Nk’oku Yahandiikirwe Matayo 27:1-66
27 Obwire obu bwakiire, banyakatagara abakuru boona, n’abakuru b’abantu baayesorooza hamu baahanuura nk’oku baraita Yesu.
2 Hanyuma y’okumuboha, baamuleeta baamukwasa Pirato, omulemi.
3 Yuda ayamugobiize, obu yarozere ngu Yesu bamucweriire omusango gw’okufa, yayeijukya kandi yaleeta ebicweka 30 eby’efeeza yabigarurra banyakatagara abakuru n’abakuru b’abantu,
4 yabagambira ati: “Nsiisire habw’okugobeza omusaija ow’ataine musango.” Kandi ubo baamugarukamu bati: “Eki, itwe nikitukwatiraho nkaha? Genda obyemarre.”
5 Yanaga ebicweka by’efeeza omu yekaru, yarugamu. Kandi hanyuma yagenda yayehanika.
6 Baitu banyakatagara abakuru, baatwara ebicweka by’efeeza, baagamba bati: “Tikirukwikirizibwa kuteeka sente zinu omu lyahurro lya yekaru habwokuba zikozesiibwe kugura esagama.”
7 Hanyuma y’okuhanuura, bakakozesa sente zinu kugura ekibanja ky’omubumbi nukwo haziikwemuga abanyamahanga.
8 Egi niyo ensonga habwaki ekibanja eki, kyayeserwe Ekibanja ky’Esagama n’okuhikya na hati.
9 Kandi ekyarangirwe kuraba omuli nabbi Yeremiya kyahikirra, ayarangire ati: “Bakatwara ebicweka 30 eby’efeeza, nugwo omuhendo gw’ogu, abaana ba Isaleri ogu baamucweriire,
10 baabiguramu ekibanja ky’omubumbi, nk’oku Yahwe akaba andagiire.”
11 Yesu akemerra omu maiso ga Pirato, kandi Pirato yamukaguza ati: “Oli Omukama w’Abayudaaya?” Yesu yamugarukamu ati: “Niiwe wenka wakyegambira.”
12 Baitu banyakatagara abakuru n’abakuru b’abantu, obu baali nibamujunaana, atagarukemu ekintu kyona.
13 Hanyuma, Pirato yamukaguza ati: “Torukuhurra ebintu bingi ebi barukukujunaana?”
14 Baitu atamugarukemu n’obu kyakuba ekigambo kimu. Kandi Pirato yahunirra muno.
15 Buli murundi obugenyi obu bwabahoga, ekaba eri ngeso y’omulemi kulekera omunyankomo abantu ou baamusabaga.
16 Omu kasumi ako konyini, bakaba bakwasire omunyankomo arukwetwa Bbarabba, ow’akaba ali nkozi y’ebibi ruranganwa.
17 Hanyuma y’ekitebe ky’abantu kwesorooza hamu, Pirato yabakaguza ati: “Nimugonza ndekere oha, Bbarabba rundi Yesu ow’arukwetwa Kristo?”
18 Habwokuba Pirato akaba akimanyire ngu itima niryo lyabaletiire kuhayo Yesu.
19 Kandi obu akaba aikaliire omu ntebe ey’okucweramu omusango, mukazi we akamusindikira obutumwa naagamba ati: “Omusaija ogu ow’ahikiriire otamuhikyaho akabi, habwokuba ekiro ntalibaniziibwe muno omu kirooto habwe.”
20 Baitu banyakatagara abakuru n’abakuru b’abantu baasoonasoona abantu bagambe ngu Bbarabba nuwe alekerwe, baitu Yesu aitwe.
21 Omulemi yakaguza abantu ati: “Omu bantu banu babiri, nimugonza ndekere oha?” Baamugarukamu bati: “Bbarabba.”
22 Pirato yayongera yabakaguza ati: “Hati, Yesu ow’arukwetwa Kristo, nimugonza mmukorre ki?” Boona baamugarukamu bati: “Ahanikwe ha muti!”
23 Yabagambira ati: “Habwaki? Kibi ki eki akozere?” Baitu baayeyongera kutokera haiguru nibagamba ngu: “Ahanikwe ha muti.”
24 Pirato obu yarozere naayejwahiza busa, kandi abantu nibeyongera kuba n’akaimukirro, yakwata amaizi yanaaba omu ngaro omu maiso g’abantu boona, naagamba ati: “Tindukujunaanwa esagama y’omusaija onu. Omusango gube hali inywe.”
25 Abantu boona baagarukamu bati: “Esagama ye leka ejunaanwe hali itwe, n’abaana baitu.”
26 Hanyuma yalekera Bbarabba, baitu yaragira ngu Yesu ateerwe, kandi yamuhayo kwitirwa ha muti.
27 Hanyuma, abaserikale b’omulemi baatwara Yesu omu nju y’omulemi kandi baayeta abaserikale abandi, boona baamwetoroora.
28 Baamujuramu ebijwaro bye, baamujweka orugoye orurukutukura,
29 kandi baaruka ekondo y’amahwa baagimujweka ha mutwe kandi baamukwasa orubingo omu mukono gwe ogw’obulyo. Baatandika kuteeza amaju omu maiso ge nibamusekereza, nibagamba ngu: “Obusinge bube na iwe, Omukama w’Abayudaaya!”
30 Baamucwera ebicwanta kandi baakwata orubingo baatandika kumuteera ha mutwe.
31 Obu baamazire kumuterra enaku, baamujuramu orugoye oru baali bamujwekere, baamujweka ekijwaro kye ekya haruguru kandi baamutwara kumuterra emisumaali ha muti.
32 Obu baali nibagenda, baatangatangana omusaija kuruga Kulene arukwetwa Simooni. Omusaija onu, bakamuhambiriza kwetweka omuti gwa Yesu.
33 Obu baahikire Gologoosa; ekirukumanyisa Ekiikaro eky’Akahangara,
34 baamuha eviini etabwirwemu ebirukusarra aginywe. Baitu hanyuma y’okugirozaaho, yayanga kuginywa.
35 Obu baamazire kumuterra emisumaali ha muti, baabagana ebijwaro bye nibakozesa okutoma,
36 kandi baikarra hansi, baikara bamulinzire.
37 Haiguru y’omutwe gwe, bakataaho akaapa akahandiikirweho omusango ogurukumujunaanwa, akandi hakaba hahandiikirweho ebigambo binu: “Onu nuwe Yesu Omukama w’Abayudaaya.”
38 Hanyuma, abasuma babiri bakahanikwa ha rubaju rwe, omu ha rubaju orw’obulyo n’ondi ha rw’emoso.
39 Kandi abo abakaba nibarabaho baamujuma, nibahungya emitwe yabo,
40 nibagamba bati: “Iwe ayagambire ngu nosobora kuseesa yekaru nogyombekera ebiro bisatu, wejune! Obu oraaba oli mwana wa Ruhanga, sirimuka oruge ha muti!”
41 Omulingo nugwo gumu, banyakatagara abakuru, abahandiiki, n’abakuru b’abantu baatandika kumusekereza nibagamba bati:
42 “Abandi akabajuna, baitu uwe tasobora kwejuna! Nuwe Omukama wa Isaleri, leka ayehanule ha muti, kandi nitwija kumwikiririzaamu.
43 Ayesigire Ruhanga, leka amujune hati obu araaba namugonza. Habwokuba akagamba ati: ‘Ndi Mwana wa Ruhanga.’”
44 N’abasuma abakaba bahanikirwe ha muti ha rubaju rwe, na bo baamujuma.
45 Kandi ensi yoona ekaswekwa omwirima kuruga saaha mukaaga kuhika saaha mwenda.
46 Nk’omu saaha mwenda, Yesu yayamirra omu iraka erya haiguru ati: “Eli, Eli, lama sabbakasani?” ekirukumanyisa ngu, “Ruhanga wange, Ruhanga wange, habwaki onsigireho?”
47 Obu baahuliire eki, abamu abaali bemeriire aho baatandika kugamba bati: “Omusaija onu naayeta Eriya.”
48 Ahonaaho omu hali bo yairuka, yakwata siponji* yagiibika omu maarwa agarukusarra, kandi yagiteeka ha rubingo yamuha anywe.
49 Baitu abandi baagamba bati: “Muleke! Leka turole Eriya obu araija akamujuna.”
50 Yesu yayongera yayamuza n’iraka erya haiguru kandi yafa.*
51 Kandi dora! orutimbi rwa yekaru rwatemukamu kabiri, kuruga haiguru kuhika ha nsi. Ensi yatengeeta n’emyandara yayatika.
52 Ebituuro byayatika kandi emitumbi ey’abarukwera abakaba bagwijagiire yarugayo yaija haiguru
53 (kandi abantu abaarugire omu kiikaro ekirumu ebituuro hanyuma ya Yesu kuhumbuuka baarugayo baataaha omu rubuga), kandi abantu baingi baagirora.
54 Baitu omukuru w’abaserikale hamu n’abo abaakaba ali na bo, obu baarozere omusisa n’ebintu ebirukubaho, baatiina muno baagamba bati: “Mananu kwo, onu abaire ali Mwana wa Ruhanga.”
55 Kandi abakazi baingi kuruga Galiraaya abakaba basendekeriize Yesu nukwo bamukonyere; baali bemeriire haraho nibarora.
56 Omuli abo hakaba harumu Malyamu Magadalene, Malyamu nyina Yakobo na Yose, hamu na nyina batabani ba Zebedaayo.
57 Obwire obu bwatandikire kwira, hakaija omusaija omuguuda kuruga Alimaseya, arukwetwa Yusufu, na uwe ow’akaba afookere mwegeswa wa Yesu.
58 Omusaija onu akagenda hali Pirato, yamusaba omutumbi gwa Yesu. Kandi Pirato yaragira bagumuhe.
59 Yusufu yatwara omutumbi gwa Yesu, yaguzinga omu rugoye orurukwera orw’ekitaani ekisemiire,
60 hanyuma yagubyamya omu kituuro ekihyaka eki akaba alimire omu mwandara. Obu yamazire kukinga ha mulyango gw’ekituuro n’ibaale erikooto, yagenda.
61 Baitu Malyamu Magadalene na Malyamu ondi baikara baikaliire omu maiso g’ekituuro.
62 Hanyuma y’ekiro eky’okuteekaniza, ekiro ekyahondireho ekaba eri Sabbiti. Nubwo banyakatagara abakuru n’Abafalisaayo baayesorooleza omu maiso ga Pirato,
63 baamugambira bati: “Waitu, nitwijuka omusaija ogu ow’ebisuba obu akaba akyali mwomeezi akagamba ngu, ‘Hanyuma y’ebiro bisatu ndihumbuurwa.’
64 Nahabweki ragira balinde kurungi ekituuro kuhika ha kiro ekya kasatu, nukwo abegeswa be bataija bakamwiba, hanyuma bakagambira abantu ngu, ‘Ahumbuukire kuruga omu bafu!’ Kandi ekisuba kinu nikiija kukirra hara eky’okubanza.”
65 Pirato yabagarukamu ati: “Mutwale abaserikale. Mugende mukirinde kurungi nk’oku murukugonza.”
66 Nahabweki, baagenda, baakingira kimu ekituuro nibataho emanyikirizo ha ibaale kandi baataho n’abalinzi.
