Nk’oku Yahandiikirwe Matayo 2:1-23
2 Hanyuma ya Yesu kuzaarwa omu Beterehemu eya Buyudaaya omu kasumi k’Omukama Herodi, dora! abarukuraguza enyunyuuzi bakaruga Burugaizooba baija Yerusalemu,
2 baakaguza bati: “Omukama w’Abayudaaya ow’azairwe ali nkaha? Tuboinege enyunyuuzi ye obu tubairege tuli Burugaizooba, kandi twizire kumuramya.”
3 Omukama Herodi obu yakihuliire, aketuntura muno hamu n’ab’omu Yerusalemu boona.
4 Akasorooza banyakatagara abakuru boona hamu n’abahandiiki, yabakaguza nambere Kristo yakuzaaliirwe.
5 Baamugambira bati: “Omu Beterehemu ya Buyudaaya habwokuba kikahandiikwa kuraba omuli nabbi ngu:
6 ‘Kandi iwe Beterehemu ey’omu nsi y’Abuyudaaya, toli rubuga orurukukirayo obutaito omu balemi ba Yuda, baitu omuli iwe nuho haliruga omulemi, ow’alifooka muliisa w’abantu bange Isaleri.’”
7 Hanyuma, Herodi akeeta omu nsita abaraguza enyunyuuzi kandi yabakaguza akasumi akabaaroliiremu enyunyuuzi.
8 Yabatuma Beterehemu, naagamba ati: “Mugende muserre omwana, obu muramuzoora mugaruke mungambire nukwo na nyowe ngende mmuramye.”
9 Hanyuma y’okuhuliiriza omukama ebi yabagambiire, baagenda. Kandi dora! enyunyuuzi ei baali baboine bakyali Burugaizooba yabebembera, obu yahikire nambere omwana akaba ali, yayemerra.
10 Obu baaboine enyunyuuzi yayemerra, baasemererwa muno.
11 Kandi obu baataahire omu nju, baarora omwana ali na Malyamu nyina, baateeza amaju hansi baamuramya. Baasumurra n’eby’omuhendo byabo baamuha ebisembo—ezaabbu, emigaju hamu n’ebirukuboya ebirukwetwa miira.
12 Baitu habwokuba Ruhanga akababonekera omu kirooto yabagambira kutagaruka omwa Herodi, bakagaruka omu nsi y’owabu nibakozesa omuhanda ogundi.
13 Obu baamazire kugenda, dora! Malaika wa Yahwe akabonekera Yusufu omu kirooto, yamugambira ati: “Imuka, otwale omwana na nyina, mwirukire Misiri, kandi mwikaleyo kuhikya obu ndikugambira eky’okukora habwokuba Herodi naagenda kuserra omwana amwite.”
14 Nahabweki, Yusufu akaimuka omu bwire bw’ekiro, yatwara omwana na nyina, baagenda Misiri.
15 Bakaikarayo kuhikya Herodi obu yafiire. Kinu kikahikiiriza Yahwe eki akaba abalize naaraba omuli nabbi naagamba ati: “Omwana wange nkamweta kuruga Misiri.”
16 Herodi obu yarozere ngu abarukuraguza enyunyuuzi bamubiihire, yabiihirwa muno, kandi yatuma abantu kugenda kwita abaana boona aboojo abakaba bali omu Beterehemu n’ebiikaro byona ebikaba bigyetoroire, kutandikira ha myaka ebiri kugaruka hansi naasigikirra h’akasumi abarukuraguza enyunyuuzi baamugambiire.
17 Kandi eki kikahikiiriza nabbi Yeremiya ebi yagambire ati:
18 “Iraka ery’okurra n’okuteera empamo likahulirwa omu Rama, Rakeri naalirirra abaana be kandi tarukugonza kuhuumuzibwa, habwokuba boona bahoireho.”
19 Herodi obu yafiire, dora! Yusufu obu akaba ali Misiri, Malaika wa Yahwe akamubonekera omu kirooto,
20 yamugambira ati: “Imuka, otwale omwana na nyina, mugende omu nsi ya Isaleri habwokuba abo abakaba nibagonza kwita omwana bafiire.”
21 Nahabweki Yusufu akaimuka, yatwara omwana na nyina omu nsi ya Isaleri.
22 Baitu obu yahuliire ngu Akirausi nuwe akaba nalema Buyudaaya omu kiikaro kya ise Herodi, akatiina kugendayo. Baitu habwokuba Ruhanga akaba amuhabwire omu kirooto, akacwamu kugenda omu kicweka kya Galiraaya.
23 Kandi akaikara omu rubuga rwa Nazaleesi, nukwo kihikiirize ebyagambirwe banabbi ngu: “Naija kwetwa Omunyanazaleesi.”
