Nk’Oku Yahandiikirwe Luka 7:1-50
7 Obu yamazire kubaza ebi akaba naagonza kugambira abantu, yataaha omu Kaperenaumu.
2 Hakaba haroho mukuru w’ihe ow’akaba aine omwiru ou yagonzaaga muno. Omwiru ogu akaba arwaire muno kandi ali haihi kufa.
3 Obu yahuliire ebirukukwata hali Yesu, yatuma bamu h’abakuru b’Abayudaaya hali uwe, kumusaba kwija akize omwiru we.
4 Baija hali Yesu baatandika kumwesengereza nibagamba bati: “Kimusemeriire omukorre kinu,
5 habwokuba agonza ihanga lyaitu kandi nuwe yayombekere isorrokaniro lyaitu.”
6 Yesu yagenda na bo, baitu obu akaba ali haihi kuhika ha nju, mukuru w’ihe akaba amazire ira kutuma banywani be baije bagambire Yesu bati: “Waitu, otatalibana habwokuba tikimpikiriire okukuraaliza kwija omu nju yange.
7 Egi niyo ensonga habwaki nyerozere ntasemeriire kwija nambere oli. Baitu baza ekigambo kwonka, kandi omwiru wange araakira.
8 Na nyowe ndi hansi y’obusobozi obw’abantu abandi, kandi nyine abaserikale abandukwebembera. Obu ngambira omu nti, ‘Genda!’ agenda, kandi n’obu ngambira ondi nti, ‘Ija!’ aija, obu ngambira omwiru wange nti, ‘Kora kinu!’ akikora.”
9 Yesu obu yahuliire ebi, yahunirra muno yahinduka yarora abantu abakaba nibamuhondera, yabagambira ati: “Nimbagambira nti, n’obu haakuba omu Isaleri, tinkarozere omuntu weena anyakwine okwikiriza okw’amaani nka kunu.”
10 Kandi abo abakaba batumirwe obu baagarukire omu ka, baasanga omwiru akizire, ali mwomeezi kurungi.
11 Hanyuma y’ebi, Yesu yagenda omu rubuga rwa Naini ali n’abegeswa be hamu n’ekitebe ky’abantu baingi.
12 Obu yahikire haihi n’omulyango gw’orubuga, dora! abantu bakaba bahimbire omutumbi gw’omusigazi nibaguturukya aheeru y’orubuga. Nyina akaba ali mufaakati kandi onu nuwe omwana wenka ow’akaba aine. Ekitebe ky’abantu kuruga omu rubuga bakaba bali n’omukazi onu.
13 Yesu obu yamurozere, yamukwatirwa embabazi, yamugambira ati: “Leka kurra.”
14 Yairra haihi, yakwata h’akatabu nambere bakaba bahimbiire omutumbi, kandi abakaba baguhimbire baayemerra. Yagamba ati: “Musigazi, ninkugambira nti, imuka!”
15 Omusigazi ow’akaba afiire yaimuka, kandi yatandika kubaza. Yesu yamugarurra nyina.
16 Abantu boona baatiina muno, kandi baatandika kukugiza Ruhanga, nibagamba bati: “Nabbi ow’amaani azookere omuli itwe,” kandi “Ruhanga aijukire abantu be.”
17 Kandi amakuru agarukumukwataho gaararanga omu Buyudaaya yoona n’omu biikaro byona ebigyetoroire.
18 Nubwo abegeswa ba Yohana baagenda baamugambira ebintu ebi byona.
19 Yohana yatuma babiri hali bo, bagende bakaguze Mukama waitu bati: “Niiwe Ogu ou tutaaha tulindiriire, rundi tunihireyo ondi?”
20 Obu baahikire nambere ali, baamugambira bati: “Yohana Omubatizi atutumire hali iwe tukukaguze tuti: ‘Niiwe Ogu ou tutaaha tulindiriire, rundi tunihireyo ondi?’”
21 Omu saaha egi yakiza abantu baingi abarukusaasa, abarwaire muno, yabinga emyoyo emibi, kandi baingi abafiire amaiso yabakiza baatandika kuhweza.
22 Nubwo Yesu yabagambira ati: “Mugende mugambire Yohana ebi muboine n’ebi muhuliire: Abafu b’amaiso nibarora, abalema nibarubata, abagenge nibasemezebwa, abafu b’amatu nibahurra, abafu nibahumbuurwa, kandi abanaku nibagambirwa amakuru amarungi.
23 Aine okusemererwa ogu atatabaijuka habwange.”
24 Abantu Yohana abaakaba atumire obu baagenzere, Yesu yatandika kugambira ekitebe ky’abantu ebirukukwata hali Yohana. Yabakaguza ati: “Kiki eki mwagenzere kurora omu irungu? Orubingo orutwarwatwarwa omuyaga?
25 Hati, mukagendayo kurora ki? Omusaija anyakujwaire orugoye orurungi? Abo abajwara engoye eza sente nyingi kandi baine byona ebi barukugonza baikara omu maju g’abakama.
26 Mali mukagendayo kurora ki? Kurora nabbi? Mali nimbagambira nti; Ogu ou mwagenzere kurora naakira obukuru nabbi.
27 Ogu nuwe baahandiikireho bati: ‘Dora! Nintuma omukwenda wange ow’arakwebembera, kandi ow’arakuteekaniriza omuhanda!’
28 Nimbagambira nti, omu bantu abazairwe abakazi, tihakabahoga muntu arukukira Yohana obukuru, baitu omuntu owa hansi omu Bukama bw’omu iguru naamukira.”
29 Abantu boona n’abasorooza b’omusoro obu baahuliire eki, baarangirra ngu Ruhanga ahikiriire, habwokuba bakaba babatiziibwe n’okubatizibwa kwa Yohana.
30 Baitu Abafalisaayo n’abo abakaba bamanyire kurungi Ebiragiro, bakanga kuhondera obuhabuzi Ruhanga yabahaire habwokuba Yohana atababatize.
31 “Abantu ab’obusinge bunu ninsobora kubalengesaniza na ki? Kandi nibasisana nooha?
32 Nibasisana abaana abato abaikaliire omu katale nibeetangana nibagamba bati: ‘Tukabaterra enyamulere, baitu timwazina, twabaterra empamo, baitu timwaganya.’
33 Omu mulingo nugwo gumu, Yohana Omubatizi akaija atarukulya ebyokulya kandi atarukunywa amaarwa baitu nimugamba muti: ‘Aroho daimooni.’
34 Omwana w’omuntu obu aizire naalya kandi naanywa, baitu nimugamba muti: ‘Dora! omusaija ow’omururu kandi arukunywa amaarwa, munywani w’abasorooza b’omusoro n’abasiisi.’
35 Omu mulingo nugwo gumu, amagezi garorwa nk’ag’okuhikirra kusigikirra hali ebi ebirugamu.”*
36 Omu h’Abafalisaayo akaikara naamusaba kwija kulya na uwe ekiihuro. Yesu yataaha omu nju y’Omufalisaayo yaikarra ha meeza.
37 Kandi dora! omukazi akaba amanyirwe omu rubuga ngu musiisi, obu yakimanyire ngu Yesu ali omu nju y’Omufalisaayo naalya, yaija aine ecupa ey’amagita agarukuboya kurungi.
38 Yagenda haihi n’ebigere bya Yesu, yatandika kurra naabijubya n’amaziga ge, kandi yagasiimuura naakozesa isoke lye. Hanyuma yanywegera ebigere bye kandi yabiseesaho amagita agarukuboya kurungi.
39 Omufalisaayo ow’akaba araaliize Yesu obu yarozere eki, yatandika kuteekereza ati: “Omusaija onu kakuba abaire ali nabbi, yakubaire amanyire omukazi onu arukumukwataho muntu wa mulingo ki, kandi nk’oku ali musiisi.”
40 Baitu Yesu yamugambira ati: “Simooni, haroho eki naakugondeze kukugambira.” Simooni yagamba ati: “Mwegesa, kingambire.”
41 “Haroho omuntu akaba naabanja abasaija babiri sente; omu akaba naamubanja dinaali 500, baitu ondi naamubanja dinaali 50.
42 Obu baabuzirwe eky’okumusasura, boona yabaganyira. Hati, hali bo babiri, nooha arukwija kumugonza kukirayo?”
43 Simooni yamugarukamu ati: “Ninteekereza, ogu ayaganyiirwe sente nyingi.” Yesu yamugarukamu ati, “Ogarukiremu kurungi.”
44 Nubwo yahinduka yarora omukazi kandi yagambira Simooni ati: “Norora omukazi onu? Obu ntaahire omu nju yaawe, tompaire amaizi ag’okunaaba ebigere byange, baitu omukazi onu ajubize ebigere byange n’amaziga ge kandi yagasiimuuraho n’isoke lye.
45 Iwe toonywegiire, baitu kuruga obu ntaahire omu nju enu, omukazi onu aikaire naanywegera ebigere byange.
46 Toseesere amagita ha mutwe gwange, baitu omukazi onu aseesere amagita agarukuboya kurungi ha bigere byange.
47 Ninkugambira nti, habwokuba akozere kinu, n’obu kiraaba ngu ebibi bye bingi, biganyiirwe, habwokuba ayolekere okugonza kwingi. Baitu ogu anyakuganyirwa bike, ayoleka okugonza kuke.”
48 Hanyuma yagambira omukazi ati: “Ebibi byawe bikuganyiirwe.”
49 Abo abakaba baikaliire ha meeza baatandika kugambirangana bati: “Onu nooha arukuganyira ebibi?”
50 Baitu Yesu yagambira omukazi ati: “Okwikiriza kwawe kukujunire, genda n’obusinge.”
Obugambo Obuli Hansi
^ Nk’oku kiri, “kusigikirra h’abaana baago.”
