Nk’Oku Yahandiikirwe Luka 6:1-49
-
Yesu, “Mukama wa Sabbiti” (1-5)
-
Omusaija ow’omukono ogusaraire akizibwa (6-11)
-
Abakwenda 12 (12-16)
-
Yesu ayegesa kandi akiza (17-19)
-
Eby’okusemererwa n’eby’obujune (20-26)
-
Kugonza abanyanzigwa (27-36)
-
Muleke kucwera abandi omusango (37-42)
-
Omuti gumanyirwa ha bijuma byagwo (43-45)
-
Enju ey’eyombekerwe kurungi; enju etaine omusingi ogugumire (46-49)
6 Obu akaba naaraba omu musiri gw’engano ha kiro kya Sabbiti, abegeswa be baacwa entwe z’engano, nibazijungira omu ngaro zaabo kandi nibalya.
2 Abamu h’Abafalisaayo baabakaguza bati: “Habwaki nimukora ekintu ekitarukwikirizibwa kukorwa ha Sabbiti?”
3 Baitu Yesu yabagarukamu ati: “Timukasomaga Daudi eki yakozere n’abasaija abaakaba ali na bo obu baarumirwe enjara?
4 Obu yataahire omu nju ya Ruhanga, yakwata emigaati ey’okwoleka yagirya kandi endi yagiha abasaija abakaba bali na uwe, kandi kunu kikaba kitarukwikirizibwa omuntu ondi weena kugirya, oihireho banyakatagara bonka?”
5 Yabagambira ati: “Omwana w’omuntu nuwe Mukama wa Sabbiti.”
6 Ha kiro kya Sabbiti ekindi, akataaha omu isorrokaniro, yatandika kwegesa. Kandi hakaba haliyo omusaija ow’akaba azingamire* omukono ogw’obulyo.
7 Abahandiiki n’Abafalisaayo bakaikazaaho Yesu amaiso kurora obu arakiza ha kiro kya Sabbiti, nukwo batunge eki barasigikirraho kumujunaana.
8 Yamanya ebi barukuteekereza, yagambira omusaija ow’azingamire omukono ati: “Imuka, oyemerre hagati.” Yaimuka, yayemerra hagati.
9 Nubwo Yesu yabakaguza ati: “Basaija inywe leka mbakaguze, nikiikirizibwa ha kiro kya Sabbiti kukora ekintu ekirungi rundi ekibi, kujuna obwomeezi rundi kubuhwerekereza?”
10 Hanyuma y’okubetoroozaamu amaiso, yagambira omusaija ati: “Gorra omukono gwawe.” Yagugorra kandi gwakira.
11 Baitu baakwatwa ekiniga ky’amaani, baatandika kwekaguzaahongana eki basobora kukora Yesu.
12 Kiro kimu, akagenda ha rusozi kusaba yamarayo obwire bw’ekiro bwona naasaba hali Ruhanga.
13 Obwire obu bwakiire, yayeta abegeswa be kandi omuli bo yakomamu 12, yabeeta abakwenda kandi nibo banu:
14 Simooni ou yarukire Petero, Andereya mugenzi we, Yakobo, Yohana, Firipo, Batolomaayo,
15 Matayo, Tomasi, Yakobo mutabani wa Alifaayo, Simooni ow’arukwetwa “omwekambi,”
16 Yuda mutabani wa Yakobo, na Yuda Isikalyota, ayamugobiize.
17 Yasirimuka na bo, baayemerra ha kiikaro ekiterekeriire, kandi hakaba haroho ekitebe ky’abegeswa be baingi n’abantu baingi kuruga Buyudaaya, Yerusalemu, n’omu bicweka ebya Turo na Sidoni ebiri ha musa gw’enyanja, abaali baizire kumuhuliiriza n’okukizibwa endwaire zaabo.
18 N’abo abakaba nibatalibanizibwa emyoyo emibi, bakakizibwa.
19 Kandi abantu boona bakaba nibagonza kumukwataho habwokuba amaani gakaba nigamurugamu, kandi nigabakiza boona.
20 Yaimukya amaiso yarora abegeswa be, yabagambira ati:
“Mwine okusemererwa inywe abanaku, habwokuba Obukama bwa Ruhanga bwanyu.
21 “Mwine okusemererwa inywe abarumwa enjara hati, habwokuba muliigusibwa.
“Mwine okusemererwa inywe abarukuganya hati, habwokuba muliseka.
22 “Mwine okusemererwa inywe, abantu obu babanoba, obu babasoroora, obu babajuma, obu babanga kandi bakagamba ngu muli bantu babi, habw’Omwana w’omuntu.
23 Musemerererwe omu kiro eki kandi mukyanganuke, habwokuba empeera yanyu y’amaani omu iguru kandi ebi nibyo ebintu byonyini baisenkurubo baakoraga banabbi.
24 “Ziribabona inywe abaguuda, habwokuba mutunga okuhuumuzibwa kwanyu omu bwijwire hati.
25 “Ziribabona inywe abaigusire hati, habwokuba mulirumwa enjara.
“Ziribabona inywe abarukuseka hati, habwokuba muliganya kandi murre.
26 Ziribabona inywe abantu boona obu bababazaaho kurungi, habwokuba kinu nikyo baisenkurubo baakoraga banabbi ab’ebisuba.
27 “Baitu inywe abarukuhuliiriza nimbagambira nti: Mugumizeemu kugonza abanyanzigwa banyu, mukorre ebirungi abo abarukubanoba,
28 muhe omugisa abo abarukubakyena, kandi musabire abo abarukubajuma.
29 Kakuba omuntu akuteera harubaju rumu orw’itama, muhindurre n’orundi. Omuntu kakuba atwara ekijwaro kyawe ekya haruguru, muhe n’eky’omunda.
30 Ohe ogu weena anyakukusaba, kandi kakuba omuntu atwara ebintu byawe, otabimusaba kubikugarurra.
31 “Ekindi, ebi mugonza abantu babakorrege, na inywe nibyo mubakorrege.
32 “Obu muragonza abo abarukubagonza, kiki eki murasiimirwa? N’abasiisi bagonza abo abarukubagonza.
33 Kandi obu murakorra ebirungi abo abarukubibakorra, kiki eki murasiimirwa? N’abasiisi bakora ekintu nikyo kimu.
34 Ekindi, obu murayohoza abo abamurukunihira kubasasura, kiki eki murasiimirwa? N’abasiisi boohoza abasiisi bataahi baabo, nukwo basobole kutunga eki kyonyini eki babohoize.
35 Baitu inywe mugumizeemu nimugonza abanyanzigwa banyu, nimukora ebirungi, nimwohoza mutarukunihira kusasurwa kantu koona. Nubwo empeera yanyu eriba y’amaani kandi muliba baana b’ogu Anyakuli Haiguru Muno, habwokuba ayoleka embabazi hali abo abatarukusiima hamu n’ababi.
36 Mwikale nimwoleka embabazi nk’oku Isiinywe ali w’embabazi.
37 “Muleke kucwa omusango kandi na inywe timuligucwerwa, muleke kujumirra abandi, kandi na inywe tibalibajumirra. Mwikale nimuganyira, kandi na inywe muliganyirwa.
38 Mugabege kandi na inywe muliheebwa. Balibaseesera omu rugoye rwanyu endengo enungi, igatiirwe kurungi, ecikinyiziibwe kurungi, kandi erukuseeseka. Kandi ekipimo eki mukozesa kupimira abandi, nikyo kirikozesebwa kubapimira.”
39 Hanyuma yabagambira ekyokurorraho kinu: “Omuntu ow’afiire amaiso naasobora kwebembera omufu w’amaiso ondi? Boona tibarukwija kugwa omu kiina?
40 Omwegi takira omwegesa we, baitu weena ow’ayegesebwa kurungi, aliba nk’omwegesa we.
41 Habwaki norora akanyansi akali omu liiso lya mugenzi waawe, baitu otarukurora empinju enyakuli omu liiso lyawe?
42 Nosobora ota kugambira mugenzi waawe oti: ‘Nyikiriza nkwihe akanyansi omu liiso lyawe,’ kandi kunu iwe torukurora empinju enyakuli omu liiso lyawe? Mugobya we iwe! Banza oihemu empinju enyakuli omu liiso lyawe, ohweze kurungi, nukwo osobole kwihamu akanyansi akali omu liiso lya mugenzi waawe.
43 “Busaho omuti omurungi, ogwana ebijuma ebijunzire, kandi busaho omuti ogujunzire, ogwana ebijuma ebirungi.
44 Buli muti gwona, gumanyirwa ha bijuma byagwo. Ekyokurorraho, abantu tibasobora kunoga emitiini h’amahwa, nobukwakuba kunoga emizabbibbu ha muti gw’amahwa.
45 Omuntu omurungi omu lyahurro lye erirungi ery’omutima gwe, harugamu ebintu ebirungi, baitu omuntu omubi omu lyahurro lye eribi, harugamu ebintu ebibi. Habwokuba ebiijura omu mutima, akanwa nibyo kabaza.
46 “Habwaki nimunyeta ‘Mukama waitu! Mukama waitu!’ baitu mutarukukora ebintu ebi ndukubagambira?
47 Omuntu weena ow’aija nambere ndi, akahurra ebigambo byange kandi akabikora, leka mbagambire naasisana oha:
48 Naasisana omusaija ow’akaba naayombeka enju yalima omusingi oguhamire muno, kandi yagwombeka ha mwandara. Okusandaara kw’amaizi obu kwaizire, amaizi g’ekisaaru gaija n’amaani gateera enju egi, baitu gatasobole kugitengeesa habwokuba ekombekwa kurungi.
49 Harubaju orundi, ogu weena ow’ahurra akaikara ataine eki akozereho, naasisana omusaija ayayombekere enju ye ha itaka atalimire musingi. Amaizi g’ekisaaru obu gaagitiire, ahonaaho yaseeseka kandi yahweraho kimu.”
Obugambo Obuli Hansi
^ Rundi, “asaraire.”
