Nk’oku Yahandiikirwe Matayo 12:1-50
-
Yesu nuwe, “Mukama wa Sabbiti” (1-8)
-
Omusaija ow’azingamire omukono akizibwa (9-14)
-
Omuheereza wa Ruhanga ou arukugonza muno (15-21)
-
Abinga daimooni naakozesa omwoyo ogurukwera (22-30)
-
Ekibi ekitaganyirwa (31, 32)
-
Omuti gumanyirwa ha byana byago (33-37)
-
Akokurorraho ka Yona (38-42)
-
Emyoyo emibi egaruka (43-45)
-
Nyina Yesu hamu n’abagenzi be (46-50)
12 Omu kasumi ako, Yesu akaraba omu misiri y’engano ha kiro kya Sabbiti. Abegeswa be bakarumwa enjara baatandika kunoga entwe z’engano nibalya.
2 Abafalisaayo obu baabarozere, baamugambira bati: “Dora! Abegeswa baawe nibakora ekitarukwikirizibwa ha Sabbiti.”
3 Yabagarukamu ati: “Mutasomeho Daudi eki yakozere uwe n’abasaija abaakaba ali na bo obu baarumirwe enjara?
4 Obu yataahire omu nju ya Ruhanga, baalya emigaati ey’okwoleka kandi kunu kikaba kitarukwikirizibwa omuntu ondi weena kugirya, oihireho banyakatagara bonka?
5 Rundi timukasomaga omu Biragiro ngu, ha Sabbiti banyakatagara baakoraga emirimo ha yekaru kandi nibaikara bataine musango?
6 Baitu nimbagambira nti, omuntu arukukira yekaru obukuru ali hanu.
7 Baitu kakuba mwayetegeriize amakuru g’ebigambo binu, ‘Ningonza embabazi hatali ekihongwa,’ timwakujunaine abataine musango.
8 Habwokuba Omwana w’omuntu nuwe Mukama wa Sabbiti.”
9 Hanyuma y’okuruga omu kiikaro eki, akagenda yataaha omu isorrokaniro lyabo.
10 Kandi dora! hakaba haliyo omusaija ow’aine omukono oguzingamire.* Baamukaguza bati: “Kihikire kukiza omuntu ha Sabbiti?” nukwo batunge ekyokusigikirraho kumujunaana.
11 Yabagarukamu ati: “Kakuba oba oine entaama yaawe emu kandi ekagwa omu kiina ha kiro kya Sabbiti, haroho omuntu weena omuli inywe ow’atasobora kugiihamu?
12 Omuntu tali w’omuhendo muno kukira entaama? Nahabweki kihikire kukora ebirungi ha Sabbiti.”
13 Nubwo yagambira omusaija ati: “Gorra omukono gwawe.” Yagugorra, gwakira, gwaba nk’omukono gwe ogundi.
14 Baitu Abafalisaayo baaturuka aheeru baahanuura okumwita.
15 Yesu obu yakimanyire, yarugayo oku. Baingi bakamuhondera kandi boona yabakiza.
16 Baitu yabatererra kutagambira abantu abandi,
17 nukwo kihikiirize ekyagambirwe nabbi Isaya, obu yagambire ati:
18 “Dora! Omuheereza wange ou nakomere, ou ndukugonza, ou nsiimire! Ndimuha omwoyo gwange kandi alimanyisa amahanga obwinganiza bwonyini.
19 Talikungana nobukwakuba okutoka, kandi tiharoho alihurra iraka lye omu muhanda.
20 Orubingo oruhendekere talirucwera kimu, kandi orutambi oruli haihi kuzima taliruzimiza kimu kuhikya obu aliretaho obwinganiza omu bwijwire.
21 Kandi amahanga galinihirra omu ibara lye.”
22 Hanyuma baamuleetera omusaija arukutalibanizibwa daimooni kandi ow’afiire amaiso n’omunwa, yamukiza, kandi omusaija ogu yatandika kubaza n’okuhweza.
23 Abantu baahunirra, baatandika kugamba ngu: “Onu kaaraaba Mutabani wa Daudi!”
24 Abafalisaayo obu baakihuliire baagamba bati: “Omuntu onu naabinga daimooni naakozesa amaani ga Berezebbabbu, omulemi wa badaimooni.”
25 Yesu obu yamanyire ebi barukuteekereza, yabagambira ati: “Obukama bwona obwebaganizaamu buhwerekerra, kandi orubuga rundi eka ebyebaganizaamu tibiikaraho.
26 Omulingo nugwo gumu, kakuba Sitaani abinga Sitaani, aba ayebaganizeemu; hati obukama bwe buraikaraho buta?
27 Nahabweki, obu ndaaba nimbinga daimooni ninkozesa amaani ga Berezebbabbu, batabani banyu bazibinga nibakozesa amaani gooha? Enu niyo ensonga habwaki balibacwera omusango.
28 Baitu obu ndaaba nimbinga daimooni ninkozesa amaani ga Ruhanga, Obukama bwa Ruhanga bwizire mutakimanyire.
29 Rundi omuntu weena naasobora ata kutaaha omu nju y’omusaija ow’amaani, akanyaga ebintu bye atabandize kumuboha? Obu nubwo aba naasobora kunyaga eby’omu nju ye.
30 Weena ow’atali harubaju rwange munyanzigwa wange, kandi weena atesorooleza nambere ndi araranga.
31 “Nikyo ndukubagambirra nti, abantu baliganyirwa ebibi ebya buli mulingo n’ebigambo byona eby’okujuma, baitu ogu ow’ajuma omwoyo ogurukwera, taliganyirwa.
32 Ekyokurorraho, omuntu weena ow’abazaaho kubi Omwana w’omuntu, aliganyirwa. Baitu weena ow’abazaaho kubi omwoyo ogurukwera taliganyirwa omu businge bunu, nobubwakuba oburukugenda okwija.
33 “Obu muraaba muli muti omurungi, n’ebijuma byanyu nibiija kuba birungi. Baitu obu muraaba muli muti omubi,* n’ebijuma byanyu nibiija kuba bibi. Habwokuba omuti gumanyirwa ha bijuma byagwo.
34 Inywe abaana b’enjoka ez’obusegwa,* nimusobora muta kubaza ebintu ebirungi kandi kunu muli babi? Habwokuba ebiijura omu mutima, akanwa nibyo kabaza.
35 Omuntu omurungi, omu lyahurro lye erirungi aihamu ebintu ebirungi, baitu omuntu omubi, omu lyahurro lye eribi, aihamu ebintu ebibi.
36 Baitu nimbagambira nti, ha Kiro eky’Okucwa Omusango, abantu balijunaanwa habw’ebigambo byona ebibi ebi babaza;
37 habwokuba mulyetwa ab’okuhikirra habw’ebigambo byanyu, kandi habw’ebigambo byanyu mulicwerwa* omusango.”
38 Hanyuma, bamu h’abahandiiki n’Abafalisaayo, baamugarukamu nibagamba bati: “Mwegesa, nitugonza okurora akokurorraho kuruga hali iwe.”
39 Yabagarukamu ati: “Inywe abantu ab’obusinge bunu obubi kandi abatali besigwa,* mwikara nimuserra akokurorraho, baitu timuliheebwa akokurorraho koona oihireho aka nabbi Yona.
40 Nk’oku Yona akaba ali omunda y’encu enkooto kumara ebiro bisatu nyamusana n’ekiro, nukwo n’Omwana w’omuntu alimara omu kituuro ebiro bisatu, nyamusana n’ekiro.
41 Omu kasumi ak’okucwerwa omusango, abantu ab’omu Nineve balihumbuuka n’abantu ab’obusinge bunu babasingise omusango, habwokuba bakegarukamu habw’ebi Yona ebi yabatebiize. Baitu dora! Ogu arukukira Yona ali hanu.
42 Omu kasumi ak’okucwerwa omusango, omugo ow’omu masirimuka* alihumbuuka n’abantu ab’obusinge bunu kandi abasingise omusango, habwokuba akaruga ha mpero y’ensi, yaija okuhurra amagezi ga Suleimani. Baitu dora! Ogu arukukira Suleimani ali hanu.
43 “Omwoyo omubi obu guruga omu muntu, guraba omu biikaro ebitarumu maizi niguserra nambere gurahuumurra, baitu tiguzooraho.
44 Hanyuma gwegambira guti, ‘Leka ngaruke omu nju yange nambere narugire,’ kandi obu guhikayo gusanga enju etarumu kintu, esingoliirwe kandi etekaniziibwe kurungi.
45 Hanyuma gugarukayo guleeta emyoyo endi musanju erukwahukana kandi emibi muno kugukira. Obu etaaha omu nju egi, ikarayo kandi enyikara y’omuntu ogu ey’eyongera kusiisikara kukira ha kubanza. Eki nikyo kirukwija kuhika h’abantu ababi ab’obusinge bunu.”
46 Obu akaba naabaza n’abantu, nyina n’abagenzi be baali bemeriire aheeru, nibagonza kubaza na uwe.
47 Haabaho omuntu ayamugambiire ati: “Maama waawe n’abagenzi baawe bemeriire aheeru nibagonza kubaza na iwe.”
48 Yesu yamugarukamu ati: “Nyina nyowe n’abagenzi bange nubo baha?”
49 Yagorra omukono gwe hali abegeswa be naagamba ati: “Nyina nyowe n’abagenzi bange nubo banu.
50 Weena ow’akora Isenyowe ow’ali omu iguru ebi agonza, ogu nuwe mugenzi wange, munyaanya nyowe kandi nyina nyowe.”
Obugambo Obuli Hansi
^ Rundi, “ogusaraire.”
^ Rundi, “ogujunzire.”
^ Rundi, “obusegu.”
^ Rundi, “ebigambo byanyu nibyo biribasingisa.”
^ Nk’oku kiri, “abasiihani.”
^ Rundi, “obukiizi bw’obulyo.”
