Nk’oku Yahandiikirwe Matayo 5:1-48
-
OKWEGESA OKWA HA RUSOZI (1-48)
-
Yesu atandika kwegesa ha rusozi (1, 2)
-
Ebintu mwenda ebireta okusemererwa (3-12)
-
Ekisura hamu n’ekyererezi (13-16)
-
Yesu aija kuhikiiriza Ebiragiro (17-20)
-
Obuhabuzi oburukukwata ha kiniga (21-26), obusiihani (27-30), kugaitururwa (31, 32), kurahira (33-37), kuhoora enzigu (38-42), kugonza abanyanzigwa (43-48)
-
5 Obu yaboine ekitebe ky’abantu, yatemba ha rusozi kandi obu yamazire kwikarra, abegeswa be baija nambere ali.
2 Hanyuma, yatandika kubeegesa naagamba ati:
3 “Baine okusemererwa abo abamanyire obwetaago bwabo obw’eby’omwoyo, habwokuba Obukama obw’omu iguru bwabo.
4 “Baine okusemererwa abo abaganya, habwokuba balihuumuzibwa.
5 “Baine okusemererwa abaculeezi, habwokuba baligwetwa ensi.
6 “Baine okusemererwa abo abaine enjara n’iroho ery’okuhikirra, habwokuba baliigusibwa.
7 “Baine okusemererwa abo abooleka abandi embabazi, habwokuba nabo balyolekwa embabazi.
8 “Baine okusemererwa abo abarukwera omu mutima, habwokuba balirora Ruhanga.
9 “Baine okusemererwa abo abaleetaho obusinge, habwokuba balyetwa abaana ba Ruhanga.
10 “Baine okusemererwa abo abahiiganiziibwe habw’okuhikirra, habwokuba Obukama obw’omu iguru bwabo.
11 “Musemererwe abantu obu babajuma, obu babahiiganiza, kandi bakababazaaho ebisuba n’ebintu ebibi ebya buli mulingo habw’ibara lyange.
12 Musemererwe kandi mukyanganuke muno, habwokuba empeera yanyu y’amaani omu iguru. Na banabbi abaababandize bakabahiiganiza.
13 “Muli kisura ky’ensi, baitu ekisura obu kihwamu okunura kwakyo, kirayongera kita kunura? Nikiba kitakyaine mugaso, oihireho kukinaga aheeru kikarubatirirwa abantu.
14 “Muli kyererezi ky’ensi. Orubuga orwombekerwe ha rusozi tirusobora kuserekwa.
15 Abantu obu bahemba etaara, tibagisweka n’ekigega baitu bagiteeka ha kikondo kyayo, nukwo emulikire abali omu nju boona.
16 Omu mulingo nugwo gumu, leka ekyererezi kyanyu kyakire abantu boona, nukwo barole ebikorwa byanyu ebirungi kandi bakugize Isiinywe ow’omu iguru.
17 “Mutateekereza ngu nkaija kwihaho ebiragiro rundi ebyabaziibwe banabbi, ntaije kubiihaho baitu kubihikiiriza.
18 Mali nimbagambira nti, iguru n’ensi n’obu byakuhwaho, akanyuguta akarukukirayo obutaito rundi akacweka akataito ak’enyuguta, tikaliihwa omu biragiro, kuhikya ebintu byona bihikiriire.
19 Nahabweki, omuntu weena anyakucwa kimu ha biragiro binu ebirukurorwa nk’ebitaine mugaso, kandi akeegesa n’abandi kubicwa, na uwe alirorwa nk’omuntu ow’ataine mugaso omu Bukama obw’omu iguru. Baitu ogu ow’abyorobera kandi akeegesa abandi kubihondera, alyetwa omukuru omu Bukama obw’omu iguru.
20 Baitu nimbagambira nti, kakuba okuhikirra kwanyu kutakira okw’abahandiiki n’Abafalisaayo, timulitaaha omu Bukama obw’omu iguru.
21 “Mukahurra nk’oku kyagambiirwe ab’omu busumi obwa kara ngu: ‘Otaliita, baitu weena anyakwita omuntu alijunaanwa omu mbuga z’ebiragiro.’
22 Baitu nimbagambira nti, omuntu weena ow’aikara abiihiriirwe mugenzi we, alijunaanwa omu mbuga z’ebiragiro. Kandi ogu weena ow’ajuma mugenzi we, na uwe alijunaanwa omu mbuga y’ebiragiro ey’erukukirayo. Kandi ogu weena anyakweta mugenzi we ati: ‘Kidoma we iwe’ aliba asemeriire kunagwa omu Gehena.*
23 “Kakuba oba olesere ekisembo kyawe ha kyoto, baitu okaijuka ngu mugenzi waawe aine eki arukukujunaana,
24 leka ekisembo kyawe omu maiso g’ekyoto, kandi obanze ogende ogarreho obusinge na mugenzi waawe, hanyuma ogaruke oheyo ekisembo kyawe.
25 “Rahuka kumaraho ensonga n’ogu ow’arukukujunaana mukyali omu muhanda, nukwo atakutwara mw’omucwi w’emisango kandi omucwi w’emisango, akakuhayo hali omuserikale kandi omuserikale akakuteeka omu nkomo.
26 “Mananu kwo ninkugambira nti, tolirugayo kuhikya omazire kusasura akasente kaawe koona.
27 “Mukahurra nk’oku kyagambirwe ngu: ‘Otalisiihana.’
28 Baitu nimbagambira nti, ogu weena ow’aikara naarora omukazi akatandika kumwegomba, aba amazire ira kusiihana na uwe omu mutima gwe.
29 Eriiso lyawe obu liraaba nirikuleetera kutabaijuka, liihemu olinage hara. Haakire ofeerwe kimu ha bicweka byawe, omu kiikaro ky’omubiri gwawe gwona kunagwa omu Gehena.
30 Ekindi, omukono gwawe ogw’obulyo obu guraaba nigukuleetera kutabaijuka, gutemeho ogunage hara. Haakire ofeerwe kimu ha bicweka byawe, omu kiikaro ky’omubiri gwawe gwona kunagwa omu Gehena.
31 “Kikongera kyagambwa ngu: ‘Ogu weena anyakubinga* mukazi we, amuhe ebbaruha ey’erukwoleka ngu amubingire.’
32 Baitu nimbagambira nti, ogu weena ow’abinga mukazi we atarukusigikirra ha busiihani,* aba amutaire omu nyikara ey’esobora kumuleetera kugwa omu busiihani. Kandi weena ow’aswera omukazi ow’abingirwe omu mulingo gunu, aba asiihaine.
33 “Kandi mukahurra nk’oku abaira baagambiirwe ngu: ‘Otalirahira otakozere eki oraganiize, baitu osemeriire kukora kyona eki oraganiize Yahwe.’
34 “Baitu nimbagambira nti: ‘Otalirahira nakake, nobukwakuba okurahirra iguru habwokuba nikyo kitebe kya Ruhanga,
35 kandi otalirahirra ensi habwokuba eri katebe k’ebigere bye, nobukwakuba okurahirra Yerusalemu habwokuba ruli rubuga rw’Omukama omukuru.
36 Otalirahirra omutwe gwawe, habwokuba tosobora kuhindura n’obu kaakuba akasoke kamu ak’omutwe gwawe, okakafoora akarukwera rundi akarukwiragura.
37 Baitu leka ‘Ego’ yanyu ikale ego, kandi ‘Nangwa’ ikale nangwa, ekirukukira hali ebi kiruga hali omubi.
38 “Mukahurra nk’oku kyagambirwe ngu: ‘Eriiso habw’eriiso, n’eriino habw’eriino.’
39 Baitu nimbagambira nti, mutarwanisa omuntu weena omubi. Kakuba omuntu akuteera oruhi ha rubaju orw’obulyo orw’itama, omuhindurre n’orubaju orundi.
40 Kandi kakuba omuntu aba naagonza okukutwara omu kooti habw’okugonza kukwihaho orugoye rwawe orw’omunda, muleke atwale n’orw’aheeru.
41 Kandi kakuba omuntu ow’aine obusobozi, akuhambiriza ngu mugende hamu mairo emu, genda na uwe mairo ibiri.
42 Omuntu kakuba akusaba, omuhe eki akusabire. Kandi otetantara omuntu ow’arukugonza omwohoze.
43 “Mukahurra nk’oku kyagambirwe ngu: ‘Osemeriire kugonza mutaahi waawe kandi onobe omunyanzigwa waawe.’
44 Baitu nimbagambira nti, mugumizeemu nimugonza abanyanzigwa banyu, n’okusabira abo ababahiiganiza,
45 nukwo mwoleke ngu muli baana ba Isiinywe ow’ali omu iguru, habwokuba aleka omusana gwe kujwera ababi n’abarungi, kandi anagira enjura ye abahikiriire n’abatahikiriire.
46 Obu muragonza abarukubagonza bonka, mulitunga mpeera ki? Abasorooza b’omusoro na bo tibakora ekintu nikyo kimu?
47 Kandi kakuba muramukya bagenzi banyu bonka, kintu ki eky’embaganiza eki muba mukozere? N’abanyamahanga na bo tinikyo bakora?
48 Musemeriire kuba abahikiriire, nk’oku Isiinywe ow’omu iguru ahikiriire.
Obugambo Obuli Hansi
^ Ekiikaro ekikaba kiri aheeru ya Yerusalemu, nambere baayokezaaga kasasiro.
^ Rundi, “anyakugaitururwa na.”
^ Omu Ruyonaani, por·neiʹa. Rora, Kusoborra Ebigambo.
