Nk’Oku Yahandiikirwe Marako 4:1-41
4 Yayongera yatandika kubeegesa ali ha musa gw’enyanja, kandi ekitebe ky’abantu baingi baayesorooleza nambere ali. Nubwo yatemba eryato, yaikarramu ali ha nyanja, baitu ekitebe ky’abantu bakaba bali ha musa gw’enyanja.
2 Yatandika kubeegesa ebintu bingi naakozesa enfumo. Kandi obu akaba naabeegesa, yabagambira ati:
3 “Muhurre, omusigi akagenda kusiga.
4 Kandi obu akaba naasiga, embibo ezimu zaagwa ha muhanda, ebinyonyi byaija byazisoma.
5 Ezindi zaagwa ha mwandara, nambere itaka likaba liri litaito, kandi ahonaaho zarahuka kumera habwokuba itaka likaba liri litaito.
6 Baitu izooba obu lyaturukire, zaahotoka kandi zaayoma habwokuba zikaba zitaine mihama.
7 Ezindi zaagwa omu mahwa, kandi amahwa obu gaakuzire, gaazinyoroza kandi tizaayana ebijuma.
8 Baitu ezindi zaagwa omu itaka erirungi, kandi zaakura kurungi, zaayana n’ebijuma. Zaateezaamu emirundi 30, 60, na 100.”
9 Yayongeraho ati: “Ow’aine amatu agarukuhurra, ahurre.”
10 Obu akaba ali wenka, abakwenda 12 hamu n’abegeswa be abandi baija nambere ali baamukaguza amakuru g’orufumo oru.
11 Yabagambira ati: “Inywe muhairwe eby’ensita ebirukwera eby’Obukama bwa Ruhanga, baitu abo abali aheeru, ebintu byona nfumo hali bo.
12 Nukwo n’obu baraaba nibarora, tibarukuhweza, n’obu baraaba nibahurra, tibarukwetegereza amakuru gabyo, kandi tibalisobora kuhinduka nukwo baganyirwe.”
13 Yayongera yabagambira ati: “Obu muraaba mutasobora kwetegereza orufumo runu, enfumo ezindi zo, murasobora muta kuzeetegereza?
14 “Omusigi asiga ekigambo.
15 Embibo ezaagwire ha rubaju rw’omuhanda, nubo abantu abahurra ekigambo baitu ahonaaho hanyuma y’okukihurra, Sitaani aija abaihamu ekigambo eki babyairwemu.
16 Kandi ezi ezaabyairwe ha mwandara, nubo abantu abahurra ekigambo, ahonaaho nibakiikiriza n’okusemererwa.
17 Baitu habwokuba tibaine emihama omuli bo, baikaraho habw’akaire kake, hanyuma ahonaaho obu batunga emihito rundi okuhiiganizibwa habw’ekigambo, batabaijuka.
18 Haroho n’ezindi ezaasigirwe omu mahwa. Banu nubo abantu abahurra ekigambo,
19 baitu habw’okwetuntura okw’ensi enu, n’amaani g’ebisuba b’itungo, n’okwegomba ebintu ebindi, bitaaha omu mitima yabo nibinyoroza ekigambo, nikiremwa kwana.
20 Kandi ezi ezaasigirwe ha itaka erirungi, abo nubo abantu abahurra ekigambo, nibakitangirra, kandi nibaana ebijuma nibateezaamu emirundi 30, 60 na 100.”
21 Yayongera yabagambira ati: “Etaara nibasobora kugihemba, nibagisweka n’ekigega rundi nibagita hansi y’ekitabu? Obu bagihemba, tibagita ha kikondo kyayo?
22 Habwokuba busaho ekiserekerwe ekitalisukurwa, busaho kintu ekiriserekwa n’obwegendereza ekitalimanywa omu rwijwire.
23 Ow’aine amatu agarukuhurra, ahurre.”
24 Akongera yabagambira ati: “Mute omutima ha bintu ebi murukuhurra. Habwokuba ekipimo eki mukozesa kupimiramu abandi, nikyo kirikozesebwa kubapimira, kandi mulyongerwaho n’ebindi bingi.
25 Weena anyakwine alyongerwaho abe na bingi, baitu weena ow’ataine n’eki aine kirimwihwaho.”
26 Yagumizaamu naagamba ati: “Omulingo nugwo gumu, Obukama bwa Ruhanga nibusobora kulengesanizibwa n’omuntu ayabyaire embibo omu itaka.
27 Ekiro abyama kandi aimuka nyenkyakara, embibo zimera kandi zikura ziraiha kandi tamanya omulingo eki kibaho.
28 Mporampora, itaka lizimeza kandi zitandika kwana, zibanza kuteekaho ebikoora, hanyuma hongeraho entwe ezirumu ebijuma ebikuzire kurungi.
29 Ahonaaho hanyuma y’okwera, agesa naakozesa naijoro, habwokuba akasumi k’amagesa kahikire.”
30 Yayongera yagamba ati: “Obukama bwa Ruhanga nitusobora kubulengesaniza na ki? Rundi rufumo ki orutusobora kukozesa kubusoborra?
31 Nibulengesanizibwa n’akajuma aka karadaali, omu kasumi obu kaabyairwe, nuko kakaba nikakirayo obutaito omu mbibo zoona ez’omu nsi.
32 Baitu hanyuma y’okukabyara, kaakura, kaakira ebimera ebindi byona eby’emikubi, kandi kaataho amataagi amakooto kandi ebinyonyi eby’omu mwanya biija bihuumurra hansi y’ekiituuru kyagwo.”
33 Akakozesa enfumo nyingi eza mulingo gunu kubagambira ekigambo, kusigikirra ha mulingo baali nibasobora kwetegereza.
34 Mali, buli kubaza na bo, yakozesaaga enfumo, baitu abegeswa be yabasoborraga ebintu byona bali bonka.
35 Kandi ha kiro eki, bumazire kwira, yabagambira ati: “Twambuke tugende nseeri.”
36 Hanyuma y’okuraga ekitebe ky’abantu, baamutwara omu lyato kandi hakaba haroho amaato agandi.
37 Ekiyaga eky’amaani kyatandika kuteera, kandi ebigonzi byateera, amaizi gatandika kuseeseka omu lyato kandi eryato likaba liri haihi kudikira.
38 Baitu Yesu akaba ali omu lyato enyuma, abyamire ha kasago, baamwimukya nibagamba bati: “Mwegesa torukurora ngu twagenda kuhwerekerra?”
39 Ahonaaho yaimuka yacoomera omuyaga n’enyanja, naagamba ati: “Tekaana! Culeera!” Omuyaga gwaleka kuteera haabaho kutekaana.
40 Nubwo yabagambira ati: “Habwaki mutiinire muno? Timukatungire okwikiriza kwona?”
41 Baitu baatiina muno kandi baagambirangana bati: “Onu muntu wa mulingo ki? Omuyaga n’enyanja nabyo nibimworobera!”
