Nk’oku Yahandiikirwe Matayo 4:1-25
4 Hanyuma, omwoyo* gukebembera Yesu gwamutwara omu irungu nukwo ayohebwe Sitaani.*
2 Obu yamazire kusiiba* ebiro 40 nyamusana n’ekiro, enjara ekamuruma.
3 Kandi Omwohi akaija nambere ali yamugambira ati: “Obu oraaba oli Mwana wa Ruhanga, gambira amabaale ganu gafooke ebyokulya.”
4 Baitu Yesu yamugarukamu ati: “Kikahandiikwa ngu: ‘Omuntu tayomeera habw’ebyokulya byonka, baitu ayomeera habwa buli kigambo kyona ekiruga omu kanwa ka Yahwe.’”
5 Hanyuma, Sitaani akamutwara omu rubuga orurukwera, yamwemereza haiguru y’ekiikaro ekirukukirayo okuraiha ekya yekaru,
6 yamugambira ati: “Obu oraaba oli Mwana wa Ruhanga, guruka ogwe hansi habwokuba kikahandiikwa ngu: ‘Aliragira bamalaika be bakukwate omu mikono yabo, nukwo ekigere kyawe otakiteera ha ibaale.’”
7 Yesu yamugarukamu ati: “Kikongera kyahandiikwa ngu: ‘Otalirenga Yahwe Ruhanga waawe.’”
8 Sitaani yayongera yatwara Yesu ha rusozi oruraihire muno, yamwoleka obukama bwona obw’omu nsi n’ekitiinisa kyabwo,
9 yamugambira ati: “Binu byona ndabikuha obu orainama okandamya.”
10 Yesu yamugambira ati: “Genda Sitaani, kikahandiikwa ngu: ‘Yahwe Ruhanga waawe nuwe osemeriire kuramya, kandi nuwe wenka ou osemeriire kuheereza.’”
11 Hanyuma Sitaani yamurugaho. Kandi dora! bamalaika baija baatandika kumukonyera.
12 Obu yahuliire ngu Yohana atairwe omu nkomo, yagenda Galiraaya.
13 Hanyuma y’okuruga Nazaleesi, yaija yaikara Kaperenaumu ha rubaju rw’enyanja omu mitaano ya Zaburoni na Nafutaali,
14 nukwo kihikiirize obunabbi obwagambirwe kuraba omu nabbi Isaya ayagambire ati:
15 “Iwe ensi ya Zaburoni, ensi ya Nafutaali, omuhanda ogurukugenda ha nyanja, hamu na nseeri ya Yorudaani, Galiraaya ey’amahanga.
16 Abantu abakaba bali omu mwirima bakarora ekyererezi eky’amaani kandi abo abaikaliire omu kiituuru eky’okufa, ekyererezi kikabaakira.”
17 Kuruga kasumi ako, Yesu yatandika kutebeza naagamba ati: “Mwegarukemu, habwokuba Obukama obw’omu iguru bwiriire haihi.”
18 Obu akaba naarubata ha musa gw’enyanja ya Galiraaya, akarora Simooni, arukwetwa Petero, na mugenzi we Andereya nibanaga ebitimba omu nyanja habwokuba bakaba bali basohi.
19 Yabagambira ati: “Mwije mumpondere, kandi ndabafoora abasohi b’abantu.”
20 Ahonaaho baasigaho ebitimba byabo, baamuhondera.
21 Obu yarugire aho, yarora abandi babiri abaali nibazaarwa hamu, Yakobo mutabani wa Zebedaayo, na mugenzi we Yohana. Bakaba bali omu bwato na isebo Zebedaayo, nibasona ebitimba kandi yabeeta.
22 Ahonaaho baalekaho ebitimba byabo na isebo, baamuhondera.
23 Hanyuma, akaraba omu Galiraaya yoona nayegesa omu masorrokaniro gaabo, naatebeza amakuru amarungi ag’Obukama kandi naakiza abantu endwaire eza buli mulingo n’obulema obwa buli mulingo.
24 Amakuru agarukukwata hali ebi yakozere gaararanga kuhika omu Busuli yoona. Baamuleetera abantu boona abaali barwaire endwaire eza buli mulingo kandi abarukusaasa muno, abarukutalibanizibwa badaimooni,* abarwaire ensimbo, n’abasaraire, kandi boona yabakiza.
25 Abantu baingi kuruga Galiraaya, Dekapoli,* Yerusalemu, Buyudaaya, hamu na nseeri ya Yorudaani, bakamuhondera.
Obugambo Obuli Hansi
^ Rundi, “omwoyo gwa Ruhanga.”
^ Nk’oku kiri, “Omuhangirizi.” Rora, Kusoborra Ebigambo.
^ Rora, Kusoborra Ebigambo.
^ Rora, Kusoborra Ebigambo.
^ Rora, Kusoborra Ebigambo.
