Nk’Oku Yahandiikirwe Marako 10:1-52
10 Obu yarugireyo oku, yagenda ha mitaano ya Buyudaaya nseeri ya Yorudaani, ekitebe ky’abantu baayongera kwesorooleza nambere ali. Yatandika kubeegesa nk’oku engeso ye ekaba eri.
2 Abafalisaayo baija nambere ali n’ekigendererwa eky’okumulenga, baamukaguza obu kiraaba nikiikirizibwa omu biragiro omusaija kubinga* mukazi we.
3 Yabakaguza ati: “Kiki Musa eki yabaragiire?”
4 Baamugarukamu bati: “Musa akaikiriza omusaija kubinga mukazi we n’okumuha ebbaruha erukwoleka ngu amubingire.”
5 Baitu Yesu yabagarukamu ati: “Habw’emitima yanyu kugumangana, niyo ensonga habwaki Musa yabahandikiire ekiragiro eki.
6 Baitu kurugira kimu ha kutandika kw’okuhanga, ‘Akabahanga omusaija n’omukazi.
7 Habw’ensonga enu, omusaija alirekaho ise na nyina,
8 kandi babiri balifooka mubiri gumu,’ tibakyali babiri, baitu mubiri gumu.
9 Nahabweki, Ruhanga eki ateraniize hamu, omuntu atalikibaganizaamu.”
10 Obu baagarukire omu nju, abegeswa be baatandika kumukaguza ha nsonga egi.
11 Yabagambira ati: “Weena anyakubinga* mukazi we kandi akaswera ondi, aba asihaine kandi aba agobiize mukazi we,
12 kandi n’omukazi obu alekaho* iba, akaswerwa omusaija ondi, aba asiihaine.”
13 Abantu baatandika kumuleetera abaana abato abakwateho, baitu abegeswa be baabacoomera.
14 Yesu obu yakirozere yabiihirwa, kandi yabagambira ati: “Muleke abaana abato baije nambere ndi, mutabatanga, habwokuba Obukama bwa Ruhanga bwabo abali nk’abaana abato.
15 Mananu kwo nimbagambira nti, omuntu weena ow’atatangirra Obukama bwa Ruhanga nk’omwana omuto, talibutaahamu.”
16 Yakiikira abaana kandi yabaha omugisa, naabateekaho emikono ye.
17 Obu akaba naarubata omu muhanda, omusaija yaija nairuka, yateeza amaju omu maiso ge, kandi yamukaguza ati: “Omwegesa omurungi, kiki eki nsemeriire kukora kugwetwa obwomeezi obutahwaho?”
18 Yesu yamugarukamu ati: “Habwaki nonyeta omurungi? Busaho murungi weena oihireho Ruhanga wenka.
19 Omanyire ebiragiro: ‘Otaliita, otalisiihana, otaliiba, otaliha obwakaiso obw’ebisuba, otaligobeza, oteekemuga so na nyoko ekitiinisa.’”
20 Omusaija yamugarukamu ati: “Mwegesa, ebiragiro ebi byona nyikaire nimbyorobera kurugira kimu omu buto bwange.”
21 Yesu yamurora yamugonza, kandi yamugambira ati: “Noburwaho ekintu kimu kyonka. Genda otunde ebintu byawe ogabire abanaku, kandi olyetungira itungo omu iguru, hanyuma oije ofooke muhondezi wange.”
22 Omusaija obu yahuliire eki, yaasalirwa muno, yagenda agweriirwe habwokuba akaba aine ebintu bingi.
23 Hanyuma ya Yesu kubetoroozaamu amaiso, yagambira abegeswa be ati: “Ka nikiija kugumira muno abaguuda kutaaha omu Bukama bwa Ruhanga!”
24 Baitu abegeswa be baahunirra muno, habw’eki yabalize. Yesu yabagambira ati: “Baana bange, ka kigumire kutaaha omu Bukama bwa Ruhanga!
25 Kyanguhire engamiya kuraba omu kahuru k’enkinzo, kukira omuntu omuguuda kutaaha omu Bukama bwa Ruhanga.”
26 Baayongera kuhunirra muno kandi baamugambira bati: “Nooha asobora kujunwa?”
27 Yesu yabarora, yagamba ati: “Hali abantu tikirukusoboka, baitu hali Ruhanga nikisoboka, habwokuba hali Ruhanga ebintu byona nibisoboka.”
28 Petero yamugambira ati: “Dora! Tukasigaho ebintu byaitu byona twakuhondera.”
29 Yesu yagamba ati: “Mananu kwo nimbagambira nti, busaho ayasigireho enju, bagenzi be, banyaanya, nyina, ise, abaana, rundi ebibanja habwange na habw’amakuru amarungi,
30 atalitunga ebirukukiraho emirundi 100 omu kasumi kanu—amaju, bagenzi be, banyaanya, banyina, abaana n’ebibanja, hamu n’okuhiiganizibwa kandi omu businge oburukwija, atunge obwomeezi obutahwaho.
31 Baitu baingi ab’okubanza, baliba b’okumalirra kandi ab’okumalirra babe ab’okubanza.”
32 Obu bakaba bali omu muhanda nibagenda Yerusalemu, Yesu abebembiire, baahunirra muno, kandi abo abakaba babahondiire baatandika kutiina. Yayongera yatwara ikumi na babiri harubaju, yatandika kubagambira ebintu ebikaba biri haihi kumuhikaho.
33 “Dora! Nitugenda Yerusalemu kandi Omwana w’omuntu naija kuheebwayo omu mikono ya banyakatagara abakuru n’abahandiiki. Nibaija kumucwera omusango gw’okufa kandi bamuheyo hali abanyamahanga,
34 kandi balimusekereza, bamucwere ebicwanta, bamubonabonese kandi bamwite, baitu hanyuma y’ebiro bisatu, alihumbuuka.”
35 Yakobo na Yohana, batabani ba Zebedaayo baija nambere ali baamugambira bati: “Mwegesa, nitugonza otukorre kyona eki turakusaba.”
36 Yabakaguza ati: “Nimugonza mbakorre ki?”
37 Baamugarukamu bati: “Twikirize twikarre, omu ha mukono gwawe ogw’obulyo, kandi ondi ha mukono gwawe ogw’emoso, omu kitiinisa kyawe.”
38 Yesu yabagambira ati: “Timurukumanya eki murukusaba. Nimusobora kunywera ha kikopo eki ndukunyweraho, rundi mubatizibwe n’okubatizibwa oku ndukubatizibwamu?”
39 Baamugarukamu bati: “Ego, nitusobora.” Yesu yabagambira ati: “Ekikopo eki ndukunyweraho, mulikinyweraho n’okubatizibwa okundukubatizibwa, mulikubatizibwa.
40 Baitu okwikarra ha mukono gwange ogw’obulyo rundi ogw’emoso, tali ninyowe arukucwamu baitu kyabo, abaakiteekaniriziibwe.”
41 Abandi ikumi obu baakihuliire, baabiihirirwa Yakobo na Yohana.
42 Baitu Yesu yabeeta nambere ali, yabagambira ati: “Mumanyire ngu abo abarorwa nk’abalemi b’amahanga, balema abantu n’ikama, n’abakuru balema n’obukaali.
43 Baitu inywe mutaba nka bo, ogu weena arukugonza kuba mukuru omuli inywe, asemeriire kuba muheereza wanyu,
44 kandi weena arukugonza kuba w’okubanza omuli inywe, asemeriire kuba mwiru wa boona.
45 N’Omwana w’omuntu ataije kuheerezebwa, baitu okuheereza n’okuhayo obwomeezi bwe nk’ekicunguro habw’abaingi.”
46 Hanyuma, baija Yeriko. Baitu Yesu n’abegeswa be, hamu n’ekitebe ky’abantu, obu bakaba nibaruga omu Yeriko, Batimayo (mutabani wa Timayo) ow’akaba afiire amaiso kandi ayasabirizaaga, akaba aikaliire ha rubaju rw’omuhanda.
47 Obu yahuliire ngu ni Yesu Omunyanazaleesi, yatandika kutokera haiguru naagamba ati: “Yesu, Omwana wa Daudi, ngirra embabazi!”
48 Baingi baatandika kumucoomera nibamugambira aculeere, baitu yayongera kutokera haiguru naagamba ati: “Omwana wa Daudi, ngirra embabazi!”
49 Nubwo, Yesu yayemerra yagamba ati: “Mumunyetere.” Baayeeta omusaija ow’afiire amaiso nibagamba bati: “Guma! Imuka, aliyo naakweta.”
50 Yanaga ekijwaro kye ekya haruguru, yaimuka yaija hali Yesu.
51 Yesu yamugambira ati: “Nogonza nkukorre ki?” Omusaija ow’afiire amaiso yamugambira ati: “Rabboni, leka amaiso gange garole.”
52 Kandi Yesu yamugambira ati: “Genda, okwikiriza kwawe kukukirize.” Ahonaaho omusaija yatandika kuhweza, kandi yatandika kumuhondera omu muhanda.
Obugambo Obuli Hansi
^ Rundi, “kugaitururwa na.”
^ Rundi, “anyakugaitururwa na.”
^ Rundi, “anyakugaitururwa na.”
