Nk’Oku Yahandiikirwe Marako 11:1-33
11 Obu bakaba bali haihi kuhika Yerusalemu, bali Besifage na Besaniya ha Rusozi orw’Emizaituni, Yesu yatuma abegeswa be babiri
2 yabagambira ati: “Mugende omu kyaro kiri eki murukurora, obu muraaba mwakataahamu muti, nimwija kurora omwana gw’endogoya ogutakaikalirwahoga omuntu weena, gusibikirwe. Mugusumurre, mugundetere hanu.
3 Kandi omuntu weena obu arabakaguza ati, ‘Habwaki nimukora ekintu eki?’ mumugambire muti, ‘Mukama waitu naagwetaaga kandi hanyuma nitwija kugugarra bwangu.’”
4 Nahabweki baagenda baasanga omwana gw’endogoya gusibikirwe ha mulyango, aheeru harubaju rw’omuhanda kandi baagusumurra.
5 Baitu abamu abakaba bemeriire aho, baabakaguza bati: “Habwaki nimusumurra omwana gw’endogoya?”
6 Baabagambira ebi byonyini Yesu ebi akaba abagambiire, kandi baabaleka baagenda.
7 Omwana gw’endogoya baaguleetera Yesu, baagwaraho eby’okujwara byabo ebya haruguru, yagwikarraho.
8 Kandi abandi baingi baayara ebijwaro byabo ebya haruguru omu muhanda kandi abandi baacwa amataagi ha miti ey’omu kisaka.
9 Baitu abo abaali bebembiire, n’abo abaali nibahondera enyuma, bakaikara nibatokera haiguru nibagamba bati: “Nitusaba, ojune! Aine omugisa ogu anyakwizira omu ibara lya Yahwe!
10 Buhairwe omugisa, Obukama oburukwija obwa Isiitwe Daudi! Nitusaba ojune, iwe anyakuli omu iguru!”
11 Akahika Yerusalemu kandi yataaha omu yekaru, yarabyamu amaiso yarora buli kimu kyona, baitu habwokuba obwire bukaba buli haihi kwira yarugayo yagenda Besaniya ali hamu na ikumi na babiri.
12 Ekiro ekyahondiireho, obu baali nibaruga Besaniya, yarumwa enjara.
13 Yalengera omuti gw’omutiini gwine amababi, kandi yagenda kurora obu araaba naasobora kusangaho ebijuma. Baitu obu yaguhikireho, atasangeho kantu koona, oihireho amababi gonka habwokuba ako kakaba katali kasumi k’emitiini kwana.
14 Nahabweki, yagugambira ati: “Busaho muntu alyongera kulya ha bijuma byawe ebiro n’ebiro.” Kandi abegeswa be baali nibahurra.
15 Baahika Yerusalemu. Hanyuma, yataaha omu yekaru kandi yatandika kubingamu abo boona abaali nibatunda kandi nibagura ebintu omu yekaru, yajuumika emeeza zaabo abaali nibahingisa sente, hamu n’entebe zaabo abaali nibatunda amaiba.
16 Kandi ataikirize omuntu weena kurabya ekintu kyona omu yekaru.
17 Akaba naabeegesa naagamba ati: “Kitahandiikwe ngu, ‘Enju yange eryetwa enju ey’okusabiramu hali amahanga goona’? Baitu mugifoire obwingira bw’abasuma.”
18 Banyakatagara abakuru n’abahandiiki obu baakihuliire, baatandika kuserra omulingo baramwita; baitu bakaba nibamutiina, habwokuba ekitebe ky’abantu boona baahunirraga habw’omulingo yayegesaamuga.
19 Obwire obu bwatandikire kwira, baaturuka orubuga.
20 Baitu nyenkyakara obu baali nibarabaho, baarora omuti omutiini gumazire kwoma kuhikira kimu ha mihama yagwo.
21 Petero obu yaijukire, yamugambira ati: “Rabbi, dora! omuti omutiini ogw’okyenerege gwomere.”
22 Yesu yamugarukamu ati: “Mube n’okwikiriza omuli Ruhanga.
23 Mananu kwo nimbagambira nti, weena ow’agambira orusozi runu ati, ‘Ruga hanu onagwe omu nyanja’ atarukugurukyagurukya omu mutima gwe kandi aine okwikiriza ngu eki abalize nikigenda kubaho, nikiija kubaho.
24 Enu niyo ensonga habwaki nimbagambira nti, ebintu byona ebi musaba, mube n’okwikiriza ngu mubitungire kandi mulibiheebwa.
25 Kandi obu murayemerraga kusaba, muganyire abo boona ababasobiize nukwo Isiinywe ow’omu iguru na uwe asobole kubaganyira ebibi byanyu.”
26 ——
27 Bakongera baija Yerusalemu. Kandi obu akaba naarubata omu yekaru, banyakatagara abakuru n’abahandiiki hamu n’abakuru b’abantu baija,
28 baamukaguza bati: “Obusobozi obw’okukora ebintu binu n’obwiha nkaha? Kandi nooha ayabukuhaire?”
29 Yesu yabagarukamu ati: “Na nyowe leka mbakaguze ekikaguzo kimu. Mungarukemu. Kandi na nyowe ninyija kubagambira nambere nyiha obusobozi obw’okukora ebintu binu.
30 Okubatiza kwa Yohana, kwali nikuruga omu iguru, rundi hali abantu? Mungarukemu.”
31 Baatandika kugambirangana bonka bati: “Obu turagamba ngu, ‘Kuruga omu iguru,’ naija kutukaguza ati, ‘Habwaki mutaramwikiririzeemu?’
32 Rundi tugambe ngu, ‘Kukaruga omu bantu’?” Bakaba nibatiina ekitebe ky’abantu habwokuba boona baakitwaraga ngu mali Yohana akaba ali nabbi.
33 Nahabweki, baagarukamu Yesu bati: “Titumanyire.” Yesu yabagambira ati: “Na nyowe tindukwija kubagambira nambere nyiha obusobozi obw’okukora ebintu binu.”
