Nk’Oku Yahandiikirwe Luka 8:1-56
-
Abakazi abasendekeriize Yesu (1-3)
-
Orufumo rw’omusigi (4-8)
-
Ensonga habwaki Yesu yakozeseze enfumo (9, 10)
-
Orufumo rw’omusigi rusobororwa (11-15)
-
Etaara tesemeriire kuswekwa (16-18)
-
Nyina Yesu n’abegenzi be (19-21)
-
Yesu aculeeza omuyaga (22-25)
-
Yesu asindika daimooni omu mpunu (26-39)
-
Muhara wa Yairo; omukazi akwata ha kijwaro kya Yesu ekya haruguru (40-56)
8 Hanyuma y’obwire buke yagenda omu buli rubuga, n’omu byaro naatebeza kandi naarangirra amakuru amarungi ag’Obukama bwa Ruhanga. Kandi ikumi na babiri bakaba bali na uwe,
2 hamu n’abakazi abamu abakaba babingirwemu emyoyo emibi kandi bakiziibwe endwaire: Malyamu ow’akaba naayetwa Magadalene, ayabingirwemu daimooni musanju,
3 Yoana mukazi wa Cuza, omusaija ayarolerraga enju ya Herodi; Susana hamu n’abakazi abandi baingi abaali nibabaheereza nibakozesa ebintu byabo.
4 Ekitebe ky’abantu obu kyayesoroize hamu n’abo abaagendaga nambere Yesu ali omu buli rubuga oruyagendamuga, yabaza na bo naakozesa orufumo ati:
5 “Omusigi akagenda kusiga embibo ye, obu akaba naasiga, embibo ezimu zaagwa harubaju rw’omuhanda, baazirubatirra kandi ebinyonyi eby’omu mwanya byazisoma.
6 Ezimu zaagwa ha mwandara, kandi hanyuma y’okumera zaayoma habwokuba zikaba zitaine amaizi.
7 Ezindi zaagwa omu mahwa zaakurra hamu n’amahwa, kandi amahwa gaazinyoroza.
8 Baitu ezindi zaagwa omu itaka erirungi, kandi hanyuma y’okumera zaayana ebijuma zaatezaamu emirundi 100.” Obu yamazire kubaza ebintu binu, yagamba ati: “Ow’aine amatu ag’okuhurra, ahurre.”
9 Baitu abegeswa be baamukaguza amakuru g’orufumo runu.
10 Yabagambira ati: “Inywe mwikiriziibwe kwetegereza eby’ensita ebirukwera eby’Obukama bwa Ruhanga, baitu hali abandi biri omu nfumo, nukwo n’obu baraaba nibarora batahweza, kandi n’obu baraaba nibahurra, bateetegereza amakuru gaabyo.
11 Ganu nugo amakuru g’orufumo runu: Embibo nikyo ekigambo kya Ruhanga.
12 Ezi ezaagwire harubaju rw’omuhanda nubo abo abahurra kandi Sitaani* aija abaihamu ekigambo ekibyairwe omu mitima yabo nukwo bataikiriza bakajunwa.
13 Ezi ezaagwire ha mwandara nubo abo, obu bahurra ekigambo, bakitangirra n’okusemererwa baitu tibaine mihama omuli bo. Baikiriza habw’akasumi, baitu obu bahikwaho okulengwa, bagwa.
14 Kandi ezi ezaagwire omu mahwa nubo abo abahurra, baitu habw’okwetuntura n’okutwalirizibwa itungo hamu n’eby’okwesemeza eby’omu bwomeezi bunu, bibanyoroleza kimu, kandi tibaana ekijuma kyona ekirungi.
15 Kandi egi eyagwire ha itaka erirungi, nubo abantu hanyuma y’okuhurra ekigambo, n’omutima omurungi bakigumiraho kandi baana ebijuma n’okugumiisiriza.
16 “Busaho muntu weena hanyuma y’okuhemba etaara agisweka n’ekigega rundi agiteeka hansi y’ekitabu, baitu agiteeka ha kikondo kyayo nukwo abo abarataahamu basobole kurora ekyererezi.
17 Baitu busaho ekiswekerwe ekitalisukurwa kandi busaho kintu ekiserekerwe n’obwegendereza ekitalimanywa kandi kikarorwa omu rwijwire.
18 Nahabweki, mwegendereze omulingo muhurramu, baitu ogu weena anyakwine alyongerwaho, baitu ogu ow’ataine n’ekyarukuteekereza ngu aine, kirimwihwaho.
19 Nubwo nyina n’abagenzi be baija nambere ali, baitu tibaasobora kumuhika haihi habw’abantu kuba baingi.
20 Baamugambira bati: “Nyoko n’abagenzi baawe bemeriire aheeru, nibagonza kukurora.”
21 Yesu yabagarukamu ati: “Nyina nyowe n’abagenzi bange nubo banu abahurra ekigambo kya Ruhanga kandi bakakiteeka omu nkora.”
22 Kiro kimu uwe n’abegeswa be bakatemba eryato kandi yabagambira ati: “Leka twambuke tugende nseeri y’enyanja.” Kandi baagenda.
23 Baitu obu bakaba nibagenda, yagwijagira. Ihunga ery’amaani lyateera ha nyanja kandi eryato lyabo lyatandika kwijura amaizi kandi baaba omu kabi.
24 Baagenda baamwimukya nibagamba bati: “Mwegesa, Mwegesa, twagenda kuhwerekerra!” Yaimuka yacoomera ihunga n’ebigonzi eby’amaani, byaculeera kandi haabaho okutekaana.
25 Hanyuma yabakaguza ati: “Okwikiriza kwanyu kuli nkaha?” Baitu bakaba batiinire muno kandi bahuniriire nibagambirangana bati: “Onu muntu wa mulingo ki? Naaragira ihunga n’amaizi nibimworobera.”
26 Hanyuma, baahika ha bwerre omu kicweka ky’Abagerasene, ekiri nseeri ya Galiraaya.
27 Yesu obu yahikire ha bwerre, omusaija ow’aine daimooni kuruga omu rubuga akaija kumutangatangana. Akaba amazire akasumi akaraihire atarukujwara engoye, atarukwikara omu nju, kandi naikara omu kiikaro ekirumu ebituuro.
28 Obu yarozere Yesu, yakunga yagwa hansi omu maiso ge kandi yatokera haiguru naagamba ati: “Ontuzire ki, iwe Yesu, Omwana wa Ruhanga Anyakuli Haiguru Muno? Ninkwesengereza otambonabonesa.”
29 (Habwokuba Yesu akaba aragiire omwoyo mubi kuruga omu musaija ogu. Emirundi nyingi gwamukwataga, kandi emirundi nyingi yasibwaga enjegere hamu n’empingo kandi nibaikara bamulinzire, baitu yazicwaga kandi daimooni n’emutwara omu biikaro nambere hatali bantu.)
30 Yesu yamukaguza ati: “Ibara lyawe niiwe oha?” Yagamba ati: “Legioni,”* habwokuba daimooni nyingi zikaba zimutaahiremu.
31 Kandi zaikara nizesengereza Yesu ataziragira kugenda omu kiina ekitaine bugarukiro.
32 Hakaba haroho igana ly’empunu erikooto niziriira ha rusozi, nubwo daimooni zaamwesengereza aziikirize zitaahe omu mpunu, kandi yaziikiriza.
33 Daimooni zaaruga omu musaija ogu zataaha omu mpunu, kandi igana ly’empunu lyajumbutuka lyasirimuka lyagwa omu nyanja zafeeramu.
34 Baitu abaliisa b’empunu obu baarozere ekyabaireho, bairuka baakigambira ab’omu rubuga n’omu byaro.
35 Kandi abantu baija kurora ekibaireho. Baija hali Yesu baasanga omusaija ow’akaba arugirwemu daimooni ajwaire engoye naayetegereza kurungi, aikaliire haihi n’ebigere bya Yesu, kandi baatiina muno.
36 Abo abaarozere ebyabaireho, baabagambira omulingo omusaija ow’akaba aine daimooni nk’oku akiziibwe.
37 Hanyuma abantu baingi kuruga omu biikaro ebyetoroire ekicweka eky’Abagerasene baagambira Yesu abarugeho agende, habwokuba bakaba batiinire muno. Hanyuma yatemba eryato arugeyo.
38 Baitu omusaija ow’akaba arugirwemu daimooni yaikara naamwesengereza bagende hamu, baitu Yesu yamugambira ati:
39 “Garuka owanyu, kandi oikale nogambira abandi Ruhanga ebi akukoliire.” Kandi omusaija yagenda naarangirra omu rubuga rwona Yesu ebi akaba amukoliire.
40 Yesu obu yagarukire Galiraaya, abantu baamutangirra kurungi habwokuba bakaba nibamunihira.
41 Baitu dora! Omusaija arukwetwa Yairo yaija; omusaija onu akaba ali mukuru w’isorrokaniro. Yateeza amaju hansi omu maiso ga Yesu kandi yatandika kumwesengereza aije omu nju ye,
42 habwokuba muhara we ow’akaba aine wenka, ow’akaba aine nk’emyaka 12, akaba ali haihi kufa.
Yesu obu akaba naagenda, ekitebe ky’abantu kyamufunza.
43 Hakaba haroho omukazi ow’akaba arwaire ekyejwiso ky’esagama kumara emyaka 12, kandi atatunge muntu weena ayasoboire kumukiza.
44 Yamwizira enyuma yakwata ha mukugiro gw’ekijwaro kye ekya haruguru, kandi ahonaaho ekyejwiso ky’esagama kyaleka.
45 Yesu yakaguza ati: “Nooha ankwasireho?” Boona obu bakaba nibakyehakana, Petero yagamba ati: “Mwegesa abantu nibakufunza kandi nibakumigiiriza.”
46 Baitu Yesu yagamba ati: “Haroho omuntu ow’ankwasireho, habwokuba nkyetegeriize ngu amaani gandugiremu.”
47 Omukazi obu yakimanyire ngu bamwetegeriize, yaija atiinire naatukumira, yateeza amaju omu maiso ge, yagambira abantu boona habwaki amukwasireho kandi nk’oku akizire ahonaaho.
48 Baitu Yesu yamugambira ati: “Mwisiki, okwikiriza kwawe nukwo kukukirize. Genda n’obusinge.”
49 Obu akaba naakyabaza, omuntu ow’atumirwe kuruga omu ka y’omukuru w’isorrokaniro yaija naagamba ati: “Muhara waawe afiire; leka kutalibaniriza busa omwegesa.”
50 Yesu obu yakihuliire yamugambira ati: “Otatiina, baitu ba n’okwikiriza kyonka, muhara waawe naija kwongera abe mwomeezi.”
51 Obu yahikire omuka, ataikirize omuntu ondi weena kutaaha na uwe omu nju oihireho Petero, Yohana, Yakobo, ise mwisiki, hamu na nyina.
52 Abantu boona bakaba nibarra kandi nibateera empamo. Yesu yabagambira ati: “Muleke kurra, omwisiki tafiire, baitu agwijagiire.”
53 Baatandika kumusekereza habwokuba bakaba bakimanyire ngu afiire.
54 Baitu Yesu yakwata omwisiki omukono kandi yamweta ati: “Mwisiki, imuka!”
55 Omwisiki yayongera yaba mwomeezi* kandi yaimuka ahonaaho, kandi Yesu yabagambira bamuhe ekyokulya.
56 Bazaire be baasemererwa muno, baitu yabaragira kutagambira muntu weena ekibaireho.
Obugambo Obuli Hansi
^ “Omu Ruyonaani, diabolos, ekirukumanyisa ‘omuhangirizi.’”
^ Omu ihe ly’Abarooma, legioni emu ekaba erumu abaserikale abali hagati ya 4,000 na 6,000.
^ Nk’oku kiri, “omwoyo gwe gwamugarukamu.”
