Nk’Oku Yahandiikirwe Marako 9:1-50
-
Yesu ahindurwa (1-13)
-
Akiza omwojo arukutalibanizibwa daimooni (14-29)
-
Byona nibisoboka habw’okwikiriza (23)
-
-
Yesu ayongera abazaaho okufa kwe (30-32)
-
Abegeswa bateera empaka ha nooha arukukirayo obukuru omuli bo (33-37)
-
Weena atarukutuhakaniza aba naatusagika (38-41)
-
Ebintu ebirukutabaijura (42-48)
-
“Mubemu ekisura” (49, 50)
9 Mananu kwo nimbagambira nti: “Bamu h’abemeriire hanu tibalifa kuhikya babandize kurora Obukama bwa Ruhanga bumazire kwija n’amaani.”
2 Hanyuma y’okurabaho ebiro mukaaga, Yesu yatwara Petero, Yakobo, na Yohana ha rusozi oruraihire muno bali bonka. Kandi yahindurwa omu maiso gaabo.
3 Ebijwaro bye byatandika kwangasana byayera tiitiiti kukira nk’oku omuntu weena ow’arukwogya engoye omu nsi asobora kubyeza.
4 Kandi Eriya na Musa baababonekera baliyo nibabaza na Yesu.
5 Hanyuma Petero yagambira Yesu ati: “Rabbi, kirungi muno itwe kuba hanu. Leka twombeke eheema isatu, emu yaawe, endi ya Musa, kandi endi ya Eriya.”
6 Mali, akaba atamanyire eky’okubaza habwokuba bakaba batiinire muno.
7 Ekicu kyaija kyabaswekerra kandi iraka lyaruga omu kicu eki, nirigamba liti: “Onu nuwe Mwana wange, ou ndukugonza muno. Mumuhuliirize.”
8 Ahonaaho baamagamaga baitu bataroleho muntu ondi weena oihireho Yesu.
9 Obu baali nibasirimuka kuruga ha rusozi, yabaragira kutagambira omuntu weena eki baboine kuhikya Omwana w’omuntu obu alihumbuurwa kuruga omu bafu.
10 Ebigambo binu baabiikaza ha mitima yabo* baitu baatandika kwekaguza bonka eki akaba naamanyisa obu yabalizeeho kuhumbuurwa omu bafu.
11 Nubwo baamukaguza bati: “Habwaki abahandiiki bagamba ngu Eriya, asemeriire kubanza kwija?”
12 Yabagambira ati: “Eriya alibanza kwija kandi aligarraho ebintu byona; baitu habwaki kyahandiikirwe ngu Omwana w’omuntu aine kubonabonesebwa muno kandi agaywe?
13 Baitu nimbagambira nti, Eriya akaija, kandi baamukora byona ebi baagondeze nk’oku kyamuhandiikirweho.”
14 Obu baizire hali abegeswa abandi, baasanga betoroirwe abantu baingi kandi hakaba haroho abahandiiki nibabateeza empaka.
15 Ekitebe ky’abantu obu baarozere Yesu, baahunirra muno bairuka kwija nambere ali kumuramukya.
16 Yabakaguza ati: “Habwaki nimuteera na bo empaka?”
17 Omu hali abo abakaba bali omu kitebe ky’abantu, yamugarukamu ati: “Mwegesa, nkuletiire omwana wange habwokuba aine omwoyo omubi ogurukumulemesa kubaza.
18 Obu gumukwata, gumunaga hansi, aleeta ifuro omu kanwa, anena amaino kandi ahwamu amaani. Nsabire abegeswa baawe kugubinga baitu balemerwe.”
19 Yagarukamu ati: “Inywe abantu ab’obusinge bunu, abataine okwikiriza, ndaikara na inywe kuhikya di? Kandi ndabagumiisiriza kuhikya di? Mumundetere.”
20 Baamuleetera omwojo ogu, kandi obu baamuhikize omu maiso ge, ahonaaho omwoyo omubi gwamuleetera kusambagana. Hanyuma y’okugwa hansi, yatandika kwekulingura naaleetwa ifuro omu kanwa.
21 Hanyuma Yesu yakaguza ise omwojo onu ati: “Aikaire n’ekizibu kinu kumara kasumi ki?” Yagarukamu ati: “Kurugira kimu omu buto,
22 emirundi nyingi gumunaga omu murro n’omu maizi nigwenda kumwita. Baitu obu oraaba nosobora kugira eki wakoraho, tugirre embabazi kandi otukonyere.”
23 Yesu yamugambira ati: “Habwaki ogambire ngu ‘Obu oraaba nosobora’? Hali ogu anyakwine okwikiriza, ebintu byona nibisoboka.”
24 Ahonaaho Ise omwana yakunga naagamba ati: “Nyine okwikiriza! Nkonyera nambere ndukwetaaga okwikiriza!”
25 Yesu obu yarozere ekitebe ky’abantu nibairuka nibaija nambere bali, yacoomera omwoyo omubi naagamba ati: “Iwe omwoyo omubi oguleetera omuntu kufa omunwa n’amatu, ninkuragira, murugemu kandi otaligaruka kumutaahamu!”
26 Gwakunga kandi gwamuleetera kusambagana, hanyuma gwamurugamu, kandi omwana yasisana nk’ow’afiire kandi abantu abarukukira obwingi baatandika kugamba bati: “Afiire!”
27 Baitu Yesu yamukwata ha mukono yamwimukya, omwana yayemerra.
28 Obu yamazire kutaaha omu nju, abegeswa be baamukaguza bali bonka bati: “Habwaki tulemerwe kugubinga?”
29 Yabagarukamu ati: “Okusaba kwonka nukwo kusobora kubinga omwoyo ogwa mulingo gunu.”
30 Obu baarugireyo, baaraba Galiraaya, baitu atagonze omuntu weena kukimanya.
31 Habwokuba akaba naayegesa abegeswa be naabagambira ati: “Omwana w’omuntu naija kugobezebwa aheebweyo omu mikono y’abantu kandi bamwite. Baitu n’obu aliitwa alihumbuuka hanyuma y’ebiro bisatu.”
32 Baitu bateetegereze eki yabagambiire kandi bakatiina kumukaguza.
33 Hanyuma, baija omu Kaperenaumu. Obu akaba ali omu nju yabakaguza ati: “Kiki eki mubaire nimuterraho empaka, obu mubaire muli omu muhanda?”
34 Baikara baculiire, habwokuba omu muhanda, bakaba nibateera empaka, ha nooha arukukirayo obukuru omuli bo.
35 Nahabweki, akaikarra hansi yayeta ikumi na babiri yabagambira ati: “Omuntu weena obu araaba naagonza kuba ow’okubanza, asemeriire kuba w’okumalirra kandi abe muheereza wa boona.”
36 Hanyuma yakwata omwana omuto yamwemereza hagati yabo, yateeka emikono ye h’amabega ge, kandi yabagambira ati:
37 “Weena anyakutangirra omu h’abaana abato nk’onu omu ibara lyange, aba atangiriire nyowe; kandi ogu anyakutangirra nyowe, aba atatangiriire nyowe nyenka, baitu n’Ogu ayantumire.”
38 Yohana yamugambira ati: “Mwegesa, tuboine omuntu naabinga daimooni naakozesa ibara lyawe, kandi twalengaho kumutanga habwokuba tali omu hali itwe.”
39 Baitu Yesu yamugambira ati: “Mutalengaho kumutanga, habwokuba busaho n’omu ow’akora ebyamahano omu ibara lyange kandi akanguha kumbazaaho kubi.
40 Ogu weena atarukutuhakaniza, aba naatusagika.
41 Kandi weena anyakubaha ekikopo ky’amaizi g’okunywa habwokuba muli begeswa ba Kristo, mananu kwo nimbagambira nti, taliremwa kutunga empeera ye.
42 Baitu ogu weena anyakutabaijura omu h’abato banu abaine okwikiriza, kyakubaire kirungi kakuba abohwa omu bikya bye orubengo* orwetoroozebwa endogoya kandi anagwe omu nyanja.
43 “Kakuba omukono gwawe gukuleetera okutabaijuka, gutemeho. Nikikira kutunga obwomeezi oine omukono gumu, kukira kunagwa omu Gehena* nambere hali omurro ogutasobora kuzima, oine emikono ebiri.
44 ——
45 Kandi kakuba ekigere kyawe kikuleetera kutabaijuka, kitemeho. Nikikira kutunga obwomeezi oli mulema kukira kunagwa omu Gehena oine ebigere bibiri.
46 ——
47 Kakuba eriiso lyawe likuleetera kutabaijuka, liihemu olinage hara. Nikikira iwe kutaaha omu Bukama bwa Ruhanga oine eriiso limu, omu kiikaro ky’okunagwa omu Gehena oine amaiso abiri,
48 nambere hali enzito ezitafa hamu n’omurro ogutasobora kuzima.
49 Habwokuba abantu nk’abanu,* baliseeswaho ekisura eky’omurro.
50 Ekisura kirungi, baitu kakuba kihwamu obunuzi bwakyo, kiki eki muraakozesa kugarraho obunuzi bwakyo? Mubemu ekisura, kandi mwikale omu businge hagati yanyu.
Obugambo Obuli Hansi
^ Rundi, “batabigambire omuntu weena.”
^ Rora, Kusoborra Ebigambo.
^ Rora, Kusoborra Ebigambo.
^ Abo abasiisa kandi bakaleetera n’abandi kusiisa.
