Nk’oku Yahandiikirwe Matayo 14:1-36
14 Omu kasumi ako, Herodi, ow’akaba ali mulemi w’isaza, akahurra ebirukukwata hali Yesu
2 kandi yagambira abaheereza be ati: “Ogu ni Yohana Omubatizi.* Ahumbuukire kuruga omu bafu, kandi niyo ensonga habwaki naakora ebyamahano.”
3 Herodi, akaba akwasire Yohana yamuteeka omu nkomo habwa Herodiya, muka Firipo ow’akaba ali mugenzi wa Herodi.
4 Habwokuba Yohana yagambiraga Herodi ati: “Tikirukwikirizibwa omu biragiro kumuswera.”
5 Baitu n’obu kiraaba ngu Herodi akaba naagonza kwita Yohana, akatiina ekitebe ky’abantu, habwokuba baamutwaraga kuba nabbi.
6 Ha kiro eky’okujaguza amazaarwa ga Herodi, muhara wa Herodiya akazina kurungi yasemeza Herodi.
7 Yarahira naamuraganiza kumuha kyona eki aramusaba.
8 Habwokuhondera nyina eki akaba amugambiire, yagamba ati: “Ompe omutwe gwa Yohana Omubatizi ha rusaniya.”
9 Omukama yayetuntura muno, baitu habw’ekirahiro eki akaba akozere, na habw’abo abaakaba naalya na bo, yaragira bagumuhe.
10 Nahabweki, akatuma bagende omu nkomo batemeho Yohana omutwe.
11 Baaguleetera ha rusaniya, baaguha omwisiki kandi yagutwarra nyina.
12 Hanyuma, abegeswa ba Yohana baija baatwara omutumbi gwe, baaguziika; obu baamazire baija baagambira Yesu.
13 Yesu obu yakihuliire, yarugayo oku, yatemba eryato yagenda omu kiikaro ekitarumu abantu kuba wenka. Abantu obu baakihuliire, baaruga omu mbuga zaabo baagenda nambere ali nibarubata ha bigere.
14 Obu yarugire omu lyato, yarora ekitebe ky’abantu, yabakwatirwa embabazi kandi yakiza abarwaire baabo.
15 Obu bwahikire rwebagyo, abegeswa baija nambere ali, baamugambira bati: “Ekiikaro kinu kyesoroire kandi obwire bugenzere, raga abantu, nukwo basobole kugenda omu byaro kwegurra ebyokulya.”
16 Yesu yabagarukamu ati: “Tikirukubetaagisa kugenda, mubahe ebyokulya.”
17 Baamugambira bati: “Ebi twine tibirukumara. Twine emigaati etaano n’encu ibiri.”
18 Yabagarukamu ati: “Mubindetere.”
19 Yagambira abantu kwikarra ha bunyansi. Hanyuma, yakwata emigaati etaano n’encu ibiri, yarora haiguru, yasaba. Kandi yacwamu emigaati, yagiha abegeswa be bagitwarre abantu.
20 Boona bakalya baiguta, kandi baasorooza obucwekacweka obwali busigaireho, bwaijuza ebigega 12.
21 Abantu abaaliire, bakaba nibahika nk’abasaija 5,000, otabaliiremu abakazi n’abaana.
22 Ahonaaho Yesu yagambira abegeswa be kutemba eryato bamubanze kugenda nseeri y’enyanja, nukwo uwe arage abantu.
23 Hanyuma y’okuraga abantu, yagenda ha rusozi wenka kusaba. Kandi obwire bwaira akyaliyo.
24 Omu kasumi ako, eryato likaba liri hara n’omusa gw’enyanja, kandi niritwarwatwarwa ebigonzi habwokuba omuyaga gukaba niguteera niguruga omu maiso gaabo.
25 Baitu omu bwire bw’ekiro omu kisisimuka kya kana, Yesu yaija nambere bali naarubatira h’amaizi.
26 Abegeswa be obu baamurozere naarubatira h’amaizi, baatiina muno, baagamba ngu: “Ogu tali muntu.” Baakunga muno habw’okutiina.
27 Baitu ahonaaho, Yesu yabaza na bo, yabagambira ati: “Muhuumule! Ninyowe; mutatiina.”
28 Petero yamugambira ati: “Mukama wange, obu araaba ali niiwe, ndagira nyije nambere oli nindubatira h’amaizi.”
29 Yamugambira ati: “Ija!” Petero yaruga omu lyato, yagenda hali Yesu naarubatira h’amaizi.
30 Baitu obu yaboine omuyaga, yatiina. Kandi obu yatandikire kudikira, yakunga ati: “Mukama wange, njuna.”
31 Ahonaaho, Yesu yagorra omukono gwe yamukwata kandi yamugambira ati: “Iwe ow’okwikiriza okuke, habwaki otandikire kugurukyagurukya?”
32 Obu baatembere omu lyato, omuyaga gwatekaana.
33 Hanyuma, abo abakaba bali omu lyato bainama omu maiso ge, baagamba bati: “Mananu kwo oli Mwana wa Ruhanga.”
34 Baayambuka baagenda omu nsi ya Genezaleesi.
35 Abantu obu baamanyire ngu nuwe, baagambira abantu ab’omu biikaro byona ebyetoroire ekicweka eki, baamuleetera abo boona abaali barwaire.
36 Baamwesengereza abaikirize bakwate ha mukugiro gw’ekijwaro kye ekya haruguru, kandi abo boona abaakikwasireho baakira.
Obugambo Obuli Hansi
^ Rundi, “Omubatiza.”
