Nk’oku Yahandiikirwe Matayo 26:1-75
-
Banyakatagara bahanuura kwita Yesu (1-5)
-
Amagita agarukuboya gaseeswa hali Yesu (6-13)
-
Yesu ajaguza Okuhingurwaho okw’okumalirra kandi bamugobeza (14-25)
-
Atandikaho Ekiihuro kya Mukama Waitu Ekya Rwebagyo (26-30)
-
Yesu agamba ngu Petero naija kumwehakana (31-35)
-
Yesu asaba ali Gesesemane (36-46)
-
Yesu akwatwa (47-56)
-
Acwerwa omusango omu maiso g’Orukurato (57-68)
-
Petero ayehakana Yesu (69-75)
26 Yesu obu yamazire kubaza ebi byona, yagambira abegeswa be ati:
2 “Mukimanyire ngu ebiro bibiri kuruga hati nihaija kubaho Okuhingurwaho, kandi Omwana w’omuntu naija kuheebwayo aitirwe ha muti.”
3 Hanyuma banyakatagara abakuru, n’abakuru b’abantu bayesorooleza omu zigati ya nyakatagara omukuru arukwetwa Kayaafa.
4 Baahanuura omulingo barakwata Yesu omu magezi, bamwite.
5 Baitu bakaba nibagambirangana ngu: “Tutamukwata ha kiro eky’obugenyi nukwo abantu bataleetaho akaimukirro.”
6 Yesu obu akaba ali Besaniya omu nju ya Simooni omugenge,
7 omukazi akaija nambere ali, aine ecupa erumu amagita agarukuboya aga sente nyingi, yatandika kugaseesa ha mutwe gwa Yesu ow’akaba aikaliire naalya.
8 Abegeswa obu baakirozere baabiihirwa, baagamba ngu: “Habwaki amagita ganu nigafa busa?
9 Gabaire nigasobora kutundwa sente nyingi kandi ziheebwe abanaku.”
10 Baitu Yesu obu yakyetegeriize, yabakaguza ati: “Habwaki nimuleetera omukazi onu kwetuntura? Ankoliire ekintu ekirungi.
11 Abanaku mwikara na bo obwire bwona, baitu timurukwija kuba na nyowe obwire bwona.
12 Obu aseesere amagita ha mubiri gwange, akikozere kunteekaniza kuziikwa.
13 Mananu kwo nimbagambira nti, hoona nambere amakuru ganu amarungi galitebezebwa omu nsi yoona, omukazi onu eki akozere kiritebezebwa kumwijuka.”
14 Omu ha ikumi na babiri arukwetwa Yuda Isikalyota, akagenda hali banyakatagara abakuru
15 yabagambira ati: “Murampa ki kumubahikyaho?” Baamuraganiza kumuha ebicweka 30 eby’efeeza.
16 Kuruga obu, akaikara naaserra akagisa ak’okumugobeza.
17 Ha kiro eky’okubanza eky’Emigaati Etatumbisiibwe, abegeswa bakaija hali Yesu baamukaguza bati: “Ni nkaha nambere orukugonza tukuteekanirize ahoraliira Okuhingurwaho?”
18 Yabagarukamu ati: “Mugende omu rubuga omwa nanka mumugambire muti, ‘Omwegesa agambire ati: “Obwire bwange obwanteekirweho buli haihi kuhika; ndajaguza Okuhingurwaho n’abegeswa bange omu ka yaawe.”’”
19 Abegeswa baakora nk’oku Yesu abaragiire baatekaniza Okuhingurwaho.
20 Obu bwahikire rwebagyo, yaikarra n’abegeswa be 12 ha meeza.
21 Obu bakaba nibalya, yabagambira ati: “Omu hali inywe naija kungobeza.”
22 Baatuntura muno kandi buli omu yatandika kumukaguza ati: “Mukama wange, ninyowe?”
23 Yabagambira ati: “Ogu arukukoza na nyowe omu bbakuli nuwe arukwija kungobeza.
24 Ky’amananu ngu Omwana w’omuntu naagenda nk’oku kyamuhandiikirweho. Baitu alikibona ogu aligobeza Omwana w’omuntu. Kyakubaire kirungi kakuba omuntu ogu atarazairwe.”
25 Yuda, ow’akaba ali haihi kumugobeza yamukaguza ati: “Rabbi, ninyowe?” Yesu yamugarukamu ati: “Niiwe wenka wakyegambira.”
26 Obu baali nibakyalya, Yesu yakwata omugaati hanyuma y’okusaba, yagucwamu, kandi yagabira abegeswa be naagamba ati: “Mukwate mulye. Gunu nigukikirra omubiri gwange.”
27 Kandi yakwata ekikopo yasiima, yakibaha naagamba ati: “Munyweho inywena,
28 kinu nikikikirra esagama yange ey’ekiragaano ey’erukwija kuseeseka habwa baingi nukwo baganyirwe ebibi.
29 Baitu nimbagambira nti: Tindyongera kunywa amaarwa kuruga omu mizabbibbu, kuhikya ha kiro kiri obu ndiganywa na inywe gali mahyaka omu Bukama bwa Isenyowe.”
30 Obu baamazire kuzina ebizina ebirukukugiza, baagenda ha Rusozi orw’Emizaituni.
31 Hanyuma Yesu yabagambira ati: “Ekiro kinu, inywena nimwija kutabaijuka habwange, habwokuba kikahandiikwa kiti: ‘Nditeera omuliisa kandi entaama ez’omu igana ziriraranga.’
32 Baitu obu ndihumbuurwa, ndibabanza Galiraaya kandi nuho mulinsanga.”
33 Baitu Petero yamugambira ati: “Abandi boona n’obu baratabaijuka habwawe, nyowe tindukwija kutabaijuka.”
34 Yesu yamugambira ati: “Mananu kwo ninkugambira nti, ekiro kinu, enkoko etakakookere, noija kunyehakana emirundi esatu.”
35 Petero yamugarukamu ati: “N’obu kiranyetaagisa kufa naiwe, tindukwija kukwehakana.” Abegeswa abandi boona baagamba ekintu nikyo kimu.
36 Hanyuma, Yesu yagenda na bo omu kiikaro ekirukwetwa Gesesemane, kandi yagambira abegeswa be ati: “Mwikarre hanu ngende kuli kusaba.”
37 Yatwara Petero na batabani ba Zebedaayo babiri, yatandika kuhurra obujune obw’amaani n’okwetuntura muno.
38 Yabagambira ati: “Nimpurra obujune obw’amaani nibwenda n’okunyita. Mwikale hanu kandi mwikale nimurora hamu na nyowe.”
39 Yayeyongerayo omu maiso kake, yateeza amaju, omutwe yaguteeka hansi yasaba naagamba ati: “Taata, obu kiraaba nikisoboka, nyihaho ekikopo kinu. Baitu hatali nk’oku ndukugonza baitu iwe nk’oku orukugonza.”
40 Yagaruka hali abegeswa be, yabasanga bagwijagiire, yakaguza Petero ati: “Haakire timusobora kumara esaaha emu nimurora na nyowe?
41 Mwikale nimurora kandi mwikale nimusaba, nukwo mutagwa omu kwohebwa. Ky’amananu ngu omwoyo nigugonza, baitu omubiri muceke.”
42 Yayongera yagenda ogwakabiri yasaba ati: “Taata, obu kiraaba kitarukusoboka kunyihaho ekikopo kinu kuhikya obu ndakinywa, leka kibe nk’oku orukugonza.”
43 Yayongera yagaruka yasanga bagwijagiire habwokuba baali baine oturo twingi.
44 Yabalekaho yagenda kusaba omurundi ogwakasatu kandi yabaza ebigambo nibyo bimu.
45 Yagaruka hali abegeswa be yabagambira ati: “Omu bwire nka bunu mukyagwijagiire kandi muhuumwire! Obwire buhikire Omwana w’omuntu kuheebwayo omu mikono y’abasiisi.
46 Mwimuke tugende. Dora! Ow’arangobeza airiire haihi.”
47 Obu akaba naakyabaza, dora! Yuda, omu ha ikumi na babiri yaija n’ekitebe ky’abantu, bakwasire empirima n’emiigo, batumirwe banyakatagara abakuru n’abakuru b’abantu.
48 Ayamugobiize akaba abagambiire akokurorraho, naagamba ati: “Ogu ou ndanywegera, nuwe ogu, mumukwate.”
49 Ahonaaho, yagenda hali Yesu yamugambira ati: “Rabbi, obusinge bube na iwe!” yamunywegera.
50 Yesu yamukaguza ati: “Waitu, kiki ekikulesere hanu?” Baija baagwera Yesu baamukwata.
51 Baitu dora! Omu hali abo abakaba bali na Yesu akasomorayo empirima ye, yatemaho okutu kw’omwiru wa nyakatagara omukuru, yakucwaho.
52 Yesu yamugambira ati: “Empirima yaawe gigarre omu kiikaro kyayo, habwokuba boona abakwata empirima baliitwa empirima.
53 Rundi noteekereza tinsobora kusaba Isenyowe omu bwire bunu legioni* 12 eza bamalaika?
54 Ebyahandiikirwe byakuhikiriire bita, ebirukugamba ngu eki kiine kubaho?”
55 Omu bwire obu, Yesu akagambira ekitebe ky’abantu ati: “Mwizire kunkwata mwine empirima n’emiigo nk’abarukukwata omusuma? Buli kiro naikarraga omu yekaru ninyegesa, kandi mutankwate.
56 Baitu binu byona bibaireho kuhikiiriza ebyagambirwe banabbi.” Hanyuma abegeswa be baamusigaho bairuka.
57 Abo abaakwasire Yesu baamutwara mwa nyakatagara omukuru Kayaafa, nambere abakuru n’abahandiiki baayesorooliize.
58 Baitu Petero yaikara amuhondiire haraho kuhikira kimu omu zigati ya nyakatagara omukuru. Obu yamazire kutaahamu, yaikarra n’abaheereza b’omu nju kurora ekiraabaho.
59 Banyakatagara abakuru n’ab’omu rukurato boona bakaba nibaserra obwakaiso obw’ebisuba, obu barasigikirraho kwita Yesu.
60 Baitu batabutunge n’obu kiraaba ngu hakaija abakaiso baingi ab’ebisuba. Hanyuma abakaiso babiri bakaija omu maiso,
61 baagamba bati: “Omusaija onu akagamba ati, ‘Ninsobora kuseesa hansi yekaru ya Ruhanga kandi ningyombekera ebiro bisatu.’”
62 Nubwo nyakatagara omukuru yayemerra yakaguza Yesu ati: “Eki nokibazaaho ki? Abasaija banu ebi barukukujunaana mananu?”
63 Yesu yaikara aculiire. Nyakatagara omukuru yamugambira ati: “Ninkurahiza omu maiso ga Ruhanga omwomeezi, tugambire obu oraaba oli Kristo, Omwana wa Ruhanga.”
64 Yesu yamugarukamu ati: “Niiwe wenka wakyegambira. Baitu nimbagambira nti: Kuruga hati, mulirora Omwana w’omuntu aikaliire ha mukono ogw’obulyo ogw’Ogu ow’amaani kandi naizira ha bicu eby’omu mwanya.”
65 Hanyuma nyakatagara omukuru yataagura ekijwaro kye, naagamba ati: “Ajumire Ruhanga. Nitukyayetaaga obwakaiso obundi? Mwamwehulirra.
66 Nimuteekereza ki?” Baagarukamu bati: “Asemeriire kufa.”
67 Baamucwera ebicwanta h’amaiso kandi baamuteera entomi. Abandi baamuteera empi h’amaiso,
68 nibagamba bati: “Iwe Kristo, obu oraaba oli nabbi, nooha akutiire?”
69 Omu bwire obu Petero akaba aikaliire omu zigati, omuzaana yaija nambere ali yamugambira ati: “Na iwe obaire na Yesu Omunyagaliraaya.”
70 Baitu yakyehakana omu maiso gaabo naagamba ati: “Eki murukubazaaho tinkimanyire.”
71 Obu yaturukire aheeru, omwisiki ondi yamumanyirra yagambira abo abaali baroho ati: “Omusaija onu abaire ali na Yesu Omunyanazaleesi.”
72 Nabwo yakyehakana, naarahira ati: “Omusaija ogu timmumanyire!”
73 Hanyuma y’obwire buke, abo abaali bemeriire aho baija nambere Petero ali, baamugambira bati: “Amananu gali, na iwe oli omu hali bo habwokuba eki nitukimanyira ha mbaza yaawe.”
74 Hanyuma yatandika kukyena n’okurahira ati: “Omusaija ogu timmumanyire!” Kandi ahonaaho enkoko yakooka.
75 Nubwo Petero yaijuka Yesu eki yamugambiire ati: “Mananu kwo ninkugambira nti, ekiro kinu, enkoko etakakookere, noija kunyehakana emirundi esatu.” Petero yaturuka aheeru, yarra muno.
Obugambo Obuli Hansi
^ Omu ihe ly’Abarooma, legioni emu ekaba erumu abaserikale abali hagati 4,000 na 6,000.
