Nk’oku Yahandiikirwe Matayo 11:1-30
11 Yesu obu yamazire kuha abegeswa be 12 oburagirizi, yarugayo yagenda kwegesa n’okutebeza omu mbuga zaabo.
2 Baitu Yohana ow’akaba ali omu nkomo, obu yahuliire ebintu Kristo ebi akaba n’akora yatuma abegeswa be,
3 kumukaguza bati: “Niiwe Ogu ou tutaaha tulindiriire rundi haliyo ondi?”
4 Yesu yabagarukamu ati: “Mugende mugambire Yohana ebi muhuliire n’ebi murozere;
5 abafu b’amaiso nibarora, abalema nibarubata, abagenge nibasemezebwa, abafu b’amatu nibahurra, abafu nibahumbuurwa, kandi abanaku nibagambirwa amakuru amarungi.
6 Aine okusemererwa ogu atatabaijuka habwange.”
7 Obu baagenzere, Yesu yatandika kugambira ekitebe ky’abantu ebirukukwata hali Yohana, yabakaguza ati: “Kiki eki mwagenzere kurora omu irungu? Orubingo orutwarwatwarwa omuyaga?
8 Hati, mukagendayo kurora ki? Omusaija anyakujwaire orugoye orurungi? Abo abajwara engoye enungi baikara omu maju g’abakama.
9 Mali mukagendayo kurora ki? Kurora nabbi? Ego, nimbagambira nti, ogu ou mwagenzere kurora, nakira obukuru nabbi.
10 Ogu nuwe baahandiikireho bati: ‘Dora! Nintuma omukwenda wange ow’arakwebembera, kandi ow’arakuteekaniriza omuhanda!’
11 Mananu kwo nimbagambira nti, omu bantu abazairwe abakazi, tihakabahoga muntu arukukira Yohana Omubatizi* obukuru, baitu omuntu owa hansi omu Bukama bw’omu iguru naamukira.
12 Kuruga omu biro bya Yohana Omubatizi n’okuhika hati, abantu nibekamba kutaaha omu Bukama bw’omu iguru, kandi abo abarukwekamba muno nibabutunga.
13 Habwokuba Banabbi boona n’Ebiragiro, bakaranga kuhikya omu kasumi ka Yohana;
14 kandi ka mube nimukiikiriza rundi nangwa, ogu nuwe ‘Eriya, ow’akaba asemeriire kwija.’
15 Ow’aine amatu ahurre.
16 “Abantu ab’obusinge bunu ndabalengesaniza na ki? Nibasisana abaana abato abaikaliire omu katale nibagambira bataahi baabo,
17 bati: ‘Tukabaterra enyamulere, baitu timwazina, twabaterra empamo, baitu timwaganya.’
18 Yohana akaija atarukulya kandi atarukunywa baitu abantu baagamba ngu ‘aroho daimooni.’
19 Omwana w’omuntu obu yaizire naalya kandi naanywa, abantu baagamba ngu, ‘Dora! omusaija w’omururu kandi omutamiizi, munywani w’abasorooza b’omusoro n’abasiisi.’ Baitu nabwo, amagezi gamanyirwa ha bikorwa byago.”
20 Kandi akatandika kujumirra embuga nambere akaba akoliire ebyamahano ebirukukira obwingi, habwokuba abantu ab’omu mbuga ezi bateegarukemu:
21 “Zirikubona iwe Korazini! Zirikubona iwe Betesaida! habwokuba ebyamahano ebyakozerwe owanyu kakuba byakozerwe omu Tuuro na Sidoni, abantu ab’omu mbuga ezi baakwegarukiremu nibajwara ebitengo kandi nibesiiga iju.
22 Baitu nimbagambira nti, ha kiro eky’okucwa omusango, ekifubiro ekiribaheebwa kirikira ekya Tuuro na Sidoni.
23 Kandi iwe Kaperenaumu, olinyumizibwa kuhika omu iguru? Olisirimurwa omu kituuro, habwokuba ebyamahano ebyakoliirwe omuli iwe kakuba byakoliirwe omu Sodomu, yakwikaireho kuhika na hati.
24 Baitu nimbagambira nti, ha kiro eky’okucwa omusango, ekifubiro ekirikuheebwa kirikira ekya Sodomu.”
25 Omu kasumi ako, Yesu yagamba ati: “Ninkukugiza Isenyowe Mukama ow’iguru n’ensi omu maiso g’abantu banu, habwokuba ebintu binu obiserekere ab’amagezi n’abegesiibwe, baitu wabisukurra abaana abato.
26 Ego, Ai Isenyowe, habwokuba eki nikyo wasiimire.
27 Isenyowe ampaire ebintu byona kandi busaho n’omu amanyire kurungi Omwana, oihireho Ise; kandi busaho n’omu amanyire kurungi Ise, oihireho Omwana, n’ogu Omwana ow’aba agondeze kumumanyisa.
28 Mwije nambere ndi, inywena abajwahire muno n’abalemeriirwe kandi ndabahuumuza.
29 Mwetweke ekikoligo kyange kandi munyegereho, habwokuba ndi muculeezi kandi ndi mwebundaazi omu mutima, nimwija kutunga okuhuumura,
30 habwokuba ekikoligo kyange kireeta okusemererwa kandi tikirukulemeera.”
Obugambo Obuli Hansi
^ Rundi, “Omubatiza.”
