Nk’Oku Yahandiikirwe Marako 14:1-72
-
Banyakatagara bahanuura kwita Yesu (1, 2)
-
Amagita agarukuboya kurungi gaseeswa hali Yesu (3-9)
-
Yuda agobeza Yesu (10, 11)
-
Okuhingurwaho okw’okumalirra (12-21)
-
Omukoro gw’Ekiihuro kya Mukama Waitu Ekya Rwebagyo gutandikwaho (22-26)
-
Yesu agambira Petero ngu naija kumwehakana (27-31)
-
Yesu asaba ali omu Gesesemane (32-42)
-
Yesu akwatibwa (43-52)
-
Acwerwa omusango omu maiso g’Orukurato (53-65)
-
Petero ayehakana Yesu (66-72)
14 Hakaba nihaburayo ebiro bibiri, Okuhingurwaho* n’Obugenyi obw’Emigaati Etatumbisiibwe buhike. Banyakatagara abakuru hamu n’abahandiiki bakaba nibaserra omulingo ogw’amagezi nk’oku baramukwata kandi bamwite.
2 Baitu bakaba nibagambirangana bati: “Tutamukwata ha kiro ky’obugenyi, habwokuba abantu nibasobora kuleetaho akaimukirro.”
3 Obu akaba ali Besaniya, aikaliire naalya omu nju ya Simooni omugenge, omukazi akaija aine ecupa y’amagita agarukuboya, amarungi muno aga naadi,* agatatabwirwemu ekintu ekindi kyona kandi ag’omuhendo omwingi muno. Yasumurra ecupa, yatandika kugaseesa ha mutwe gwa Yesu.
4 Baitu abamu baabiihirwa, baagambirangana bati: “Habwaki amagita ganu nigafa busa?
5 Gabaire nigasobora kutundwa edinaali ezirukuhingura omu 300, kandi sente ezo zikaheebwa abanaku!” Baabiihirirwa* muno omukazi.
6 Baitu Yesu yabagambira ati: “Omukazi mumuleke. Habwaki nimumuleetera kwetuntura? Ankoliire ekintu ekirungi.
7 Abanaku mwikara na bo obwire bwona, nimusobora kubakorra ebirungi obwire bwona obu murukugonza, baitu timurukwija kuba na nyowe obwire bwona.
8 Akozere eki arukusobora, obu aseesere amagita agarukuboya ha mubiri gwange, kunteekaniza kuziikwa.
9 Mananu kwo nimbagambira nti, hoona nambere amakuru amarungi galitebezebwa omu nsi yoona, omukazi onu eki akozere, kiritebezebwa kumwijuka.”
10 Kandi omu ha ikumi na babiri, arukwetwa Yuda Isikalyota akagenda hali banyakatagara abakuru, n’ekigendererwa eky’okumuhayo hali bo.
11 Obu baakihuliire, baasemererwa muno, baamuraganiza kumuha sente ez’efeeza. Nahabweki, yatandika kuserra akagisa ak’okumugobeza.
12 Ha kiro eky’okubanza eky’Emigaati Etatumbisiibwe, ekiro eki baaherahoga ekihongwa eky’Okuhingurwaho nk’oku kyaragiirwe, abegeswa be baamukaguza bati: “Ninkaha nambere orukugonza tugende tukuteekanirize ah’oraliira Okuhingurwaho?”
13 Nubwo yasindika abegeswa be babiri, yabagambira ati: “Mugende omu rubuga, nimwija kutangaana omusaija ahimbire ensoha y’amaizi, mumuhondere.
14 Hoona nambere arataaha, mugambire mukama w’enju egi muti: ‘Omwegesa agambire ati: “Ekisiika ky’abagenyi kiri nkaha, nambere ndaaliira Okuhingurwaho n’abegeswa bange?”’
15 Naija kubooleka ekisiika ekikooto ekya haiguru, kirumu byona ebi turukwetaaga kukozesa. Oku nuho mututeekanirize.”
16 Nubwo abegeswa be baagenda baataaha omu rubuga, baasanga byona ebi abagambiire nukwo biri, baateekaniza Okuhingurwaho.
17 Obu bwahikire rwebagyo, yaija ali na ikumi na babiri.
18 Obu baali baikaliire ha meeza nibalya, Yesu yabagambira ati: “Mananu kwo nimbagambira nti, omu hali inywe abarukulya hamu na nyowe, naija kungobeza.”
19 Baatuntura muno kandi buli omu yatandika kumukaguza ati: “Ninyowe?”
20 Yabagambira ati: “Ali omu ha ikumi na babiri, ogu arukukoza na nyowe omu bbakuli.
21 Omwana w’omuntu naagenda nk’oku kyamuhandiikirweho, baitu alikibona ogu aligobeza Omwana w’omuntu. Kyakubaire kirungi kakuba omuntu ogu, atarazairwe.”
22 Obu bakaba nibakyalya, yakwata omugaati yasaba, yagucwamu, yagubaha, naagamba ati: “Mukwate, gunu nigukikirra omubiri gwange.”
23 Hanyuma yakwata ekikopo, yasiima, yakibaha, baanywaho.
24 Yabagambira ati: “Kinu nikikikirra ‘esagama yange ey’ekiragaano,’ ey’erukwija kuseeseka habwa baingi.
25 Mananu kwo nimbagambira nti, tindyongera kunywa amaarwa kuruga omu mizabbibbu, kuhikya ha kiro kiri obu ndiganywa na inywe gali mahyaka omu Bukama bwa Ruhanga.”
26 Hanyuma, obu baamazire kuzina ebizina eby’okukugiza, baagenda ha Rusozi orw’Emizaituni.
27 Yesu yabagambira ati: “Inywena nimwija kutabaijuka, habwokuba kikahandiikwa kiti: ‘Nditeera omuliisa kandi entaama zoona ez’omu igana ziriraranga.’
28 Baitu obu ndihumbuurwa, ndibabanza kugenda Galiraaya.”
29 Baitu Petero yamugambira ati: “Abandi boona n’obu baratabaijuka, nyowe tindukwija kutabaijuka.”
30 Yesu yamugambira ati: “Mananu kwo ninkugambira nti, kiro kinu omu bwire bw’ekiro bunu bwonyini, enkoko etakakookere emirundi ebiri, noija kunyehakana emirundi esatu.”
31 Baitu Petero yaikara naagamba ati: “N’obu kiranyetaagisa kufa na iwe, tindukwija kukwehakana.” N’abandi boona baagamba ekintu nikyo kimu.
32 Hanyuma baija omu kiikaro ekirukwetwa Gesesemane, kandi yagambira abegeswa be ati: “Mwikarre hanu ngende nsabe.”
33 Yatwara Petero, Yakobo, na Yohana, yatandika kuhurra obujune bw’amaani n’okwetuntura muno.
34 Yabagambira ati: “Nimpurra obujune obw’amaani, nibwenda n’okunyita. Musigale hanu kandi mwikale nimurora.”
35 Yayeyongerayo omu maiso kake, yateeza amaju, yainama hansi yasaba ngu obu kiraaba nikisoboka, esaaha egi emuhinguleho.
36 Kandi yagamba ati: “Abba, Taata, hali iwe ebintu byona nibisoboka, nyihaho ekikopo kinu. Baitu hatali nk’oku ndukugonza, baitu Iwe nk’oku orukugonza.”
37 Yagaruka yabasanga bagwijagiire, kandi yagambira Petero ati: “Simooni, ogwijagiire? Toine amaani ag’okwikara norora, habw’esaaha emu yonka?
38 Mwikale nimurora kandi mwikale nimusaba, nukwo mutagwa omu kwohebwa. Ky’amananu ngu, omwoyo nigugonza baitu omubiri muceke.”
39 Yayongera yagenda kusaba kandi yabaza ebigambo nibyo bimu.
40 Yayongera yagaruka, yasanga bagwijagiire, habwokuba bakaba baine oturo twingi kandi baaburwa eky’okumugarukamu.
41 Yagaruka omurundi ogwakasatu, kandi yagamba ati: “Omu bwire nka bunu, mukyagwijagiire kandi muhuumwire! Eki nikimara, obwire buhikire! Dora! Omwana w’omuntu naagenda kugobezebwa, aheebweyo omu mikono y’abasiisi.
42 Mwimuke, tugende. Dora! Ow’arangobeza airiire haihi.”
43 Ahonaaho obu akaba naakyabaza, Yuda, omu ha ikumi na babiri, yaija n’ekitebe ky’abantu bakwasire empirima n’emiigo, batumirwe banyakatagara abakuru, abahandiiki, hamu n’abakuru b’abantu.
44 Ayamugobiize akaba abagambiire akokurorraho nambere baakumumanyiire, naagamba ati: “Ogu ou ndanywegera, nuwe ogu, mumukwate kandi mumulinde kurungi atabatorokaho.”
45 Yaizira kimu nambere ali, yamugambira ati: “Rabbi!” kandi yamunywegera.
46 Baija baamukwata.
47 Baitu omu hali abo abaali bemeriire harubaju aho, yasomorayo empirima ye, yatemaho okutu kw’omwiru wa nyakatagara omukuru, yakucwaho.
48 Yesu yabagambira ati: “Mwizire kunkwata mwine empirima n’emiigo, nk’abarukukwata omusuma?
49 Buli kiro, naikaraga ndi na inywe omu yekaru ninyegesa, baitu mutankwate. Baitu kinu kibaireho nukwo Ebyahandiikirwe bisobole kuhikirra.”
50 Kandi abegeswa be boona baamusigaho bairuka.
51 Baitu omusigazi omu, ow’akaba ayesibire orugoye orurungi orw’ekitaani rwonka ha mubiri gwe, yatandika kumuhondera naamugendera haihi. Kandi obu baalengereho kumukwata,
52 yairuka yasigaho orugoye rwe orw’ekitaani, yagenda ali busa.*
53 Hanyuma, baatwara Yesu hali nyakatagara omukuru, kandi banyakatagara boona abakuru, n’abakuru b’abantu, hamu n’abahandiiki, baayesorooza hamu.
54 Baitu Petero yaikara amuhondiire haraho, kuhikira kimu omu zigati ya nyakatagara omukuru; kandi yaikarra hamu n’abaheereza b’omu nju, naayota omurro.
55 Banyakatagara abakuru n’ab’Orukurato Orukuru* boona bakaba nibaserra obwakaiso obw’ebisuba oburukukwata hali Yesu, obu barasigikirraho kumwita, baitu batabutunge.
56 Baingi baali nibaha obwakaiso obw’ebisuba, baitu obwakaiso bwabo bwali butarukwikirraniza.
57 Haroho abamu abaali bemeriire nibamubazaaho obwakaiso obw’ebisuba, nibagamba bati:
58 “Tukamuhurra naagamba ati: ‘Ninyija kuseesa hansi yekaru eyayombekerwe n’emikono kandi nyombeke endi omu biro bisatu, etombekerwe n’emikono.’”
59 Baitu bunu nabwo bwali butarukwikirraniza.
60 Hanyuma nyakatagara omukuru yayemerra hagati yabo, yakaguza Yesu ati: “Eki nokibazaaho ki? Abasaija banu ebi barukukujunaana, mananu?”
61 Baitu yaikara aculiire, tiyamugarukamu. Nyakatagara omukuru yayongera yamukaguza ati: “Niiwe Kristo, Omwana w’Ogu Ahairwe Omugisa?”
62 Yesu yagarukamu ati: “Ninyowe, kandi mulirora Omwana w’omuntu aikaliire ha mukono gw’obulyo ogw’amaani, naizira ha bicu eby’omu iguru.”
63 Ahonaaho nyakatagara omukuru yataagura ekijwaro kye, naagamba ati: “Nimukyayetaaga obwakaiso obundi?
64 Mumwehuliriire naajuma Ruhanga. Nimucwamu ki?” Boona baamucwera ogw’okufa.
65 Abamu baatandika kumucwera ebicwanta, baamusweka h’amaiso kandi baamuteera entomi, nibagamba bati: “Obu oraaba oli nabbi, tugambire nooha akutiire?” Hanyuma y’okumuteera empi omu maiso, abaserikale baamwihaho, baamutwara.
66 Petero obu akaba ali hansi omu zigati, omu h’abazaana ba nyakatagara omukuru yaija,
67 obu yamurozere naayota omurro, yamwikazaho amaiso, yagamba ati: “Na iwe obaire oli na Yesu Omunyanazaleesi.”
68 Baitu yakyehakana, naagamba ati: “Timmumanyire, kandi tindukwetegereza ebi orukubaza,” Petero yagenda aheeru ha mulyango gw’okutaahiramu.
69 Omuzaana ogu obu yamurozere, yagambira abakaba bemeriire aho, ati: “Onu na uwe ali omu hali bo.”
70 Yayongera yakyehakana. Hanyuma y’obwire buke, abo abaali bemeriire haihi na Petero, baatandika kumugambira bati: “Amananu gali, oli omu hali bo habwokuba oli Omunyagaliraaya.”
71 Baitu yatandika kukyena n’okurahira, naagamba ati: “Omusaija ogu ou murukubazaaho, timmumanyire!”
72 Ahonaaho enkoko yakooka omurundi ogwakabiri, kandi Petero yaijuka Yesu eki akaba amugambiire ati: “Enkoko etakakookere emirundi ebiri, noija kunyehakana emirundi esatu.” Yasaalirwa muno kandi yatandika kurra.
Obugambo Obuli Hansi
^ Rora, Kusoborra Ebigambo.
^ Rora, Kusoborra Ebigambo.
^ Rundi, “Baatabukira.”
^ Rundi, “yagenda ajwaire ak’omunda konka.”
^ Rora, Kusoborra Ebigambo. “Orukurato Orukuru.”
