Nk’oku Yahandiikirwe Matayo 19:1-30
19 Yesu obu yamazire kubaza ebigambo ebi, yaruga Galiraaya, yaija ha mutaano gwa Buyudaaya, nseeri ya Yorudaani.
2 Ekitebe ky’abantu baingi baamuhondera, kandi yabakiza.
3 Abafalisaayo baija nambere ali n’ekigendererwa eky’okumulenga, baamukaguza bati: “Nikiikirizibwa omu biragiro, omusaija kubinga* mukazi we naasigikirra ha buli nsonga yoona?”
4 Yesu yabagarukamu ati: “Timukasomaga ngu ogu ayabahangire kuruga ha kubanza, akabahanga omusaija n’omukazi,
5 kandi yagamba ati: ‘Habw’ensonga enu, omusaija nikyo alirekeraho ise na nyina agumire hali mukazi we, kandi boona babiri balifooka omubiri gumu’?
6 Tibakyali babiri, baitu omubiri gumu. Nahabweki, Ruhanga eki ateeraniize hamu, omuntu weena atalikibaganizaamu.”
7 Baamukaguza bati: “Kandi habwaki Musa yagambire ngu, omuntu obu arabinga mukazi we amuhe ebbaruha ey’okumubinga?”
8 Yabagarukamu ati: “Habwokuba mukaba mwine emitima ey’egumangaine, Musa akabaikiriza kubinga abakazi banyu, baitu eki tinukwo kikaba kiri kuruga ha kubanza.
9 Nyowe nimbagambira nti, weena anyakubinga mukazi we atarukusigikirra ha nsonga ey’obusiihani,* kandi akaswera ondi, n’aba asiihaine.”
10 Abegeswa be baamugambira bati: “Obuswere obu buraaba nukwo buli buti, kirungi kutaswera.”
11 Uwe yabagarukamu ati: “Abantu boona tibasobora kuhondera ebigambo ebi, oihireho abo bonka abaine ekisembo.
12 Abantu abamu bazaarwa bali bakonwa,* haroho n’abo abaakonerwe abantu, kandi haroho n’abo abaayekonere bonka habw’Obukama obw’omu iguru. Ogu arukusobora kwikara atataahire obuswere, leka nukwo aikale ati.”
13 Hanyuma, baamuleetera abaana abato abateho emikono kandi abasabire. Baitu abegeswa be baabacoomera.
14 Yesu yabagambira ati: “Muleke abaana abato baije nambere ndi, mutabatanga, habwokuba Obukama bw’omu iguru bwabo abali nk’abaana abato.”
15 Kandi yabateekaho emikono, yarugayo oku.
16 Dora! omuntu yaija nambere ali, yamukaguza ati: “Mwegesa, kirungi ki eki nsemeriire kukora nukwo ntunge obwomeezi obutahwaho?”
17 Yesu yamugarukamu ati: “Habwaki nonkaguza ekirungi? Haroho omurungi Omu wenka. Baitu obu oraaba noogonza kutunga obwomeezi, ikara noyorobera ebiragiro.”
18 Yamukaguza ati: “Biragiro ki?” Yesu yamugarukamu ati: “Otaliita, otalisiihana, otaliiba, otaliha obwakaiso obw’ebisuba,
19 oteekemuga so na nyoko ekitiinisa, kandi osemeriire kugonza mutaahi waawe nk’oku oyegonza wenka.”
20 Omusigazi yamugambira ati: “Binu byona nyikaire nimbikora; kiki ekindi eki nsemeriire kukora?”
21 Yesu yamugarukamu ati: “Obu oraaba noogonza kuba omuhikiriire, genda otunde ebintu byawe ogabire abanaku, kandi olyetungira itungo omu iguru, hanyuma oije ompondere.”
22 Omusigazi obu yahuliire eki, yarugaho yagenda agweriirwe, habwokuba akaba aine ebintu bingi.
23 Yesu yagambira abegeswa be ati: “Mananu kwo nimbagambira nti, nikiija kugumira omuntu omuguuda kutaaha omu Bukama obw’omu iguru.
24 Kandi nimbagambira nti, kyanguhire engamiya kuraba omu kahuru k’enkinzo, kukira omuntu omuguuda kutaaha omu Bukama bwa Ruhanga.”
25 Abegeswa be obu baakihuliire, baahunirra muno, baagamba bati: “Mali, nooha asobora kujunwa?”
26 Yesu yabagarukamu ati: “Hali abantu, eki tikirukusoboka, baitu hali Ruhanga byona nibisoboka.”
27 Petero yamugambira ati: “Dora! Tukasigaho ebintu byona twakuhondera; itwe, tulitunga ki?”
28 Yesu yamugarukamu ati: “Mananu kwo nimbagambira nti, Omwana w’omuntu obu aliikarra ha kitebe kye eky’obukama eky’ekitiinisa, ebintu byona bimazire kugarurwa buhyaka, inywe abampondiire, muliikarra ha bitebe 12, mucwere omusango enganda 12 eza Isaleri.
29 Kandi ogu weena ayasigireho amaju, bagenzi be, banyaanya, ise, nyina, abaana, n’ebibanja habw’ibara lyange, alitunga ebirukukiraho emirundi kikumi, kandi alitunga n’obwomeezi obutahwaho.
30 “Baitu baingi ab’okubanza, baliba ab’okumalirra kandi ab’okumalirra babe ab’okubanza.
Obugambo Obuli Hansi
^ Rundi, “kugaitururwa na.”
^ Omu Ruyonaani, por·neiʹa. Rora, Kusoborra Ebigambo.
^ Rora, Kusoborra Ebigambo.
