Nk’oku Yahandiikirwe Matayo 17:1-27
17 Hanyuma y’ebiro mukaaga, Yesu akatwara Petero, Yakobo na mugenzi we Yohana baagenda ha rusozi oruraihire muno bali bonka.
2 Kandi Yesu yahindurwa omu maiso gaabo. H’amaiso yayaka nk’izooba kandi ebijwaro bye ebya haruguru byayangasana nk’ekyererezi.
3 Kandi dora! Musa na Eriya baababonekera baliyo nibabaza na Yesu.
4 Petero yagambira Yesu ati: “Mukama wange, kirungi muno itwe kuba hanu. Obu oraaba noogonza, ninsobora kwombeka hanu eheema isatu. Emu yaawe, endi ya Musa kandi endi ya Eriya.”
5 Obu akaba naakyabaza, dora! Ekicu ekirukwangasana kyaija kyabasweka, kandi dora! iraka kuruga omu kicu lyagamba liti: “Onu nuwe Omwana wange ou ndukugonza muno, ou nsiimire. Mumuhuliirize.”
6 Abegeswa obu baahuliire eki, baagwa hansi bajumaire kandi baatiina muno.
7 Yesu yairra haihi yabakwataho yabagambira ati: “Mwimuke, mutatiina.”
8 Obu baimukize amaiso, bataroleho muntu ondi weena oihireho Yesu.
9 Obu baali nibasirimuka kuruga ha rusozi, yabaragira ati: “Ebi muboine omu kwolekwa kunu mutabigambira omuntu ondi weena, kuhikya Omwana w’omuntu obu alihumbuurwa kuruga omu bafu.”
10 Baitu abegeswa baamukaguza bati: “Hati habwaki abahandiiki bagamba ngu Eriya asemeriire kubanza kwija?”
11 Yabagarukamu ati: “Manunu kwo Eriya naija kandi aligarraho ebintu byona.
12 Baitu nimbagambira nti, Eriya akamara ira kwija kandi batamanye ngu nuwe, baitu bakamukora byona ebi baagondeze. Omu mulingo nugwo gumu, nukwo barukwija kubonabonesa bati Omwana w’omuntu.”
13 Obu nubwo abegeswa be baakyetegeriize ngu akaba naabazaaho Yohana Omubatizi.*
14 Obu bairiire haihi n’ekitebe ky’abantu, omusaija akaija nambere ali yamuteereza amaju yagamba ati:
15 “Mukama wange, girra mutabani wange embabazi, habwokuba agwa ensimbo kandi arwaire muno. Akira kugwa omu murro n’omu maizi.
16 Mmuletiire abegeswa baawe baitu baalemwa kumukiza.”
17 Yesu yagamba ati: “Inywe abantu ab’obusinge bunu, abataine okwikiriza kandi abahabire, ndiikara na inywe kuhikya di? Kandi ndibagumiisiriza kuhikya di? Mumundetere hanu.”
18 Hanyuma Yesu yacoomera daimooni, yamurugamu, kandi omwojo yakira omu kaire ako.
19 Hanyuma, abegeswa baija hali Yesu omu nsita baamukaguza bati: “Habwaki itwe tutasoboire kugibinga?”
20 Yabagarukamu ati: “Habwokuba mwine okwikiriza kuke. Mananu kwo nimbagambira nti, kakuba muba mwine okwikiriza okurukwingana nk’akajuma aka karadaali, nimusobora kugambira orusozi runu ngu, ‘Ruga hanu ogende hali,’ kandi rulirugaho kandi busaho kintu kyona ekiribalema.”
21 ——
22 Yesu n’abegeswa be obu bakaba besoroliize hamu omu Galiraaya yabagambira ati: “Omwana w’omuntu naija kugobezebwa kandi aheebweyo omu mikono y’abantu,
23 bamwite kandi ha kiro kya kasatu alihumbuurwa.” Baatuntura muno.
24 Obu baahikire Kaperenaumu, abasaija abaasoroozaaga omusoro ogwa yekaru,* bakahikirra Petero baamukaguza bati: “Omwegesa wanyu asasura omusoro gwa yekaru?”
25 Yagarukamu ati: “Ego.” Baitu obu yataahire omu nju, Yesu yabanza kubaza na uwe yamukaguza ati: “Simooni, noteekereza ki? Abakama ab’omu nsi, obusuuru n’omusoro babiiha hali baha? Hali abaana baabo rundi kuruga h’abantu abandi?”
26 Petero obu yagarukiremu ati: “Hali abantu abandi,” Yesu yamugambira ati: “Nahabweki abaana baabo tibasasura omusoro.
27 Baitu habwokuba titurukugonza kubatabaijura, genda ha nyanja onagemu endobo* kandi encu ey’okubanza ey’orakwata, ogyesamye akanwa, noija kusangamu ekinusu eky’efeeza. Okiihemu, ogende obasasule omusoro ogwange n’ogwawe.”
Obugambo Obuli Hansi
^ Rundi, “Omubatiza.”
^ Nk’oku kiri, “ebinusu bibiri ebya durakima.” Bikaba nibingana n’omusaara gw’ebiro bibiri. Rora, Kusoborra Ebigambo.
^ Rundi, “irobo.”
