Nk’Oku Yahandiikirwe Marako 15:1-47
15 Ahonaaho nyenkyakara omu rukyakya, banyakatagara abakuru, bali hamu n’abakuru b’abantu, n’abahandiiki hamu n’ab’Orukurato Orukuru boona, baayesorooza hamu baahanuura, kandi baaboha Yesu baamutwara, baamuhayo hali Pirato.
2 Pirato yamukaguza ati: “Niiwe Omukama w’Abayudaaya?” Yesu yamugarukamu ati: “Niiwe wenka wakyegambira.”
3 Baitu banyakatagara abakuru bakaba nibamujunaana ebintu bingi.
4 Pirato yayongera yamukaguza ati: “Ebi nobibazaaho ki? Dora ebintu ebi byona ebi barukukujunaana.”
5 Baitu Yesu atagarukemu ekintu ekindi kyona, kandi Pirato yahunirra.
6 Buli murundi obugenyi obu bwabahoga, yalekeraga omunyankomo omu, abantu ou baasabaga.
7 Omu kasumi ako, omusaija arukwetwa Bbarabba akaba ali omu nkomo n’abandi abaali bajeemiire gavumenti, kandi omu kujeemera gavumenti bakaita n’abantu.
8 Ekitebe ky’abantu baatandika kusaba Pirato abakorre nk’oku yabakorraga.
9 Yabakaguza ati: “Nimugonza mbalekerre Omukama w’Abayudaaya?”
10 Habwokuba Pirato akaba akimanyire ngu banyakatagara abakuru baali bamuhaireyo habw’itima.
11 Baitu banyakatagara abakuru baimukiriza abantu basabe Pirato alekere Bbarabba omu kiikaro kya Yesu.
12 Pirato yayongera yabakaguza ati: “Hati onu ou mweta Omukama w’Abayudaaya mmukorre ki?”
13 Baayongera baatokera haiguru nibagamba bati: “Ahanikwe ha muti!”
14 Baitu Pirato yayongera yabakaguza ati: “Habwaki? Kibi ki eki akozere?” Baitu baayeyongera kutokera haiguru nibagamba bati: “Ahanikwe ha muti!”
15 Pirato habw’okugonza kusemeza abantu, yalekera Bbarabba. Kandi hanyuma y’okuragira ngu Yesu ateerwe kibbooko, yamuhayo ahanikwe ha muti.
16 Abaserikale baamutwara omu zigati, omu ka y’omulemi kandi baayeta abaserikale abandi boona.
17 Baamujweka orugoye orurukugaajuka kandi baaruka ekondo y’amahwa baagimujweka ha mutwe.
18 Baatandika kumugambira bati: “Obusinge bube na iwe, Omukama w’Abayudaaya!”
19 Ekindi, baamuteera ha mutwe nibakozesa orubingo, baamucwera ebicwanta, kandi baateeza amaju omu maiso ge nibamwinamira.
20 Obu baamazire kumusekereza, baamujuuramu orugoye orurukugaajuka kandi baamujweka ebijwaro bye ebya haruguru. Nubwo baamutwara kumuterra emisumaali ha muti.
21 Omusaija arukwetwa Simooni owa Kulene, ise Alekizanda na Rufo, akaba naarabaho naaruga omu kyaro. Baamuhambiriza kwetweka omuti gwa Yesu.
22 Yesu baamuleeta omu kiikaro ekirukwetwa Gologoosa, obu kihindurwa kimanyisa “Ekiikaro eky’Akahangara.”
23 Kandi baalengaho kumuha eviini etabwirwemu miira, baitu yayanga kuginywa.
24 Baamuterra emisumaali ha muti kandi baabagana ebijwaro bye nibakozesa okutoma, kurora buli omu eki aratwara.
25 Baamuterra emisumaali ha muti saaha isatu.
26 Omusango ogwali nigumujunaanwa gwahandiikwa h’akaapa omu bigambo binu: “Omukama w’Abayudaaya.”
27 Kandi baahanika abasuma babiri ha rubaju rwe, omu ha mukono gw’obulyo, n’ondi ha mukono gw’emoso.
28 ——
29 Abo abakaba nibarabaho, baamujuma nibahungya emitwe yabo, nibagamba bati: “Iwe ayagambire ngu nosobora kuseesa yekaru kandi nogyombekera omu biro bisatu,
30 wejune osirimuke oruge ha muti.”
31 Omulingo nugwo gumu, banyakatagara abakuru, bali hamu n’abahandiiki, baamusekereza nibagamba bati: “Abandi akabajuna, baitu uwe tasobora kwejuna!
32 Leka Kristo, Omukama wa Isaleri asirimuke kuruga ha muti, nukwo tukirole kandi tukiikirize.” N’abo abakaba bahanikirwe ha miti ha rubaju rwe, baamujuma.
33 Obu zaahikire saaha mukaaga, omwirima gwasweka ensi egi yoona kuhika saaha mwenda.
34 Kandi saaha mwenda, Yesu yayamirra omu iraka erya haiguru ati: “Eli, Eli, lama sabbakasani?” obu kihindurwa kimanyisa ngu, “Ruhanga wange, Ruhanga wange, habwaki onsigireho?”
35 Bamu h’abaali bemeriire aho baatandika kugamba bati: “Dora! Naayeta Eriya.”
36 Hanyuma omuntu omu yairuka, yaibika siponji* omu maarwa agarukusarra, yagiteeka ha rubingo, yamuha anywe naagamba ati: “Mumuleke! Leka turole Eriya obu araija akamuhanuurayo.”
37 Nubwo Yesu yakunga omu iraka erya haiguru kandi yafa.
38 Kandi orutimbi rwa yekaru rwatemukamu kabiri, kuruga haiguru kuhika hansi.
39 Omukuru w’abaserikale ow’akaba ayemeriire harubaju naarora ebyabaireho Yesu obu akaba naafa, yagamba ati: “Mananu kwo, omusaija onu abaire Mwana wa Ruhanga.”
40 Hakaba haroho n’abakazi nibarorra haraho, kandi bamu hali bo nubo, Malyamu Magadalene, Malyamu nyina Yakobo Omuto na Yose, hamu na Salome,
41 abaagendaga na Yesu kandi abaamuheerezaaga obu akaba ali Galiraaya, kandi hakaba haroho n’abakazi abandi baingi abaali baizire na uwe omu Yerusalemu.
42 Habwokuba obwire bwali bugenzere, kiri kiro ky’Okuteekaniza kandi ekiro ekirukuhonderaho eri Sabbiti,
43 hakaija Yusufu owa Alimaseya, omusaija ow’ekitiinisa ayaikarraga omu Rukurato kandi na uwe akaba alindiriire Obukama bwa Ruhanga. Akatunga obumanzi, yagenda hali Pirato yamusaba omutumbi gwa Yesu.
44 Baitu Pirato akagonza kumanya Yesu obu araaba amazire kufa. Yayeta mukuru w’abaserikale yamukaguza Yesu obu araaba amazire kufa.
45 Obu yamazire kukigumya kuruga hali mukuru w’abaserikale, yaikiriza Yusufu kutwara omutumbi gwa Yesu.
46 Hanyuma y’okugura orugoye orw’ekitaani orurungi yamuhanuura ha muti, yamuzinga omu rugoye oru, yamubyamya omu kituuro ekikaba kirimirwe omu mwandara. Hanyuma yakulingura ibaale yaliteeka ha mulyango gw’ekituuro.
47 Baitu Malyamu Magadalene na Malyamu nyina Yose, bakaikara baroleliire nambere akaba atairwe.
Obugambo Obuli Hansi
^ Ekirukumanyisa: Ekyangwe ekinyunyuuta amaizi.
