Nk’oku Yahandiikirwe Matayo 3:1-17
3 Omu biro ebi, Yohana Omubatizi* akaija naatebeza omu irungu lya Buyudaaya,
2 naagamba ati: “Mwegarukemu habwokuba Obukama obw’omu iguru bwiriire haihi.”
3 Kandi onu nuwe yabaziibweho kuraba omuli nabbi Isaya ati: “Iraka ly’ogu arukwamirra omu irungu naagamba ati: ‘Muteekanize omuhanda gwa Yahwe! Muteerekereze emihanda ye.’”
4 Yohana akaba ajwaire ekijwaro ekikozerwe omu byoya by’engamiya kandi ayesibire omweko ogw’oruhu omunda ye. Yalyaga enzige n’obwoki obw’omu kisaka.
5 Hanyuma, abantu kuruga omu Yerusalemu na Buyudaaya yoona, hamu n’ebiikaro ebyetoroire Yorudaani bakaba nibagenda nambere ali,
6 yababatiza omu Kyambu Yorudaani, kandi nibaatura ebibi byabo omu rwijwire.
7 Obu yarozere Abafalisaayo n’Abasadukaayo baingi nibaija kubatizibwa, yabagambira ati: “Inywe abaana ab’enjoka ez’obusegwa,* nooha abahabwire kwiruka ekiniga ekirukwija?
8 Nahabweki, mwane ebyana* ebirukwoleka ngu mwegarukiremu.
9 Muteebiihabiiha nimuteekereza ngu ‘Iburahimu nuwe isiitwe.’ Baitu nimbagambira nti, Ruhanga naasobora kwimukiza Iburahimu abaana kuruga omu mabaale ganu.
10 Endemu* etairwe ha mihama y’emiti. Kandi omuti gwona ogutarukwana ebyana ebirungi, nigwija kutemwa gunagwe omu murro.
11 Nyowe nimbabatiza omu maizi habwokuba mwegarukiremu ebibi byanyu. Baitu ogu arukwija, nankira obusobozi kandi timpikire okumujuuramu enkaito ze. Ogu naija kubabatiza n’omwoyo ogurukwera hamu n’omurro.
12 Omu ngaro ze akwasire orugali orw’okusegesa.* Naija kusemereza kimu ezigati ey’okusegeseraho, kandi asorooze engano agite omu nguli,* baitu ebisunga naija kubyokya n’omurro ogutasobora kuzima.”
13 Yesu akaruga Galiraaya yaija Yorudaani, yagenda hali Yohana amubatize.
14 Baitu Yohana yalengaho kumutanga naamugambira ati: “Niiwe osemeriire kumbatiza, hati nogonza nyowe nkubatize?”
15 Yesu yamugarukamu ati: “Ikiriza nukwo kibe kiti hati, nukwo kitusobozese kukora byona ebihikiriire.” Hanyuma, Yohana yaikiriza yamubatiza.
16 Hanyuma ya Yesu kubatizibwa, ahonaaho akaruga omu maizi. Kandi dora! Iguru lyakinguka, yarora omwoyo ogurukwera nigumusirimukaho guli omu kisisani eky’eriiba.
17 Iraka kuruga omu iguru lyagamba liti: “Onu nuwe Omwana wange, ou ndukugonza muno, kandi ou nsiimire.”
Obugambo Obuli Hansi
^ Rundi, “Omubatiza.”
^ Rundi, “obusegu.”
^ Rundi, “mukole ebikorwa.”
^ Rundi, “embaizi, esooka.”
^ Rundi, “orw’okusegenya.”
^ Rundi, “eryahurro.”
