Nk’oku Yahandiikirwe Matayo 15:1-39
15 Hanyuma, Abafalisaayo n’abahandiiki bakaruga Yerusalemu baija hali Yesu, baamugambira bati:
2 “Habwaki abegeswa baawe batarukuhondera emigenzo eya baisenkuru itwe abaira? Ekyokurorraho, tibanaaba omu ngaro obu baba nibagenda kulya.”
3 Yesu yabagarukamu ati: “Habwaki mucwa ebiragiro bya Ruhanga habw’emigenzo yanyu?
4 Ekyokurorraho, Ruhanga akagamba ati, ‘Otiinege so na nyoko,’ kandi, ‘Ogu weena arajumaga ise rundi nyina, aitwe.’
5 Baitu inywe mugamba ngu, ‘Weena ow’agambira ise rundi nyina ati: “Kyona eki naakukuhaire kukukonyera, nkakihayo nk’ekisembo hali Ruhanga,”
6 kiba kitakyamwetaagisa kukonyera ise.’ Nahabweki, mufoire ekigambo kya Ruhanga nk’ekitaine mugaso habw’emigenzo yanyu.
7 Inywe abagobya, nabbi Isaya akahikya obu yababalizeeho ati:
8 ‘Abantu banu bantamu ekitiinisa ekya ha munwa, baitu emitima yabo tendoho.
9 Batalibanira busa kundamya, habwokuba beegesa emigenzo y’abantu.’”
10 Yayeta ekitebe ky’abantu yabagambira ati: “Muhuliirize ebigambo binu kandi mwetegereze amakuru gabyo.
11 Eki ekitaaha omu kanwa k’omuntu tikiri nikyo ekimusiisa, baitu ekiruga omu kanwa ke nikyo kimusiisa.”
12 Hanyuma abegeswa be baija nambere ali baamugambira bati: “Okimanyire ngu Abafalisaayo batabaijukire habw’ebi obalize?”
13 Yesu yabagarukamu ati: “Ekimera kyona Isenyowe eki atarabyaire, kirimenywa.
14 Mubaleke batabaijuke, bali bebembezi abafiire amaiso. Kakuba omufu w’amaiso ayembera omufu w’amaiso ondi, boona nibaija kugwa omu kiina.”
15 Petero yamugambira ati: “Tusoborre amakuru ag’ekyokurorraho eki.”
16 Yagamba ati: “Na hati na inywe timuketegeriize?
17 Timukimanyire ngu ekitaaha omu kanwa, kigenda omunda kandi hanyuma kituruka aheeru?
18 Baitu byona ebiruga omu kanwa biba nibiruga omu mutima. Kandi ebintu ebi nibyo bisiisa omuntu.
19 Ekyokurorraho, omu mutima nuho haruga ebiteekerezo ebibi, obwisi, ebikorwa eby’orwanju, obusiihani, obusuma, okuhangirra, n’okujuma.
20 Binu nibyo ebintu ebisiisa omuntu; baitu kulya ebyokulya n’engaro ezitanaabire, tikisiisa omuntu.”
21 Yesu obu yarugire oku, yagenda omu kicweka kya Tuuro na Sidoni.
22 Kandi dora! omukazi Omufoinike* ayaikaraga omu kicweka eki akaija yamwesengereza ati: “Ngirra embabazi, iwe, Omwana wa Daudi. Muhara wange naatalibanizibwa muno daimooni.”
23 Baitu Yesu atamugarukemu ekigambo kyona. Abegeswa be baija baamugambira bati: “Mubinge, habwokuba naikara natutokerra.”
24 Yabagarukamu ati: “Ntatumwe hali omuntu weena, oihireho, hali entaama za Isaleri ezabuzire.”
25 Omukazi ogu yaija yateeza amaju omu maiso ge, yamugambira ati: “Mukama wange, nkonyera!”
26 Yesu yamugambira ati: “Tikihikire kukwata ebyokulya by’abaana okabinagira obwana bw’embwa.”
27 Omukazi yagarukamu ati: “Mukama wange ohikire, baitu nabwo obwana bw’embwa bulya oburagalika obugwa kuruga ha meeza ya mukama wabwo.”
28 Yesu yamugarukamu ati: “Mukazi iwe, oine okwikiriza kw’amaani; leka kibe nk’oku orukugonza.” Kandi ahonaaho, muhara we yakira.
29 Yesu obu yarugire oku, yagenda haihi n’Enyanja ya Galiraaya, kandi hanyuma yatemba ha rusozi yaikarra.
30 Nubwo abantu baingi baija nambere ali baamuleetera abalema, abazingamire, abafu b’amaiso, abafu b’eminwa, n’abandi baingi. Baabateeka omu maiso ge, yabakiza.
31 Abantu baahunirra muno, obu baarozere abafu b’eminwa nibabaza, abazingamire nibakira, abalema nibarubata, n’abafu b’amaiso nibarora. Kandi baakugiza Ruhanga wa Isaleri.
32 Yesu yayeta abegeswa be yabagambira ati: “Abantu banu nibankwasa embabazi, habwokuba bamazire ebiro bisatu bali na nyowe kandi tibaine ebyokulya. Tindukugonza bagende baine enjara, habwokuba n’esobora kubaitira omu muhanda.”
33 Baitu abegeswa be baamugambira bati: “Omu kiikaro kinu ekyesoroire, ninkaha nambere tusobora kugura ebyokulya ebiraigusa abantu banu boona?”
34 Yesu yabakaguza ati: “Mwine emigaati ingaha?” Baamugarukamu bati: “Emigaati musanju, n’encu nke.”
35 Hanyuma y’okuragira abantu kwikarra hansi,
36 Yesu yakwata emigaati musanju n’encu, kandi hanyuma y’okusiima, yabicwamu yabiha abegeswa be, kandi abegeswa be baabigabira ekitebe ky’abantu.
37 Kandi boona bakalya baiguta. Baasorooza obucwekacweka obwasigaireho, bwaijuza ebigega musanju ebikooto.
38 Kandi abo abaaliire bakaba nibahika abasaija 4,000, otabaliiremu abakazi n’abaana.
39 Hanyuma y’okuraga abantu, yatemba eryato yagenda omu kicweka kya Magadani.
Obugambo Obuli Hansi
^ Rundi, “Omukanaani.”
