Nk’Oku Yahandiikirwe Luka 9:1-62
-
Ikumi na babiri baheebwa oburagirizi oburukukwata ha buheereza (1-6)
-
Herodi ahunirra obu ahurra ebirukukwata hali Yesu (7-9)
-
Yesu aliisa abantu 5,000 (10-17)
-
Petero agamba ngu Yesu nuwe Kristo (18-20)
-
Yesu abazaaho okufa kwe (21, 22)
-
Kuba mwegeswa ow’amananu (23-27)
-
Okuhindurwa kwa Yesu (28-36)
-
Omwojo ow’akaba aine daimooni akizibwa (37-43a)
-
Yesu ayongera abazaaho okufa kwe (43b-45)
-
Abegeswa bateera empaka ha nooha arukukirayo obukuru (46-48)
-
Ogu weena ow’atarukutuhakaniza ali harubaju rwaitu (49, 50)
-
Ekyaro ky’Abasamaliya kyanga Yesu (51-56)
-
Omulingo osobora kuhondera Yesu (57-62)
9 Hanyuma, yayeta ikumi na babiri yabaha amaani n’obusobozi obw’okubinga daimooni zoona, n’okukiza endwaire.
2 Kandi yabatuma bagende batebeze Obukama bwa Ruhanga n’okukiza abantu,
3 kandi yabagambira ati: “Mutatwara ekintu kyona habw’orugendo, n’obu gwakuba omwigo, n’obu yaakuba ensaho nambere mutwarra ebyokulya, n’obu gwakuba omugaati, n’obu zaakuba sente rundi engoye ibiri.
4 Obu murataahaga omu ka y’omuntu, mwikaleyo kuhikya murugireyo.
5 Kandi hoona nambere muragenda abantu bakanga kubatangirra, obu murabaga nimuruga omu rubuga oru, mweteereho ecuucu enyakuli ha bigere byanyu, nk’obwakaiso hali bo.”
6 Baagenda omu kicweka kyona, nibaraba omu buli kyaro nibatebeza amakuru amarungi kandi nibakiza abantu buli hamu.
7 Herodi omulemi w’isaza obu yahuliire byona ebyali nibibaho, yatiina muno habwokuba abamu bakaba nibagamba ngu Yohana akaba ahumbuukire kuruga omu bafu,
8 baitu abandi bakaba nibagamba ngu Eriya akaba abonekere, kandi abandi bakaba nibagamba ngu omu ha banabbi aba ira, ahumbuukire.
9 Herodi yagamba ati: “Yohana nkamutemaho omutwe. Hati onu nooha ou ndukuhurraho ebintu binu?” Nahabweki akaba naagonza muno kumurora.
10 Abakwenda obu baagarukire, baagambira Yesu byona ebi bakaba bakozere. Nubwo yabatwara baagenda omu kiikaro ekitarumu bantu, omu rubuga orurukwetwa Betesaida.
11 Baitu ekitebe ky’abantu obu baakimanyire, baamuhondera. Yabatangirra omu mulingo ogw’embabazi, kandi yatandika kubagambira ebirukukwata ha Bukama bwa Ruhanga, kandi yakiza abo abaali nibagonza kukizibwa.
12 Obwire bwatandika kwira. Ikumi na babiri baija nambere ali, baamugambira bati: “Raga abantu, bagende omu biikaro ebyetoroire ekicweka kinu, n’omu byaro, nukwo betungire ah’okuraara n’ebyokulya, habwokuba tuli omu kiikaro ekyesoroire.”
13 Baitu yabagambira ati: “Mubahe ebyokulya.” Baamugarukamu bati: “Ebi twine tibirukumara, oihireho twine emigaati etaano n’encu ibiri, rundi itwe tugende tugule ebyokulya ebiraamara abantu banu boona.”
14 Hakaba haroho abasaija nka 5,000. Baitu Yesu yagambira abegeswa be ati: “Mubaikalize mubabaganizeemu omu bitebe by’abantu ataano-ataano.”
15 Kandi eki nikyo baakozere baabaikaliza hansi.
16 Yesu yakwata emigaati etaano n’encu ibiri, yarora omu iguru, yasaba. Hanyuma yagicwamu, yagiha abegeswa be bagigabire ekitebe ky’abantu.
17 Boona baalya baiguta kandi baasorooza ebigega 12, eby’obucwekacweka obwasigaireho.
18 Hanyuma obu akaba ali wenka naasaba, abegeswa baija nambere ali kandi yabakaguza ati: “Abantu nibagamba ngu ninyowe oha?”
19 Baamugarukamu bati: “Yohana Omubatizi* baitu abandi baagamba ngu Eriya, kandi abandi baagamba ngu omu ha banabbi ahumbuukire.”
20 Hanyuma yabakaguza ati: “Baitu inywe nimugamba ngu ninyowe oha?” Petero yamugarukamu ati: “Kristo wa Ruhanga.”
21 Nubwo yabateererra kinu kutakigambiraho omuntu ondi weena,
22 baitu yabagambira ati: “Omwana w’omuntu aine kuraba omu kubonabona kwingi, kandi abakuru b’abantu, banyakatagara abakuru, hamu n’abahandiiki bamwange kandi aitwe, baitu ha kiro ekya kasatu, ahumbuurwe.”
23 Hanyuma yagumizaamu naabagambira boona ati: “Omuntu weena ow’arukugonza kumpondera, ayeyangise* wenka, ahimbe omuti gwe buli kiro kandi aikale nampondera.
24 Ogu weena ow’arukugonza kujuna obwomeezi bwe alibufeerwa, baitu weena ow’afeerwa obwomeezi bwe habwange, alibujuna.
25 Mali nikigasa ki omuntu kutunga ensi yoona, baitu akafeerwa obwomeezi bwe rundi akahwerekerra?
26 Baitu ogu weena ow’akwatwa ensoni habwange, na habw’ebigambo byange, Omwana w’omuntu na uwe alimukwatirwa ensoni, obu alizira omu kitiinisa kye, n’ekya Ise, n’ekya bamalaika abarukwera.
27 Mananu kwo nimbagambira nti, haroho bamu abemeriire hanu abatalifa kuhikya bamazire kurora Obukama bwa Ruhanga.”
28 Hanyuma y’ebiro nka munaana amazire kubaza ebigambo binu, yatwara Petero, Yohana, na Yakobo, baatemba orusozi kugenda kusaba.
29 Kandi Yesu obu akaba naasaba, yahinduka h’amaiso ge, ekijwaro kye kyayangasana muno kyayera tiitiiti.*
30 Kandi dora! abasaija babiri bakaba nibabaza na uwe; bakaba nubo Musa na Eriya.
31 Bakabonekera omu kitiinisa, baatandika kubazaaho okugenda kwe, oku akaba ali haihi kuhikiiriza omu Yerusalemu.
32 Baitu Petero n’abo abaakaba ali na bo bakaba bagwijagiire, baitu obu baasisiimukire, baarora ekitiinisa kya Yesu, n’abasaija babiri abakaba bemeriire na uwe.
33 Kandi abasaija banu obu bakaba nibarugaho Yesu, Petero yamugambira ati: “Mwegesa, kirungi itwe kuba hanu, leka twombeke hanu eheema isatu, emu yaawe, emu ya Musa kandi endi ya Eriya.” Baitu Petero ateetegereze ebi akaba naabaza.
34 Baitu obu akaba naakyabaza ebintu binu, ekicu kyaija kyabaswekerra. Obu bakaba nibataaha omu kicu, batiina muno.
35 Kandi iraka lyaruga omu kicu eki, nirigamba liti: “Onu nuwe Omwana wange, ow’akomerwe. Mumuhuliirize.”
36 Obu bakaba nibakyahurra iraka, baarora Yesu ali wenka. Baitu bakaculeera kandi ebintu ebi baarozere batabigambire omuntu ondi weena omu biro ebi.
37 Ekiro ekyahondiireho obu baarugire ha rusozi, ekitebe ky’abantu baingi baija kumutangaana.
38 Kandi dora! omusaija ow’akaba ali omu kitebe ky’abantu yatokera haiguru, naagamba ati: “Mwegesa, ninkwesengereza rora mutabani wange, habwokuba nuwe wenka ou nyine.
39 Omwoyo gumukwata kandi ahonaaho, atandika kukunga, nigumunaga hansi naasambagana, naaleeta ifuro omu kanwa, kandi kigumire muno kumurugaho n’obu guba gumazire kumuhutaaza.
40 Nyesengeriize abegeswa baawe kugubinga baitu baalemwa.”
41 Yesu yagamba ati: “Inywe abantu ab’obusinge bunu abataine okwikiriza kandi abahabire, ndaikara na inywe kuhikya di, kandi ndabagumiisiriza kuhikya di? Mutabani waawe mundetere hanu.”
42 Obu akaba naamuleeta, daimooni ekamunaga hansi kandi yamuleetera kusambagana muno. Baitu Yesu yacoomera omwoyo omubi, yakiza omwana kandi yamugarurra ise.
43 Kandi boona baahunirra muno habw’amaani ga Ruhanga amaingi.
Boona obu bakaba baahuniriire habw’ebintu ebi akaba naakora, yagambira abegeswa be ati:
44 “Muhuliirize kurungi kandi mwijuke ebigambo binu, Omwana w’omuntu naagenda kugobezebwa aheebweyo omu mikono y’abantu.”
45 Baitu bateetegereze ebi akaba naabaza. Kikabaserekwa nukwo batakyeteegereza, kandi bakatiina kumukaguza eki akaba naamanyisa.
46 Hanyuma, baatandika kuteera empaka ha nooha omuli bo, arukukirayo obukuru.
47 Baitu Yesu obu yamanyire ebi barukuteekereza omu mitima yaabo, yaleeta omwana omuto yamwemereza ha rubaju rwe,
48 yabagambira ati: “Weena anyakutangirra omwana omuto onu omu ibara lyange, aba atangiriire nyowe; kandi ogu anyakutangirra nyowe, aba atangiriire n’Ogu ayantumire. Kandi ogu ow’ayetwara kuba wa hansi omuli inywe, nuwe omukuru.”
49 Nubwo Yohana yamugambira ati: “Mwegesa, turozere omuntu naabinga daimooni, naakozesa ibara lyawe, kandi twalengaho kumutanga habwokuba tarukukuhondera nka itwe.”
50 Baitu Yesu yamugarukamu ati: “Mutalengaho kumutanga habwokuba ogu weena ow’atarukubahakaniza, ali harubaju rwanyu.”
51 Ebiro bye eby’okutwarwa omu iguru obu bikaba nibirra haihi, akacweramu kimu kugenda omu Yerusalemu.
52 Nahabweki, akasindika abatumwa bamubanzeyo. Obu baagenzere, bataaha omu kyaro ky’Abasamaliya nukwo bamuteekanirize.
53 Baitu batamutangirre habwokuba akaba acwiremu kugenda Yerusalemu.
54 Abegeswa be, Yakobo na Yohana obu baarozere eki, baagamba bati: “Mukama waitu, noogonza twete omurro kuruga omu iguru, gwije gubahwerekereze?”
55 Baitu yahinduka yabahana.
56 Nubwo baagenda omu kyaro ekindi.
57 Obu bakaba nibagenda omu muhanda, omuntu yagambira Yesu ati: “Ninyija kukuhondera hoona nambere oragenda.”
58 Baitu Yesu yamugarukamu ati: “Eboha ziine ebiina, n’ebinyonyi eby’omu mwanya biine ebiju, baitu Omwana w’omuntu taine ah’okuteeka omutwe gwe.”
59 Hanyuma yagambira ondi ati: “Fooka muhondezi wange.” Omusaija yamugarukamu ati: “Mukama wange, nyikiriza mbanze ngende nziike isenyowe.”
60 Baitu Yesu yamugarukamu ati: “Leka abafu baziike abafu baabo, baitu iwe genda orangirre buli hamu hoona Obukama bwa Ruhanga.”
61 Kandi ondi yamugambira ati: “Mukama wange, ninyija kukuhondera baitu banza onyikirize ngende ndage ab’omu nju yange.”
62 Yesu yamugarukamu ati: “Busaho muntu ow’aba naalimisa ekyoma eky’okulimisa akarora ebintu ebiri enyuma, asemeriire Obukama bwa Ruhanga.”
Obugambo Obuli Hansi
^ Rundi, “Omubatiza.”
^ Rundi, “aleke kutwaza obwomeezi bwe nk’oku arukugonza.”
^ Rundi, “kyayangasana muno nk’omurabyo.”
