Nk’Oku Yahandiikirwe Marako 5:1-43
5 Hanyuma, baahika nseeri y’enyanja omu kicweka ky’Abagerasene.
2 Ahonaaho Yesu obu yarugire omu lyato, omusaija ow’aine omwoyo omubi yaija kumutangatangana naaruga omu kiikaro ekirumu ebituuro.
3 Oku nuho yaikaraga kandi n’okuhikya omu kasumi ako, busaho n’omu ow’akaba naasobora kumuboha kurungi, n’obu yaakukozeseze orujegere.
4 Emirundi nyingi baamusibisaaga empingo n’enjegere, baitu enjegere yazicwaga kandi naacwacwana empingo; kandi busaho muntu weena ow’akaba naamusobora.
5 Nyamusana n’ekiro, yaikaraga naatokera omu kiikaro eki ekirumu ebituuro n’omu nsozi kandi naayesarasara n’amabaale.
6 Baitu obu yalengiire Yesu, yairuka yainama omu maiso ge.
7 Omusaija yatokera haiguru muno ati: “Nontura ki iwe Yesu, Omwana wa Ruhanga Anyakuli Haiguru Muno? Ninkurahiza omu ibara lya Ruhanga, otambonabonesa.”
8 Habwokuba Yesu akaba naagamba ati: “Iwe omwoyo omubi, ruga omu musaija onu.”
9 Baitu Yesu yagukaguza ati: “Ibara lyawe niiwe oha?” Gwamugarukamu guti: “Ninyowe Legioni, habwokuba tuli baingi.”
10 Kandi omwoyo omubi gwaikara nigwesengereza Yesu kutabinga emyoyo egi kuruga omu nsi egi.
11 Hakaba haroho igana erikooto ery’empunu niziriira ha rusozi.
12 Emyoyo emibi yamwesengereza eti: “Tusindike omu mpunu, nukwo tuzitaahemu.”
13 Yesu yagiikiriza. Nubwo yaruga omu musaija, yataaha omu mpunu kandi igana erikaba lirumu empunu ezirukuhika nk’omu 2,000, likajumbutuka lyasirimuka lyagwa omu nyanja lyafeeramu.
14 Baitu abakaba nibaziriisa bairuka baagenda baakirarangya omu rubuga n’omu byaro, kandi abantu baija kurora ekibaireho.
15 Baija hali Yesu, baarora omusaija ow’akaba abingirwemu emyoyo emibi aikaliire, ajwaire, atekaine, kandi baatiina.
16 N’abo abaarozere ebyabaireho, baabagambira ebirukukwata ha musaija ayabingirwemu daimooni, n’ekyahikire ha mpunu.
17 Baayesengereza Yesu aruge omu kicweka kyabo.
18 Obu akaba naatemba eryato, omusaija ow’akaba abingirwemu daimooni yamwesengereza agende na uwe.
19 Baitu atamwikirize kugenda na uwe, oihireho yamugambira ati: “Genda owanyu omu banyabuzaale baawe, obagambire byona Yahwe ebi akukoliire, n’embabazi ezi akwolekere.”
20 Omusaija onu yagenda, yatandika kurangirra omu Dekapoli* ebintu byona Yesu ebi akaba amukoliire. Kandi abantu boona baahunirra.
21 Yesu akongera yagenda nseeri y’enyanja, kandi ekitebe eky’abantu baingi baayesorooleza nambere ali ha musa gw’enyanja.
22 Omu ha bakuru b’isorrokaniro arukwetwa Yairo, yaija, kandi obu yarozere Yesu, yateeza amaju omu maiso ge.
23 Yamwesengereza emirundi nyingi, naagamba ati: “Muhara wange arwaire kandi ali kubi muno. Nkwesengeriize, ija omuteho emikono nukwo akire, atafa.”
24 Yesu yagenda na uwe, kandi abantu baingi baamuhondera nibamufunza.
25 Hakaba haroho omukazi ow’akaba arwaire oburwaire bw’ekyejwiso kumara emyaka 12.
26 Akaba abonaboine muno naagenda omu badakitaali baingi kandi akaba akozeseze sente ze zoona, baitu omu kiikaro ky’okukira, akeyongerra kimu kuba kubi.
27 Obu yahuliire ebirukukwata hali Yesu, yaraba omu bantu baingi yamwizira enyuma, yakwata ha kijwaro kye ekya haruguru,
28 habwokuba akaikara naagamba ati: “Kakuba nkwata kwonka ha kijwaro kye ekya haruguru, ninyija kukira.”
29 Kandi ahonaaho ekyejwiso kye eky’esagama kyaleka, kandi akehurra omu mubiri gwe ngu akizire oburwaire obwamuleeteraga obusaasi bwingi muno.
30 Ahonaaho Yesu yakyetegereza ngu amaani gamurugiremu, kandi yahinduka yarora ekitebe ky’abantu, yabakaguza ati: “Nooha akwasire ha kijwaro kyange?”
31 Baitu abegeswa be baamugambira bati: “Norora nk’oku abantu barukukwekusaaho, baitu nabwo nokaguza ngu, ‘Nooha ankwasireho?’”
32 Yagumizaamu naamagamaga kurora nooha amukwasireho.
33 Omukazi yatiina muno kandi yatukumira. Baitu habwokuba akaba amanyire ekimubaireho, yaija, yateeza amaju omu maiso ge, yamugambira byona.
34 Yesu yamugambira ati: “Mwisiki, okwikiriza kwawe nukwo kukukirize. Genda n’obusinge, kandi okirre kimu oburwaire obubaire nibukubonabonesa.”
35 Obu akaba naakyabaza, abasaija abamu kuruga omu ka y’omukuru w’isorrokaniro, baija baagambira mukuru w’isorrokaniro bati: “Muhara waawe afiire! Habwaki nokyatalibaniriza busa Omwegesa?”
36 Baitu Yesu yabahurra kandi yagambira mukuru w’isorrokaniro ati: “Otatiina, baitu yoleka okwikiriza.”
37 Ataikirize omuntu ondi weena kumuhondera, oihireho Petero, Yakobo, na Yohana mugenzi wa Yakobo.
38 Yesu obu yahikire omu ka y’omukuru w’isorrokaniro, yarora abantu nibatokera haiguru, nibarra kandi nibateera empamo.
39 Obu yataahire omu nju, yabakaguza ati: “Habwaki nimurra kandi nimuteera etoko enu yoona? Omwana tafiire baitu agwijagiire.”
40 Baatandika kumusekereza. Hanyuma y’okubaragira boona kuturuka aheeru, yatwara ise omwana, nyina, hamu n’abo abaakaba ali na bo, baagenda nambere omwana akaba ali.
41 Yakwata omukono gw’omwana, yamugambira ati: “Talisa kumi,” obu kihindurwa, kimanyisa ngu: “Omwisiki omuto, ninkugambira nti, ‘Imuka.’”
42 Ahonaaho omwisiki yaimuka yatandika kurubata. (Akaba aine emyaka 12.) Kandi boona baasemererwa muno.
43 Yabateererra kutakigambiraho omuntu ondi weena, kandi yabagambira kuha omwisiki ekyokulya.
Obugambo Obuli Hansi
^ Rora, Kusoborra Ebigambo.
