Nk’oku Yahandiikirwe Matayo 24:1-51
-
AKOKURORRAHO AK’OKUBAHO KWA KRISTO (1-51)
24 Yesu obu akaba naaruga omu yekaru, abegeswa be bakaija nambere ali baamwoleka ebyombeko bya yekaru.
2 Yabagambira ati: “Timurukurora ebintu binu byona? Mananu kwo nimbagambira nti, busaho ibaale na limu eririsigara haiguru y’ibaale erindi, litanagirwe hansi.”
3 Obu akaba aikaliire ha Rusozi rw’Emizaituni, abegeswa be baija nambere ali omu nsita baamukaguza bati: “Tugambire ebintu binu biribaho di, n’akokurorraho ak’okubaho kwawe, n’empero ey’obusinge bunu?”
4 Yesu yabagarukamu ati: “Mwerinde hatagira omuntu weena ayabahabisa,
5 habwokuba baingi baliija omu ibara lyange nibagamba ngu, ‘Ninyowe Kristo’ kandi balihabisa baingi.
6 Mulihurra obulemu n’amakuru agarukubazaaho obulemu. Mutatiina habwokuba ebintu binu bisemeriire kubaho, baitu empero eriba etakahikire.
7 “Ihanga liritahirra erindi, n’obukama butahirre obundi, kandi halibaho ibura ly’ebyokulya hamu n’emisisa omu biikaro ebirukwahukana.
8 Binu byona eriba ntandiko y’emihito.
9 “Abantu balibahayo mubonabonesebwe kandi babaite. Kandi mulinobwa amahanga goona habw’ibara lyange.
10 Baingi balitabaijuka, baligobezangana kandi balinobangana.
11 Banabbi b’ebisuba baingi baliija kandi balihabisa baingi.
12 Habw’obujemu kweyongera, okugonza kw’abaingi kulifuka.
13 Baitu ogu ow’aligumiisiriza kuhikya ha mpero, nuwe alijunwa.
14 Kandi amakuru ganu amarungi ag’Obukama, galitebezebwa omu nsi yoona nk’obwakaiso hali amahanga goona, kandi nubwo empero erihika.
15 “Nahabweki, obu mulirora ekinugwa ekirukuleetaho okuhwerekerra, nabbi Danieri eki yabalizeeho kyemeriire omu kiikaro ekirukwera, (omusomi akozese okwetegereza).
16 Hanyuma, abo abali omu Buyudaaya batandike kwirukira omu nsozi.
17 N’ogu ow’aliba ha rusu rw’enju atalisirimuka kutaaha omu nju kwihayo ebintu bye,
18 n’ogu ow’ali omu musiri, ataligaruka kutabarra orugoye rwe orwa haruguru.
19 Balikibona abakazi b’enda, n’abo abaliba nibonkya abaana omu biro ebi.
20 Mwikale nimusaba akasumi ako ak’okwirukiramu katalihika omu kasumi ak’obutiti rundi ha kiro kya Sabbiti.
21 Halibaho omuhito omwingi* ogutakabahoga kuruga ensi ehangwa kuhikya na hati, kandi tigulyongera kubaho.
22 Amananu gali, kakuba ebiro ebi bitarakeehiibwe, busaho n’omu ayakukizireho, baitu habw’abo abakomerwemu, ebiro ebi birikeehebwa.
23 “Nahabweki, kakuba omuntu weena abagambira ati: ‘Dora! Kristo ali hanu’ rundi ‘Nguli hali!’ mutakiikiriza.
24 Habwokuba Bakristo ab’ebisuba na banabbi ab’ebisuba baliija kandi balikora obwokurorraho obw’amaani n’ebintu ebirukuhuniiriza, nukwo bahabise abantu. Kandi obu kiraaba nikisoboka, bahabise n’abo abakomerwemu.
25 Dora! Nabahabura ebintu binu bitakabaireho.
26 Nahabweki, abantu obu babagambira bati: ‘Dora! Ali omu irungu’ mutagendayo. ‘Dora! Ali omu bisiika’ mutakiikiriza.
27 Nk’oku omurabyo kuruga burugaizooba gumulikya kuhika bugwaizooba, n’okubaho kw’Omwana w’omuntu nukwo kuliba kuti.
28 Nambere hali ekifiire, oku nuho ebihungu byesorooleza.
29 “Ahonaaho, hanyuma y’omuhito gw’akasumi ako, izooba liriswekwa omwirima, okwezi kulireka kujwa, enyunyuuzi zirihanuuka omu iguru, n’amaani ag’omu iguru galitengesebwa.
30 Hanyuma, akokurorraho k’Omwana w’omuntu kalizooka omu iguru, kandi abantu boona kuruga omu nganda zoona ez’omu nsi baliteera empamo, kandi balirora Omwana w’omuntu naizira ha bicu eby’omu mwanya, n’amaani n’ekitiinisa kingi.
31 Kandi alituma bamalaika be n’iraka ly’amaani ery’engwara kandi balisorooza abakomerwemu be kuruga omu mbaju ina ez’ensi,* kuruga ha rubaju rumu orw’iguru kuhika ha rundi.
32 “Hati mwegere ha kyokurorraho kinu eky’omuti omutiini. Amataagi gaagwo obu gatandika kukura kandi gakateekaho amababi, mumanya ngu akasumi k’omusana kali haihi kuhika.
33 Omu mulingo nugwo gumu, obu mulirora ebintu binu nibibaho, mumanye ngu ali haihi ha rwigi.
34 Mananu kwo nimbagambira nti, obusinge bunu tibulihwaho kuhikya ebintu binu byona bimazire kuhikirra.
35 Iguru n’ensi birihwaho, baitu ebigambo byange tibirihwaho.
36 “Obukirukuhika ha kiro eki, n’esaaha egi, busaho ow’abimanyire, ka babe bamalaika omu iguru rundi Omwana, oihireho Isenyowe wenka.
37 Nk’oku kikaba kiri omu biro bya Nuha, n’okubaho kw’Omwana w’omuntu nukwo kuliba kuti.
38 Nk’oku ebintu bikaba biri Okusandaara kw’Amaizi kutakabaireho, abantu bakaba nibalya, nibanywa, abasaija nibaswera, abakazi nibaswerwa, kuhikya Nuha obu yataahire omu lyato,
39 batafeeyo kuhikya Okusandaara kw’Amaizi obu kwaizire kwabahwerekereza boona. N’okubaho kw’Omwana w’omuntu nukwo kuliba kuti.
40 Abasaija babiri baliba bali omu musiri, omu alitwarwa kandi ondi alirekwaho.
41 Abakazi babiri baliba nibasa ha rubengo, omu alitwarwa kandi ondi alekweho.
42 Nahabweki, mwikale muli bulindaara habwokuba timumanyire ekiro Mukama wanyu aliiziramu.
43 “Baitu mumanye kinu, kakuba mukama w’enju yamanyire akasumi omusuma aliiziramu omu bwire bw’ekiro, yakwikaire naarora nukwo ataikiriza omusuma kucwa enju ye akataahamu.
44 Omu mulingo nugwo gumu, na inywe mwikale mwetekaniize habwokuba Omwana w’omuntu aliizira omu saaha mutarukumunihirramu.
45 “Nooha mali omwiru omwesigwa kandi ow’amagezi, mukama we ou yakomere kurolerra ab’omu nju ye n’okubaha ebyokulya omu kasumi akahikire?
46 Aine okusemererwa omwiru ogu, mukama we obu aliija akamusanga naakikora.
47 Mananu kwo nimbagambira nti, alimukwasa ebintu bye byona.
48 “Baitu omwiru ogu kakuba aba mubi, akateekereza ati: ‘Mukama wange akereriirwe,’
49 kandi akatandika kuteera bagenzi be hamu n’okulya n’okunywa n’abatamiizi,
50 mukama we aliija ha kiro n’esaaha omwiru ogu atarukumunihirramu,
51 alimufubira muno kandi amuteeke hamu n’abagobya. Oku nuho aliririrra nanena ensaya ze.
