baitu habwokuba bakekanga muno kandi baatiina, bakateekereza ngu nibarora ekihangirwe eky’omwoyo.
38 Nubwo yabagambira ati: “Habwaki mwetuntwire kandi nimugurukyagurukya omu mitima yanyu?
39 Murole engaro zange n’ebigere byange, nukwo mukigumye ngu ninyowe, munkwateho, murole habwokuba ekihangirwe eky’omwoyo tikigira nyama n’amagufa ebi murukurora nyine.”
40 Kandi obu akaba naabaza ebi, yabooleka engaro ze hamu n’ebigere bye.
41 Baitu obu bakaba bakyalemerwe kukiikiriza habw’okusemererwa okwingi muno n’okuhunirra, yabakaguza ati: “Mwineho ekyokulya kyona?”
42 Baamuha ekicweka ky’encu ey’etalikire,
43 kandi yakikwata yakirya nibarora.
44 Hanyuma yabagambira ati: “Binu nibyo ebigambo byange ebi nabagambiire obu nkaba nkyali na inywe, nukwo ebintu byona ebyampandiikirweho omu Biragiro bya Musa n’omu bihandiiko bya banabbi n’omu Zabuli bisemeriire kuhikirra.”
45 Nubwo yakingura ebiteekerezo byabo, nukwo basobole kwetegereza amakuru g’Ebyahandiikirwe,
46 kandi yabagambira ati: “Kinu nikyo kyahandiikirwe: ngu Kristo alibonabonesebwa, ahumbuurwe kuruga omu bafu ha kiro ekya kasatu,
47 kandi omu ibara lye, obutumwa obw’okwegarukamu kusobora kuganyirwa ebibi, bulitebezebwa omu mahanga goona—kutandikira omu Yerusalemu.
48 Niinywe muliba bakaiso b’ebintu binu.
49 Kandi dora! Ningenda kubatwekera Isenyowe eki yaraganiize. Baitu mwikale omu rubuga, kuhikya obu mulitunga amaani kuruga haiguru.”
50 Nubwo yabebembera kuruga omu rubuga yabahikya Besaniya, kandi yaimukya emikono ye yabaha omugisa.
51 Obu akaba naabaha omugisa, yabarugaho yatwarwa omu iguru.
52 Baateeza amaju hansi, kandi baagaruka Yerusalemu baine okusemererwa kwingi.
53 Kandi buli kiro baabaga omu yekaru nibakugiza Ruhanga.
Obugambo Obuli Hansi
^ Rora, Kusoborra Ebigambo.
