Nk’Oku Yahandiikirwe Marako 13:1-37
13 Obu akaba naaruga omu yekaru, omu h’abegeswa be yamugambira ati: “Mwegesa, dora! Amabaale n’ebyombeko ebisemiire!”
2 Baitu Yesu yamugambira ati: “Nimurora ebyombeko ebi eby’amaani? Busaho ibaale na limu eririsigara haiguru y’ibaale erindi, litanagirwe hansi.”
3 Obu akaba aikaliire ha Rusozi rw’Emizaituni aroleriire yekaru, Petero, Yakobo, Yohana na Andereya baamugakuza omu nsita bati:
4 “Tugambire ebintu binu biribaho di, kandi kokurorraho ki akalyoleka ngu ebintu binu byona biri haihi kubaho?”
5 Yesu yatandika kubagambira ati: “Mwerinde, hatabaho muntu weena ayabahabisa.
6 Baingi baliija omu ibara lyange nibagamba ngu, ‘Ninyowe ogu,’ kandi balihabisa baingi.
7 Kandi obu mulihurra obulemu, n’amakuru agarukubazaaho obulemu, mutalitiina habwokuba ebintu binu bisemeriire kubaho, baitu empero eriba etakahikire.
8 “Ihanga liritaahirra erindi, n’obukama butaahirre obundi, halibaho emisisa omu bicweka ebirukwahukana, kandi halibaho ibura ly’ebyokulya. Binu biriba ntandiko y’emihito.
9 “Baitu inywe, mwerinde. Abantu balibahayo omu mbuga z’ebiragiro, balibaterra omu masorrokaniro, kandi babemereze omu maiso g’abalemi n’abakama habwange, nukwo bube bwakaiso hali bo.
10 Ekindi, amakuru amarungi galibanza kutebezebwa omu mahanga goona.
11 Kandi obu baliba nibabatwara kubahayo, mutalyeralikirra eki mulibaza baitu kyona eki muliheebwa omu kasumi ako, nikyo mubaze habwokuba tali ninywe muliba nimubaza, baitu omwoyo ogurukwera.
12 Kandi omuntu alihayo mugenzi we aitwe, ise mwana aheyo omwana we, n’abaana baliimukirra abazaire baabo, babaheyo baitwe.
13 Kandi mulinobwa abantu boona habw’ibara lyange. Baitu ogu ow’aligumiisiriza kuhikya ha mpero, nuwe alijunwa.
14 Baitu obu mulirora ekinugwa ekirukuleetaho kuhwerekerra, kyemeriire nambere kitasemeriire kwemerra (omusomi akozese okwetegereza), nubwo abo abali omu Buyudaaya, batandike kwirukira omu nsozi.
15 N’omuntu ow’aliba ali haiguru y’enju, atalisirimuka rundi kutaaha omu nju ye, kwihamu ekintu kyona.
16 N’ogu ow’ali omu musiri, ataligaruka enyuma kutabarra ekijwaro kye ekya haruguru.
17 Balikibona abakazi abaliba baine enda, n’abo abaliba nibonkya abaana, omu biro ebi.
18 Mwikale nimusaba ngu akasumi ako, katahika omu bwire bw’obutiti;
19 habwokuba omu kasumi ako, halibaho omuhito ogutakabahoga kuruga Ruhanga ahanga ensi kuhikya kasumi ako. Kandi tigulyongera kubaho.
20 Amananu gali, kakuba Yahwe atarakeeheze ebiro ebi, busaho n’omu ayakukizireho. Baitu habwabo abayakomeremu, ebiro ebi alibikeehya.*
21 “Nahabweki, kakuba omuntu abagambira ati: “Dora! Kristo ali hanu,’ rundi ‘Dora! Nguli ali hali,’ mutakiikiriza.
22 Habwokuba Bakristo ab’ebisuba na banabbi ab’ebisuba baliija kandi balikora obwokurorraho, n’ebintu ebirukuhuniiriza nukwo bahabise abantu, obu kiraaba nikisoboka, bahabise n’abo abakomerwemu.
23 Baitu inywe mwikale muli bulindaara. Nabagambira ebintu binu byona bitakabaireho.
24 “Baitu omu biro ebi, hanyuma y’omuhito ogu, izooba liriswekwa omwirima, okwezi kulireka kujwa,
25 enyunyuuzi zirihanuuka omu iguru, n’amaani ag’omu iguru galitengesebwa.
26 Kandi hanyuma balirora Omwana w’omuntu naizira ha bicu eby’omu mwanya, n’amaani maingi n’ekitiinisa.
27 Kandi alituma bamalaika basorooze hamu abakomerwemu be, kuruga omu mbaju ina,* kuruga ha mpero y’ensi kuhika ha mpero y’iguru.
28 “Mwegere ha kyokurorraho eky’omuti omutiini. Amataagi gaagwo obu gatandika kukura kandi gakateekaho amababi, mumanya ngu akasumi k’omusana kali haihi kuhika.
29 Omu mulingo nugwo gumu, obu mulirora ebintu binu nibibaho, mumanye ngu ali haihi ha rwigi.
30 Mananu kwo nimbagambira nti, obusinge bunu tibulihwaho, kuhikya ebintu binu byona bimazire kuhikirra.
31 Iguru n’ensi birihwaho, baitu ebigambo byange tibirihwaho.
32 “Baitu ekiro eki, rundi esaaha egi, busaho ow’abimanyire, n’obubaakuba bamalaika omu iguru rundi Omwana, oihireho Isenyowe wenka.
33 Mwikale nimurora kandi mwikale muli bulindaara, habwokuba timumanyire nambere akasumi ako akatairweho kalihikira.
34 Nikisobora kulengesanizibwa n’omusaija ayalekereho enju ye, yagenda omu nsi eya hara, yaha abairu be obusobozi kandi buli omu yamuha omulimo gwe, kandi yaragira ow’arukulinda ha mulyango kwikara ali bulindaara.
35 Nahabweki, mwikale muli bulindaara habwokuba timumanyire ekiro mukama w’enju eki aliiziramu, obundi omu bwire bwa rwebagyo, rundi ekiro omu itumbi, rundi obwire butakakiire, rundi nyenkyakara muno,
36 nukwo obu araija ataraganiize, atabasanga mugwijagiire.
37 Baitu ekindukubagambira, ninkigambira n’abandi boona nti: Mwikale muli bulindaara.”
