Nk’Oku Yahandiikirwe Marako 8:1-38
8 Omu biro ebi, ekitebe ky’abantu kikongera kyayesorooza kandi bakaba bataine ebyokulya. Yesu yayeta abegeswa be yabagambira ati:
2 “Abantu banu nibankwasa embabazi, habwokuba bamazire ebiro bisatu bali na nyowe, tibaine byokulya.
3 Kakuba mbaraga bakagenda omu maka gaabo baine enjara, n’esobora kubaitira omu muhanda, kandi bamu hali bo barugire hara muno.”
4 Baitu abegeswa be baamukaguza bati: “Omu kiikaro kinu ekyesoroire, ninkaha nambere tusobora kugura ebyokulya ebiraigusa abantu banu boona?”
5 Nubwo yabakaguza ati: “Mwine emigaati ingaha?” Baamugarukamu bati: “Musanju.”
6 Yaragira abantu baikarre hansi. Hanyuma, yakwata emigaati musanju, yasiima, yagicwamu, yagiha abegeswa be kandi baagigabira abantu.
7 Kandi bakaba baine n’encu nke, hanyuma y’okusiima, yabagambira nazo kuzibaha.
8 Bakalya baiguta, baasorooza obucwekacweka obwasigaireho, bwaijuza ebigega musanju ebikooto.
9 Hakaba haroho abasaija abarukuhika nka 4,000. Hanyuma yaraga abantu bagende.
10 Ahonaaho, yatemba eryato yagenda n’abegeswa be omu kicweka kya Daramanusa.
11 Abafalisaayo baija baatandika kumuteeza empaka, baamulenga, obu nibamugambira kubaha akokurorraho kuruga omu iguru.
12 Yasaasa muno omu mutima gwe, kandi yagamba ati: “Habwaki abantu ab’obusinge bunu nibaserra akokurorraho? Mananu kwo nimbagambira nti, busaho kokurorraho akarukwija kuheebwa abantu ab’obusinge bunu.”
13 Obu yamazire, yayongera yatemba eryato, yagenda nseeri.
14 Baitu bakeebwa kutwara emigaati. Bakaba bataine ekintu ekindi ekyokulya omu lyato, oihireho omugaati gumu gwonka.
15 Yatandika kubateererra naagamba ati: “Mwikale nimurora, mwerinde ekitumbisa* ky’Abafalisaayo n’ekya Herodi.”
16 Baatandika kuteezangana empaka, habw’okutaleeta emigaati.
17 Obu yabarozere, yabakaguza ati: “Habwaki nimuteezangana empaka habw’okutaba n’emigaati? Na hati, timuketegeriize amakuru ag’ebindukubazaaho? Emitima yanyu ekyalemerwe kwetegereza?
18 ‘Ka mwine amaiso, timurukuhweza, ka mwine amatu, timurukuhurra?’ Timurukwijuka
19 emigaati etaano ei nacwiremu yaliisa abasaija 5,000, kandi bigega bingaha ebiijwire ebikooto eby’obucwekacweka ebi mwasoroize?” Baamugarukamu bati: “Ikumi na bibiri.”
20 Kandi obu nacwiremu emigaati musanju, yaliisa abasaija 4,000, bigega bingaha ebikooto ebiijwire eby’obucwekacweka ebi mwasoroize?” Baamugarukamu bati: “Musanju.”
21 Nubwo yabakaguza ati: “Na hati, timuketegeriize?”
22 Baahika Betesaida, abantu baamuleetera omusaija ow’afiire amaiso, baamwesengereza amukwateho.
23 Yakwata omusaija ow’afiire amaiso, yamutwara aheeru y’ekyaro eki. Hanyuma yamucwa ebicwanta omu maiso ge, yamutaho emikono kandi yamukaguza ati: “Haroho ekintu kyona eki orukurora?”
24 Omusaija yarora haiguru, yagamba ati: “Nindora abantu, baitu bali nk’emiti ey’erukugendagenda.”
25 Yesu yayongera yateeka emikono h’amaiso g’omusaija ogu, kandi omusaija yahweza kurungi. Amaiso ge gaiguka, kandi yatandika kuhweza buli kimu kyona kurungi.
26 Yamugambira agende owabu, naagamba ati: “Otagenda omu kyaro.”
27 Yesu n’abegeswa be baagenda omu byaro bya Kaisaliya Firipi, kandi obu bakaba nibagenda, yatandika kukaguza abegeswa be ati: “Abantu nibagamba ngu ninyowe oha?”
28 Baamugarukamu bati: “Yohana Omubatizi, baitu abandi nibagamba ngu niiwe Eriya, kandi abandi ngu oli omu ha banabbi.”
29 Kandi yabakaguza ati: “Inywe nimutekereza, ninyowe oha?” Petero yamugarukamu ati: “Niiwe Kristo.”
30 Yabateererra kutagambiraho omuntu ondi weena ebirukumukwataho.
31 Kandi yatandika kubagambira* ngu asemeriire kubonabonesebwa muno, kandi abakuru b’abantu na banyakatagara abakuru, hamu n’abahandiiki bamwange kandi aitwe, baitu hanyuma y’ebiro bisatu, ahumbuuke.
32 Ebi akabibaza atarukusereka. Baitu Petero yamutwara ha rubaju, yatandika kumuhana.
33 Nubwo Yesu yahinduka, yarora abegeswa be, yahana Petero naagamba ati: “Ngaruka enyuma Sitaani habwokuba noteekereza ebiteekerezo by’abantu, hatali ebya Ruhanga.”
34 Yesu yayeta abantu n’abegeswa be, yabagambira ati: “Omuntu weena ow’arukugonza kumpondera, ayeyangise wenka, ahimbe omuti gwe kandi aikale nampondera.
35 Weena arukugonza kujuna obwomeezi bwe alibufeerwa, baitu ogu weena ow’afeerwa obwomeezi bwe habwange na habw’amakuru amarungi, alibutunga.
36 Mali nikigasa ki, omuntu kutunga ensi yoona, baitu akafeerwa obwomeezi bwe?
37 Rundi, kiki omuntu mali eki asobora kuhayo, okucungura obwomeezi bwe?
38 Ogu weena ow’akwatwa ensoni habwange, na habw’ebigambo byange, omu businge bunu obubi obutali bwesigwa,* Omwana w’omuntu na uwe alimukwatirwa ensoni obu aliizira omu kitiinisa kya Ise, ali hamu na bamalaika abarukwera.”
Obugambo Obuli Hansi
^ Rora, Kusoborra Ebigambo.
^ Nk’oku kiri, “kubeegesa.”
^ Nk’oku kiri, “obusiihani hali Ruhanga.”
