Nk’oku Yahandiikirwe Matayo 28:1-20
28 Hanyuma ya Sabbiti, nyenkyakara omu rukyakya, ha kiro ky’okubanza omu wiiki, Malyamu Magadalene na Malyamu ondi bakaija kurora ekituuro.
2 Kandi dora! omusisa ogw’amaani gukaba gutiire habwokuba malaika wa Yahwe akaba asirimukire kuruga omu iguru, yakulingura ibaale kuruga ha kituuro kandi akaba alikaliireho.
3 Akaba naayangasana nk’omurabyo kandi ebijwaro bye byali nibyera titiiti nk’ebirika.
4 Kandi habw’okumutiina, abalinzi bakatukumira baasisana nk’abafiire.
5 Malaika yagambira abakazi abo ati: “Mutatiina, nkimanyire ngu nimuserra Yesu ayaitiirwe ha muti.
6 Taroho hanu, ahumbuukire nk’oku yabagambiire. Mwije murole nambere bakaba bamutaire.
7 Murahuke mugende mugambire abegeswa be nk’oku ahumbwirwe omu bafu, dora! naagenda Galiraaya nuho muramurorra. Dora! Nabagambira.”
8 Nahabweki, ahonaaho bakaruga ha kituuro batiinire kandi baine okusemererwa kwingi, bairuka kugambira abegeswa be.
9 Kandi dora! Yesu akabatangatangana yabagambira ati: “Obusinge bube na inywe.” Baija nambere ali, baamukwata ha bigere, bainama omu maiso ge.
10 Hanyuma, Yesu yabagambira ati: “Mutatiina, mugende mugambire bagenzi bange, bagende Galiraaya kandi oku nuho barandorra.”
11 Obu bakaba bali omu muhanda, bamu h’abalinzi bakagenda omu rubuga, baagambira banyakatagara abakuru ebintu byona ebyali bibaireho.
12 Hanyuma y’abanyakatagara abakuru kwesorooza hamu n’abakuru n’okuhanuura hamu, baaha abaserikale ebicweka by’efeeza bingiho,
13 baabagambira bati: “Mugambe muti: ‘Abegeswa be baizirege ekiro tugwijagiire, baamwiba.’
14 Muteralikirra, omulemi obu arakihurra nitwija kumusoborra.”
15 Nahabweki, baatwara ebicweka by’efeeza kandi baakora nk’oku bagambiirwe. Kandi amakuru ganu gakararanga omu Bayudaaya kuhikya n’akasumi kanu.
16 Baitu abegeswa 11 baagenda Galiraaya ha rusozi nambere Yesu akaba agambire kubatangatanganira.
17 Obu baamurozere, bainama omu maiso ge baitu abamu baagurukyagurukya obu araaba ali nuwe.
18 Yesu yairra haihi na bo kandi yabaza na bo, naagamba ati: “Obusobozi bwona bumpairwe omu iguru n’omu nsi.
19 Nahabweki, mugende mufoole abantu ab’omu mahanga goona abegeswa, nimubabatiza omu ibara lya Isiitwe, n’ery’Omwana, n’ery’omwoyo ogurukwera,
20 nimubeegesa kworobera* byona ebi nabaragiire. Kandi dora! Ndi hamu na inywe kuhikya ha mpero ey’obusinge bunu.”
Obugambo Obuli Hansi
^ Rundi, “kukwata.”
