Nk’Oku Yahandiikirwe Marako 12:1-44
12 Nubwo yatandika kubeegesa naakozesa enfumo ati: “Omuntu akabyara omusiri ogw’emizabbibbu yagwetorooza orugo, yalima ah’okujungira eviini, yayombeka omunaara; kandi yagenda omu ihanga erindi, omusiri yagulekera abalimi kugurolerra.
2 Akasumi ak’okunoga obu kaahikire, yatuma omwiru we hali abalimi bamunogere emizabbibbu omu musiri.
3 Baitu baakwata omwiru ogu baamuteera, baamubinga ataine kantu koona.
4 Yayongera yatuma omwiru ondi nambere bali, baitu baamuhutaaza omutwe kandi baamuswaza.
5 Hanyuma yatuma ondi, kandi ogu baamwita. Yasindika n’abandi baingi, abamu baabateera, kandi abandi baabaita.
6 Baitu akaba asigaizeyo omu, mutabani we ow’arukugonza muno. Ha kumalirra, na uwe yamubatumira naagamba ati: ‘Mutabani wange nibaija kumuteekamu ekitiinisa.’
7 Baitu abalimi abo, baagambirangana bati: ‘Onu nuwe omugwetwa, mwije, tumwite kandi obugwetwa nibwija kuba bwaitu.’
8 Nahabweki, baamukwata baamwita kandi baamunaga aheeru y’omusiri gw’emizabbibbu.
9 Mukama w’omusiri alikora ki? Aliija, aite abalimi banu, kandi omusiri aguhe abandi.
10 Timukasomaga ekyahandiikirwe kinu: ‘Ibaale abombeki eri baayangire, niryo lifookere ibaale erikuru erya ha nsonda.
11 Linu lirugire hali Yahwe, nirihuniiriza muno omu maiso gaitu’?”
12 Baagonza kumukwata, baitu baatiina ekitebe ky’abantu, habwokuba bakakimanya ngu omu kucwa orufumo runu, nubo akaba naabazaaho. Baamurugaho baagenda.
13 Hanyuma, baamusindikira bamu h’Abafalisaayo n’abahondezi ba Herodi nukwo bamukwate omu bigambo bye.
14 Obu baahikire nambere ali, baamugambira bati: “Mwegesa, tukimanyire ngu obaza amananu, oyegesa omuhanda gwa Ruhanga omu mananu, kandi tohondera enteekereza z’abantu, habwokuba toteeka omutima ha nzooka y’abantu. Kihikire kusasura omusoro hali Kaisaali rundi nangwa?
15 Tusemeriire kugusasura rundi nangwa?” Obu yayetegeriize obugobya bwabo, yabagambira ati: “Habwaki nimundenga? Mundetere edinaali ngirole.”
16 Baagimuleetera, kandi yabakaguza ati: “Ekisisani n’ebigambo ebiri ha kinusu kinu by’oha?” Baamugarukamu bati: “Bya Kaisaali.”
17 Na uwe yabagambira ati: “Ebya Kaisaali mubihe Kaisaali, kandi ebya Ruhanga mubihe Ruhanga.” Eki kyabahuniiriza muno.
18 Abasadukaayo abagamba ngu busaho kuhumbuuka bakaija baamukaguza bati:
19 “Mwegesa, Musa akahandiika ati: ‘Kakuba omusaija afa akalekaho mukazi we atazaire omwana, mugenzi we asemeriire kuswera omukazi ogu nukwo amuzarre abaana.’
20 Hakaba haroho abasaija musanju abakaba nibazaarwa hamu. Ow’okubanza yaswera omukazi, baitu yafa batakazaire omwana.
21 Owakabiri yamuswera, baitu na uwe yafa batakazaire omwana, n’owakasatu nikyo kimu ekyamuhikireho.
22 Kandi boona musanju baafa batazaire omwana. Hanyuma, omukazi na uwe yafa.
23 Obu balihumbuuka, omukazi onu aliba w’oha? Habwokuba boona musanju akaba ali mukazi wabo.”
24 Yesu yabagarukamu ati: “Enu niyo ensonga habwaki muhabire, habwokuba timumanyire Ebyahandiikirwe nobugaakuba amaani ga Ruhanga.
25 Obu balihumbuuka kuruga omu bafu, abasaija tibaliswera, n’abakazi tibaliswerwa, baitu baliba bali nka bamalaika omu iguru.
26 Kandi obu kirukuhika h’abafu kuhumbuurwa, timukasomaga omu kitabu kya Musa ebirukukwata ha kisaka, Ruhanga obu yamugambiire ati: ‘Ninyowe Ruhanga wa Iburahimu, Ruhanga wa Isaka kandi Ruhanga wa Yakobo?’
27 Ali Ruhanga ow’abomeezi hatali ow’abafu. Muhabire muno.”
28 Omu h’abahandiiki ow’akaba aizire kandi yahurra nibateera empaka, obu yakimanyire ngu abagarukiremu kurungi, yamukaguza ati: “Kiragiro ki eky’okubanza omu biragiro byona?”
29 Yesu yamugarukamu ati: “Eky’okubanza nikyo kinu, ‘Hurra, iwe Isaleri, Yahwe Ruhanga waitu ali Yahwe omu.
30 Kandi ogonzege Yahwe Ruhanga waawe n’omutima gwawe gwona, n’obwomeezi bwawe bwona, n’ebiteekerezo byawe byona, n’amaani gaawe goona.’
31 Ekyakabiri nikyo kinu, ‘Osemeriire kugonza mutaahi waawe nk’oku oyegonza wenka.’ Busaho ekiragiro ekindi kyona ekirukukira ebiragiro binu.”
32 Omuhandiiki yamugambira ati: “Mwegesa, obalize kurungi, kandi mali ago nugo mananu. ‘Ruhanga ali omu, kandi tiharoho ondi, oihireho uwe wenka.’
33 Kandi omuntu kugonza Ruhanga n’omutima gwe gwona, n’ebiteekerezo bye byona, n’amaani ge goona, n’okugonza mutaahi we nk’oku ayegonza wenka, nikikira ebihongwa byona ebyokeze* ebihikiriire hamu n’ebyonzira.”
34 Kandi Yesu obu yakyetegeriize ngu omuhandiiki akaba agarukiremu omu mulingo gw’amagezi, yamugambira ati: “Toli hara n’Obukama bwa Ruhanga.” Kandi busaho muntu ayatungire obumanzi obw’okwongera kumukaguza.
35 Baitu Yesu yagumizaamu naayegesa omu yekaru, naagamba ati: “Habwaki abahandiiki bagamba ngu Kristo mwana wa Daudi?
36 Daudi wenyini akaterekerezebwa omwoyo ogurukwera, yagamba ati: ‘Yahwe akagambira Mukama wange ati: “Ikarra ha mukono gwange ogw’obulyo okuhikya obu nditeeka abanyanzigwa baawe hansi y’ebigere byawe.”’
37 Daudi uwe wenyini naamweta Mukama we, hati nikiija kita ngu mutabani we?”
Abantu baali nibegondeza omu kuhuliiriza ebi akaba naabaza.
38 Kandi obu akaba naakyayegesa, yagamba ati: “Mwerinde abahandiiki abagonza kurubata bajwaire amaganduura, abagonza abantu babaramukye omu butale,
39 kwikarra omu biikaro eby’omu maiso omu masorrokaniro, n’omu biikaro ebirukukirayo ekitiinisa ha biihuro ebya rwebagyo.
40 Banyaga ebintu* by’abafaakati, kandi habw’okugonza kweyoleka basaba esaara eziraihire. Banu balitunga ekifubiro ekirukukirayo kuba eky’amaani.”
41 Yaikarra haihi n’obusanduuko obu baanagamuga sente kandi yarora omulingo abantu bakaba nibanagamu sente. Kandi abaguuda baingi bakaba nibanagamu ebinusu bingi.
42 Nubwo omufaakati omunaku yaija, yanagamu obunusu bubiri obutaito obw’omuhendo muke muno.
43 Yesu yayeta abegeswa be nambere ali, yabagambira ati: “Mananu kwo nimbagambira nti, omufaakati onu omunaku atairemu sente nyingi kukira abandi boona abataire sente omu busanduuko.
44 Habwokuba boona batairemu ezibasagiriire, baitu uwe omu bunaku bwe, atairemu byona ebi abaire aina byo, itungo lye lyona.”
