Nk’oku Yahandiikirwe Matayo 6:1-34
6 “Mwerinde, muleke kukora ebikorwa eby’okuhikirra omu maiso g’abantu nukwo babarole, kitali eki timurukwija kutunga empeera kuruga hali Isiinywe ow’omu iguru.
2 Nahabweki, obu orakorraga abantu abandi ebirungi, otalyeterra engwara nk’abagobya oku bakora omu masorrokaniro n’omu mihanda, nukwo abantu babahaisanize. Mananu kwo nimbagambira nti, bamazire kutunga empeera yabo omu bwijwire.
3 Baitu obu orakorraga abantu abandi ebirungi, otaikiriza omukono gwawe ogw’emoso kumanya omukono gwawe ogw’obulyo eki gurukukora,
4 nukwo ebintu ebirungi ebi okozere bibe eby’omu nsita. Obu nubwo So ow’arora eby’omu nsita alikuha empeera.
5 “Ekindi, obu orasabaga, otetwaza nk’abagobya abagonza kusaba bemeriire omu masorrokaniro n’omu ntangatangano z’emihanda, nukwo abantu babarole. Mananu kwo nimbagambira nti, bamazire kutunga empeera yabo omu bwijwire.
6 Baitu obu oraabaga noogonza kusaba, otaahe omu kisiika kyawe oyekingiremu, hanyuma osabe So ow’arora eby’omu nsita. Kandi So ow’arora eby’omu nsita alikuha empeera.
7 Obu murabaga nimusaba, mutaikara nimugarukamu ebigambo nibyo bimu nk’abamahanga okubakora, nibateekereza ngu nibaija kuhulirwa habw’okukozesa ebigambo bingi.
8 Nahabweki, mutakora nkabo, habwokuba Isiinywe aba amanyire eki murukwetaaga mutakakimusabire.
9 “Baitu musabege muti:
“‘Isiitwe ali omu iguru, ibara lyawe lyezebwe.
10 Leka Obukama bwawe bwije. Leka ebi ogonza bikorwe omu nsi, nk’oku bikorwa omu iguru.
11 Otuhe ebyokulya byaitu ebya kiro kinu;
12 kandi otuganyire amabanja gaitu, na itwe nk’oku tuganyira abaturukubanja.
13 Otatutwara omu kwohebwa, baitu otujune hali omubi.’
14 “Obu muganyira abo ababasobeza, na Isiinywe ow’omu iguru alibaganyira,
15 baitu obu mutabaganyira ensobi zaabo, na Isiinywe talibaganyira ensobi zanyu.
16 “Obu murasiibaga, muleke kwoleka obujune h’amaiso nk’abagobya oku bakora, eki bakikora nukwo booleke abantu ngu basiibire. Mananu kwo nimbagambira nti, bamazire ira kutunga empeera yabo omu bwijwire.
17 Baitu inywe obu muraabaga nimusiiba, musiige amagita omu mitwe yanyu kandi munaabe h’amaiso ganyu,
18 nukwo mutooleka abantu ngu musiibire, baitu Isiinywe ow’arora eby’omu nsita, leka nuwe wenka akimanye. Kandi Isiinywe ow’arora eby’omu nsita alibaha empeera.
19 “Muleke kwahura itungo lyanyu omu nsi, nambere ebihuka n’okumoma birisiisa, kandi nambere abasuma bacwa bakaliiba.
20 Baitu itungo lyanyu mulyahule omu iguru, nambere litasobora kusiiswa ebihuka n’okumoma, kandi nambere abasuma batasobora kucwa bakaliiba.
21 Habwokuba nambere itungo lyawe liri, nuho omutima gwawe gwikara.
22 “Etaara y’omubiri niryo eriiso. Eriiso lyawe obu liba nirirora hamu, omubiri gwawe gwona nigwija kwijura ekyererezi.
23 Baitu eriiso lyawe obu liba liri ly’ihali, omubiri gwawe gwona gwijura omwirima. Ekyererezi ekiri omuli inywe obu guraaba guli mwirima, omwirima ogu ka gw’amaani!
24 “Busaho muntu asobora kukorra abakama babiri; habwokuba alinobaho omu kandi agonze ondi, rundi aligumira hali omu kandi agaye ondi. Timusobora kukorra Ruhanga hamu n’itungo.
25 “Nahabweki, nimbagambira nti: Muleke kweralikirra obwomeezi bwanyu habw’eki muraalya, rundi eki muraanywa, rundi eki muraajwara. Obwomeezi tiburukukira ebyokulya n’eby’okujwara?
26 Mwetegereze ebinyonyi eby’omu mwanya; tibisiga embibo, tibigesa, nobukwakuba okuhunika omu nguli, baitu Isiinywe ow’omu iguru abiriisa. Inywe timuli b’omugaso muno okubikira?
27 Nooha omuli inywe habw’okwetuntura asobora kwongera ha bwomeezi bwe akacweka akataito?
28 Ekindi, habwaki nimweralikirra habw’eki murajwara? Mwegere ha byakyo eby’omu kisaka, omulingo bikuramu; tibikora omulimo, nobukwakuba okusona engoye,
29 baitu nimbagambira nti, nobwakuba Suleimani omu kitiinisa kye kyona, atajwale kurungi kwingana kimu ha byakyo binu.
30 Nahabweki, Ruhanga obu araaba naasobora kujweka ebimera eby’omu kisaka, ebiroho kiro kinu, kandi nyenkya bikookebwa omu murro, tarukwija kukiraho kubajweka inywe, abaine okwikiriza kuke?
31 Nahabweki, mutalyeralikirra nimugamba ngu, ‘Turaalya ki?’ rundi, ‘Turaanywa ki?’ rundi, ‘Turaajwara ki?’
32 Ebintu binu byona, abanyamahanga nibyo barukwekamba kuserra. Baitu Isiinywe ow’omu iguru akimanyire ngu, ebintu ebi byona nimubyetaaga.
33 “Mubanzeege muserre Obukama bwe n’okuhikirra kwe, kandi n’ebintu ebi byona biribongerwaho.
34 Nahabweki, mutalyeralikirra ebya nyenkya, habwokuba ekiro ekya nyenkya, nikiija kuba n’okwetuntura kwakyo. Buli kiro kiine ebizibu byakyo ebirukukimara.
