Nk’Oku Yahandiikirwe Marako 2:1-28
2 Hanyuma y’ebiro bike, akongera yagenda omu Kaperenaumu, kandi ekigambo kyararanga ngu ali muka.
2 Baingi bakesorooza kandi hakaba hatakyaroho mwanya, nobuhakuba ha mulyango, kandi yatandika kubatebeza ekigambo kya Ruhanga.
3 Baamuleetera omuntu ow’asaraire ahimbirwe abasaija bbana.
4 Baitu bakaba batasobora kumuhikya hali Yesu habwokuba abantu bakaba bali baingi muno, nahabweki baasakurra orusu rw’enju nambere Yesu akaba ali kandi omu kihuru baarabyamu ogu ow’asaraire abyamire h’akatabu.
5 Yesu obu yarozere okwikiriza kwabo, yagambira ow’asaraire ati: “Mwana wange, ebibi byawe biganyiirwe.”
6 Bamu h’abahandiiki baali baroho baikaliire nibateekereza omu mitima yabo bati:
7 “Habwaki omusaija ogu, naabaza omu mulingo ogu? Naajuma Ruhanga. Nooha asobora kuganyira ebibi, oihireho Ruhanga wenka?”
8 Baitu ahonaaho Yesu obu yakyetegeriize ngu nukwo barukuteekereza bati, yabagambira ati: “Habwaki nimuteekereza muti omu mitima yanyu?
9 Nikiha ekyanguhire, kugambira ow’asaraire ngu, ‘Ebibi byawe bikuganyiirwe,’ rundi kumugambira ngu, ‘Imuka ohimbe akatabu kaawe orubate’?
10 Baitu inywe kusobora kukimanya ngu Omwana w’omuntu aine obusobozi obw’okuganyira ebibi omu nsi—” yagambira ow’asaraire ati:
11 “Imuka ohimbe akatabu kaawe, ogende omu ka yaawe.”
12 Ahonaaho yaimuka yahimba akatabu ke, yaturuka aheeru naarubata kandi boona bamuroleriire. Boona baahunirra muno, baakugiza Ruhanga nibagamba bati: “Ekintu nka kinu titukakiroraga.”
13 Akongera yaraba ha musa gw’enyanja, kandi abantu baingi baikara nibaija nambere ali, yatandika kubeegesa.
14 Obu akaba naarubata, yarora Levi mutabani wa Alifaayo aikaliire nambere basorooleza omusoro, yamugambira ati: “Fooka muhondezi wange.” Ahonaaho yaimuka yamuhondera.
15 Hanyuma obu akaba naalya ekiihuro omu nju ya Levi, abasorooza b’omusoro baingi n’abasiisi bakaba baikaliire na Yesu n’abegeswa be nibalya, habwokuba baingi hali bo bakaba bamuhondiire.
16 Baitu abahandiiki n’Abafalisaayo obu baarozere naalya n’abasiisi hamu n’abasorooza b’omusoro, baatandika kugambira abegeswa be bati: “Habwaki naalya hamu n’abasooroza b’omusoro n’abasiisi?”
17 Yesu obu yakihuliire yabagambira ati: “Abomeezi tibetaaga dakitaali, baitu abarwaire nubo bamwetaaga. Ntaije kweta abantu abahikiriire, baitu abasiisi.”
18 Abegeswa ba Yohana n’Abafalisaayo baasiibaga. Nahabweki bakaija baamukaguza bati: “Habwaki abegeswa ba Yohana n’abegeswa b’Abafalisaayo basiiba, baitu abegeswa baawe tibasiiba?”
19 Yesu yabagarukamu ati: “Banywani b’omuswezi obu barukuba bakyali na uwe, nikibetaagisa kusiiba? Obu barukuba bakyali na uwe tikirukubetaagisa kusiiba.
20 Baitu akasumi nikaija omuswezi obu alibaihwaho, kandi omu kasumi ako nubwo balisiiba.
21 Busaho muntu ow’akozesa ekikoba eky’orugoye oruhyaka kuteera ekiraka ha kijwaro ekya haruguru ekikuzire. Obu akikora, ekiraka kyesika kuruga ha rugoye orukuzire kandi rutaagukira kimu.
22 Kandi busaho muntu ow’ateeka amaarwa amahyaka omu ruhu orukuzire orwahurwamu amaarwa.* Kakuba akikora, amaarwa nigaija kuhuulikya oruhu, nigaseeseka, kandi n’oruhu nirusiisikara. Baitu amaarwa amahyaka gateekwa omu ruhu oruhyaka orwahurwamu amaarwa.”
23 Obu akaba naaraba omu musiri gw’engano ha kiro kya Sabbiti, abegeswa be baatandika kucwa entwe z’engano baliyo nibarubata.
24 Abafalisaayo baamukaguza bati: “Dora! Habwaki nibakora ekitarukwikirizibwa ha Sabbiti?”
25 Baitu yabagarukamu ati: “Timukasomahoga Daudi eki yakozere obu akaba ali omu bwetaago, uwe n’abasaija abaakaba ali na bo obu baarumirwe enjara?
26 Nk’oku kyolekerwe omu byahandiikirwe ebirukubazaaho nyakatagara omukuru Abiyasaali, Daudi obu yataahire omu nju ya Ruhanga kandi yalya emigaati eyokwoleka, kandi kunu kikaba kitarukwikirizibwa omuntu ondi weena kugirya, oihireho banyakatagara bonka, kandi yahaho n’abasaija abaakaba ali na bo?”
27 Hanyuma yabagambira ati: “Sabbiti ekaijaho habw’omuntu, hatali omuntu habwa Sabbiti.
28 Nahabweki Omwana w’omuntu nuwe Mukama wa Sabbiti.”
Obugambo Obuli Hansi
^ Rora, Kusoborra Ebigambo. “Oruhu orwahurwamu amaarwa.”
