Nk’Oku Yahandiikirwe Marako 3:1-35
3 Yesu akongera yataaha omu isorrokaniro kandi hakaba harumu omusaija ow’azingamire omukono.
2 Baamwikazaaho amaiso kurora obu arakiza omusaija onu ha Sabbiti, nukwo batunge eki barasigikirraho kumujunaana.
3 Yagambira omusaija ow’azingamire* omukono ati: “Imuka oije omu maiso.”
4 Hanyuma yabakaguza ati: “Nikiikirizibwa ha kiro kya Sabbiti kukora ekintu ekirungi, rundi kukora ekibi, kujuna obwomeezi rundi kwita?” Baitu baikara baculiire.
5 Obu yamazire kubetoroozaamu amaiso abiihiirwe, kandi naasaasa muno habw’emitima yabo ey’etaine mbabazi, yagambira omusaija ati: “Gorra omukono gwawe.” Kandi yagugorra, hanyuma gwakira.
6 Ahonaaho, Abafalisaayo baaturuka aheeru baahanuura n’abahondezi ba Herodi nk’oku baramwita.
7 Yesu n’abegeswa be baagenda ha nyanja, kandi ekitebe ky’abantu baingi kuruga Galiraaya na Buyudaaya baamuhondera.
8 N’abandi baingi bakaruga Yerusalemu, Idumaya, nseeri ya Yorudaani, n’omu biikaro ebyetoroire Tuuro na Sidoni, baija nambere ali obu baahuliire ebintu bingi ebi akaba naakora.
9 Kandi yagambira abegeswa be bamuleetere akaato akataito nukwo abantu baleke kumufundiriza.
10 Habwokuba akakiza baingi, abo boona abaali baine endwaire ez’amaani baali nibemigiiriza nukwo bamukwateho.
11 Abo abaali baine emyoyo emibi obu baamuroraga, baagwaga hansi omu maiso ge nibatokera haiguru nibagamba ngu: “Niiwe Mwana wa Ruhanga.”
12 Baitu emirundi nyingi, Yesu yaragiraga emyoyo emibi kutamumanyisa abandi.
13 Yatemba orusozi, kandi yayeta abo abaakaba naagonza baije nambere ali.
14 Yakomamu 12, abayayesere abakwenda. Abo nubo yaakugenzerege na bo kandi nubo yaakutumirege kugenda kutebeza,
15 n’okubaha obusobozi obw’okubinga daimooni.
16 Ikumi na babiri abayakomeremu nubo banu: Simooni ou yarukire Petero,
17 Yakobo mutabani wa Zebedaayo, na Yohana mugenzi wa Yakobo (kandi banu yabaruka Boanerege, ekirukumanyisa “Abaana b’Enkuba.”)
18 Andereya, Firipo, Batolomaayo, Matayo, Tomasi, Yakobo mutabani wa Alifaayo, Sadaayo, Simooni Omukananaayo,
19 na Yuda Isikalyota ayamugobiize.
Hanyuma yataaha omu nju,
20 kandi abantu baingi baayesoroolezaayo kandi Yesu hamu n’abegeswa be baalemwa n’okulya ebyokulya.
21 Baitu abanyabuzaale be obu baakihuliire, baija kumukwata habwokuba bakaba nibagamba bati: “Atabukire omutwe.”
22 N’abahandiiki abaarugire Yerusalemu, bakaba nibagamba bati: “Aine Berezebbabbu, kandi naabinga daimooni naakonyerwa omukuru wa badaimooni.”
23 Hanyuma y’okubeeta, yabagambira ekyokurorraho kinu: “Sitaani naasobora ata kubinga Sitaani?
24 Obukama obu bwebaganizaamu tibusobora kwikaraho,
25 kandi kakuba eka eyebaganizaamu, eka egi tesobora kwikaraho.
26 Ekindi, Sitaani obu araaba naayerwanisa kandi ayebaganizeemu, tasobora kwikaraho, oihireho naija kuhwerekerra.
27 Amananu gali, busaho muntu asobora kutaaha omu nju ey’omusaija ow’amaani akaiba ebintu bye, rundi buli, abandize kumuboha. Obu nubwo asobora kwiba eby’omu nju ye.
28 Mananu kwo nimbagambira nti, abaana b’abantu baliganyirwa ebintu byona, ka bibe bibi bya mulingo ki, n’okujuma kwona.
29 Baitu weena ow’ajuma omwoyo ogurukwera, taliganyirwa ebiro n’ebiro, baitu aba akozere ekibi ekitaliganyirwa ebiro n’ebiro.”
30 Akabaza eki, habwokuba bakaba nibagamba bati: “Aine omwoyo omubi.”
31 Nyina, n’abagenzi be baija baayemerra aheeru, baatuma omuntu kumweta.
32 Nubwo abantu abaali baikaliire bamwehinguliriize, baamugambira bati: “Dora! maama waawe n’abagenzi baawe bali aheeru nibagonza kubaza na iwe.”
33 Baitu yabagarukamu ati: “Nyinanyowe n’abagenzi bange nubo baha?”
34 Yarora abaali baikaliire bamwehinguliriize naagamba ati: “Dora! Nyinanyowe n’abagenzi bange nubo banu.
35 Weena ow’akora Isenyowe ow’ali omu iguru ebi agonza, ogu nuwe mugenzi wange, munyaanya nyowe kandi nyinanyowe.”
Obugambo Obuli Hansi
^ Rundi, “ow’asaraire.”
