Nk’oku Yahandiikirwe Matayo 16:1-28
16 Abafalisaayo n’Abasadukaayo baija nambere ali kumulenga, baamusaba abooleke akokurorraho kuruga omu iguru.
2 Yabagarukamu ati: “Obu buhika rwebagyo, mugamba ngu, ‘obwire nibwija kuba burungi, habwokuba iguru niritukura,’
3 kandi obwire obu bukya, mugamba ngu, ‘obwire nibwija kuba bw’obufuki kandi enjura egwe, habwokuba iguru litukwire kandi ebicu bikwasire.’ Mumanyire kurora iguru kandi mukamanya obwire nk’oku buraaba, baitu obu murora obwokurorraho obw’obusumi bunu, timwetegereza amakuru gabwo.
4 Abantu ab’obusinge bunu obubi kandi abatali besigwa baikara nibasaba akokurorraho, baitu tikalibaheebwa oihireho akokurorraho ka Yona.” Hanyuma yabasigaho yagenda.
5 Abegeswa be obu baayambukire baahika nseeri, baakyetegereza ngu beeberwe kuleeta emigaati.
6 Yesu yabagambira ati: “Mwikale nimurora kandi mwerinde ekitumbisa ky’Abafalisaayo n’Abasadukaayo.”
7 Nahabweki, baatandika kugambirangana bati: “Tituleesere emigaati.”
8 Yesu obu yakimanyire, yabagambira ati: “Habwaki nimugambirangana ngu timwine emigaati, inywe ab’okwikiriza okuke?
9 Na hati timuketegeriize ekindukumanyisa, rundi timurukwijuka emigaati etaano eyaliisize abantu 5,000 hamu n’ebigega ebi mwasoroize?
10 Rundi emigaati musanju eyaliisize abantu 4,000, kandi bigega bingaha ebikooto ebi mwasoroize?
11 Habwaki mutakakyetegeriize ngu tindukubazaaho emigaati? Mwerinde ekitumbisa ky’Abafalisaayo n’Abasadukaayo.”
12 Nubwo baakyetegeriize ngu tarukubazaaho kwerinda ekitumbisa ky’emigaati, baitu enyegesa z’Abafalisaayo n’Abasadukaayo.
13 Yesu obu yahikire Kaisaliya Firipi, yakaguza abegeswa be ati: “Abantu nibagamba ngu Omwana w’omuntu, nuwe oha?”
14 Baamugarukamu bati: “Abamu bagamba ngu ni Yohana Omubatizi,* abandi ngu ni Eriya, abandi ngu ni Yeremiya, rundi omu ha banabbi.”
15 Baitu uwe yabakaguza ati: “Inywe nimuteekereza ninyowe oha?”
16 Simooni Petero yagarukamu ati: “Niiwe Kristo, Omwana wa Ruhanga omwomeezi.”
17 Yesu yamugambira ati: “Oli w’omugisa iwe Simooni mutabani wa Yona, habwokuba omubiri n’esagama tibiri nibyo bikusukuliire eki, baitu Isenyowe ow’omu iguru nuwe akikusukuliire.
18 Ekindi, ninkugambira nti, niiwe Petero, kandi ha mwandara gunu nuho ndyombeka ekitebe kyange, kandi n’enyigi z’ekituuro tizirikisingura.
19 Ndikuha ebisumuruzo by’Obukama obw’omu iguru kandi kyona eki oliboha omu nsi, kiriba kimazire kubohwa omu iguru, kandi kyona eki olisumurra omu nsi, kiriba kimazire kusumururwa omu iguru.”
20 Hanyuma yatererra abegeswa be kutagambira omuntu weena ngu nuwe Kristo.
21 Kurugira kimu kasumi ako, Yesu akatandika kusoborra abegeswa be nk’oku asemeriire kugenda Yerusalemu nukwo abakuru b’abantu, banyakatagara abakuru n’abahandiiki bamubonabonese kandi bamwite, kandi ha kiro ekya kasatu ahumbuurwe.
22 Ahonaaho Petero yamutwara harubaju yatandika kumuhana ati: “Wegirre embabazi Mukama wange, ebi byona tibirukwija kukuhikaho nakake.”
23 Yesu yahinduka yateera Petero amabega yamugambira ati: “Ngaruka enyuma Sitaani! Oli kitabaijura hali nyowe, habwokuba noteekereza ebiteekerezo by’abantu, hatali ebya Ruhanga.”
24 Hanyuma Yesu yagambira abegeswa be, ati: “Omuntu weena obu araaba naagonza kumpondera, ayeyangise* wenka, ahimbe omuti gwe kandi aikale nampondera.
25 Ogu weena arukugonza kujuna obwomeezi bwe alibufeerwa, baitu ogu weena afeerwa obwomeezi bwe ha bwange, alibutunga.
26 Mali nikigasa ki omuntu kutunga ensi yoona, baitu akafeerwa obwomeezi bwe? Rundi kiki omuntu eki asobora kuhayo, okucungura obwomeezi bwe?
27 Omwana w’Omuntu aliizira omu kitiinisa kya Ise ali na bamalaika be, kandi alisasura buli omu naasigikirra ha ngeso ze.
28 Mananu kwo nimbagambira nti, bamu h’abemeriire hanu tibalifa kuhikya obu balirora Omwana w’omuntu naija omu Bukama bwe.”
Obugambo Obuli Hansi
^ Rundi, “Omubatiza.”
^ Rundi, “aleke kutwaza obwomeezi bwe nk’oku arukugonza.”
