Nk’oku Yahandiikirwe Matayo 25:1-46
25 “Obukama bw’omu iguru nibusobora kulengesanizibwa n’abaisiki* ikumi abaakwasire etaara zaabo baagenda kutangirra omuswezi.
2 Bataano hali bo bakaba bali badomadoma, kandi abandi bataano bakaba bali b’amagezi.
3 Abadomadoma bakatwara etaara zaabo baitu tibaatwara amafuta agandi omu cupa,
4 baitu ab’amagezi bakatwara amafuta omu cupa n’omu taara zaabo.
5 Omuswezi obu yakereriirwe, boona bakatandika kuhungira kandi hanyuma baagwijagira.
6 Ekiro omu itumbi, bakahurra abantu nibatokera haiguru nibagamba bati: ‘Omuswezi aizire, mugende mumutangirre.’
7 Hanyuma abaisiki boona baimuka baatandika kuteekaniza etaara zaabo.
8 Abadomadoma baagambira ab’amagezi bati: ‘Mutuheho amafuta habwokuba etaara zaitu ziri haihi kuzima.’
9 Abaisiki ab’amagezi baabagarukamu bati: ‘Obu turabahaho nigasobora kutatumara. Mugende nambere barukugatunda mwegurre.’
10 Obu baali nibagenda kugagura, omuswezi yaija. Abaisiki abaali beteekaniize baataaha na uwe nambere hakaba hali obugenyi kandi orwigi rwakingwaho.
11 Hanyuma, abaisiki abadomadoma baija nibagamba bati: ‘Waitu, Waitu, tukingurreho.’
12 Yabagarukamu ati: ‘Nimbagambira amananu ngu timbamanyire.’
13 “Nahabweki, mwikale muli bulindaara habwokuba timumanyire ekiro n’esaaha.
14 “Obukama bw’omu iguru nibusobora kulengesanizibwa n’omusaija ow’akaba ali haihi kugenda omu ihanga erindi, yayeta abairu be yabakwasa ebintu bye.
15 Omu akamuha etaranta itaano, ondi yamuha ibiri, kandi ondi yamuha emu, kusigikirra ha busobozi bwabo, hanyuma yagenda.
16 Ayatungire etaranta itaano ahonaaho yagenda yazisuubuza yagoba ezindi itaano.
17 N’ogu ayatungire ibiri, yagobamu ezindi ibiri.
18 Baitu omwiru ayatungire etaranta emu, akalima ekiina yaserekamu sente za mukama we.
19 “Hanyuma y’akasumi kurabaho, mukama w’abairu banu akagaruka kurora omulingo baakozeseze sente ezi yabahaire.
20 Ogu ayahairwe etaranta itaano, yaija kandi yaleeta etaranta ezindi itaano yagamba ati: ‘Mukama wange, okampa etaranta itaano, dora, ntungire ezindi itaano.’
21 Mukama we yamugarukamu ati: ‘Webale muno omwiru omurungi kandi omwesigwa. Okaba mwesigwa omu bintu ebike, ndakukoma orolerre ebintu bingi. Semererwa hamu na mukama waawe.’
22 Kandi ogu ayahairwe etaranta ibiri yaija yagamba ati: ‘Mukama wange, okampa etaranta ibiri, dora, ntungire etaranta ezindi ibiri.’
23 Mukama we yamugambira ati: ‘Webale muno omwiru omurungi kandi omwesigwa. Okaba mwesigwa omu bintu ebike, ndakukoma orolerre ebintu bingi. Semererwa hamu na mukama waawe.’
24 “Ha kumalirra, haija omwiru ayahairwe etaranta emu, yagamba ati: ‘Mukama wange, nkaba nkimanyire ngu oli muntu agumangaine, ogesa nambere otasigire, osorooza nambere otarasegesiire.
25 Nahabweki nkatiina muno, nagenda nasereka etaranta yaawe omu itaka. Etaranta yaawe nginu.’
26 Mukama we yamugarukamu ati: ‘Iwe omwiru omubi kandi omugara, okaba okimanyire ngu ngesa nambere ntasigire kandi nsorooza nambere ntarasegesiire.
27 Sente ezi nakuhaire wakuzihaire abasuubuzi kandi obu naakwizire naakuzitungire n’amagoba gaazo.
28 “‘Nahabweki, mumwiheho etaranta emu mugihe ogu ow’aine etaranta ikumi.
29 Weena anyakwine alyongerwaho kandi atunge bingi, baitu ogu ow’ataine, n’ekyaine kirimwihwaho.
30 Kandi omwiru ogu ow’ataine mugaso, mumutwale mumunage aheeru omu mwirima. Kandi oku nuho aliririrra nanena ensaya ze.’
31 “Omwana w’omuntu obu aliizira omu kitiinisa kye ali na bamalaika be boona, aliikarra ha kitebe kye eky’Obukama eky’ekitiinisa.
32 Kandi amahanga goona galisoroolezebwa omu maiso ge, kandi alibaganiza abantu hali abandi, nk’oku omuliisa abaganiza entaama hali embuzi.
33 Entaama alizita ha mukono gwe ogw’obulyo, kandi embuzi azite ha mukono gwe ogw’emoso.
34 “Hanyuma, Omukama aligambira abali ha mukono gwe ogw’obulyo ati: ‘Mwije inywe Isenyowe abayahaire omugisa, mugwetwe Obukama obwabateekaniriziibwe ha kutandika kw’ensi.
35 Habwokuba obu nkaba nindumwa enjara mukampa ebyokulya, obu nkaba nyiine iroho mukampa ekyokunywa. Obu nkaba ndi mugenyi mukantangirra mwanyoleka amakune,
36 obu nkaba ndi busa, mukanjweka. Obu narwaire mukandolerra kandi obu nkaba ndi omu nkomo mukaija mwandora.’
37 Hanyuma abahikiriire balimukaguza bati: ‘Mukama waitu ni di obu twakurozere oine enjara twakuha ebyokulya, rundi oine iroho twakuha ekyokunywa?
38 Kandi tukakurora di oli mugenyi twakutangirra, rundi oli busa twakujweka?
39 Ni di obu twakurozere orwaire rundi oli omu nkomo, twaija kukurora?’
40 Omukama alibagarukamu ati: ‘Mananu kwo nimbagambira nti, habwokuba mukabikorra omu h’abagenzi bange banu abarukukirayo kuba aba hansi, mukabikorra nyowe.’
41 Hanyuma, aligambira abali ha mukono gwe ogw’emoso ati: ‘Mundugeho inywe abakyenerwe, mugende omu murro ogutazima oguteekaniriziibwe Sitaani na bamalaika be.
42 Nkarumwa enjara baitu timwampa ebyokulya, nakwatwa iroho baitu timwampa ekyokunywa.
43 Obu naizire nk’omugenyi mutantangirre, obu nkaba ndi busa mutanjweke, obu nkaba ndwaire kandi ndi omu nkomo, mutaije kundora.’
44 Hanyuma na bo balimukaguza bati: ‘Mukama waitu, ni di obu twakurozere oine enjara, oine iroho, oli mugenyi, oli busa, oli murwaire rundi oli omu nkomo, titwakukonyera?’
45 Kandi alibagarukamu naagamba ati: ‘Mananu kwo nimbagambira nti, habwokuba mutabikorre omu hali banu ow’arukukira kuba owa hansi, mutabinkorre.’
46 Abo baligenda omu kufa okw’ebiro n’ebiro, baitu abahikiriire baligenda omu bwomeezi obutahwaho.”
Obugambo Obuli Hansi
^ Ekigambo eky’Oruyonaani ekikozesiibwe hanu nikimanyisa omwisiki atakabyamaga n’omusaija.
